Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉Lōa Phek-chhong
Hit kang sī kū-le̍k chiaⁿ-ge̍h chhe-jī, thiⁿ-khì chin hó, a-ko͘ kah ko͘-tiūⁿ sio-chio beh tńg-khì gōa-ke. Siūⁿ tio̍h kú-kú bô khòaⁿ–kìⁿ ê chhin-chiâⁿ beh saⁿ-kìⁿ, sim-lāi chin-chiàⁿ hoaⁿ-hí, sui-jiân lō͘-tô͘ iâu-oán mā m̄-kiaⁿ kan-khó͘.
Kiâⁿ kàu chng-á-thâu ê sî, a-ko͘ ê gōa-ke chiū beh kàu ah.
A-só ùi hn̄g-hn̄g khòaⁿ-kìⁿ lâng-kheh lâi, tō ia̍t-chhiú hiu in ji̍p–lâi. Ko͘-tiūⁿ tī gōa-kháu thiaⁿ tio̍h ti-á ê háu-siaⁿ kī-ko͘ⁿ-kiò, i sim-lāi hò͘ⁿ-hiân chiū kiâⁿ óa khì ti-tiâu beh khòaⁿ khah chin leh, i ná kiâⁿ ná o-ló kóng, chī-chūi kā ti-á chhī kah chiah-nī súi, pah-bīn ū hó kè-siàu. I oa̍t-kòe beh kiâⁿ ǹg tiū-tiâⁿ ê sî, bô-phah-sǹg, thâu-chêng sī ti-sái-khut, i lak-lo̍h-khì khut-á-té, a-só khòaⁿ–tio̍h kóaⁿ-kín chông–lâi kā i khiú–khì-lâi, koh kōaⁿ-chúi kā i chhiâng, chi̍t tháng koh chi̍t tháng, ti̍t-kàu bô ti-sái-bī, chit-sî ko͘-tiūⁿ kiaⁿ kah bīn chheⁿ-sún-sún, a-só mā pháiⁿ-sè kah bīn âng-ki-ki, m̄ chai beh kóng siáⁿ chiah hó.
Āu–lâi thiaⁿ-kóng, kòe–lâi ê kòe-nî a-ko͘ beh tńg-khì gōa-ke ê sî, ko͘-tiūⁿ tō m̄ bat tòe–ah, khòaⁿ–khì-lâi hit khut ê ti-sái-bī tòe i chi̍t-sì-lâng, si̍t-chāi chin lī-hāi.
