Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎A-Jû
Tū, tū, tū…… “Ǒe! A-má, góa sī A-jû–lah! ” “A-jû o̍͘h! Góa kā lí kóng, Sau-siaⁿ chăng sí-khì–ah!”
Goán tau sī hit-khoán kheh-thiaⁿ thâu-chêng ū chi̍t ê sè-sè ê sé-saⁿ-keng ê hit lō hoàn-chhù. Tē-pán iū-koh sī hit-chióng kó͘-sek ē hoe-chng. Chit ê sè-sè ê khong-kan, chhiong-móa bí-lē ê kì-tî, chí-sī hit-chūn góa bô hoat-hiān.
Í-chêng A-bú koh tī–leh ê sî, kàu-chhù tē it kiāⁿ tāi-chì tō sī kā sé-saⁿ-keng ê tiān-hóe tiám hō͘ kng. Tiān-hóe chi̍t kng, niau-à tō lóng ûi–kòe-lâi, tōa-siaⁿ sè-siaⁿ chhá beh chia̍h-pn̄g. Chit-sî A-bú tio̍h ē kóng: “Tán–chi̍t-ē, tán–chi̍t-ē, góa chiah tú kàu-chhù neh!” Sûi-āu A-bú tō ē khai-sí chún-pī in ê àm-tǹg. Chi̍t lia̍p chi̍t lia̍p phang-kòng-kòng ê chhī-liāu lak lòe óaⁿ lāi, hoat-chhut khi-li-khok-lok ē siaⁿ-im, koh ū niau-á tōa siaⁿ sè siaⁿ niau-niau-kiò ê khàu-iāu siaⁿ. Tán-kàu óaⁿ chi̍t lo̍h-tē, sòa–lâi tio̍h kan-taⁿ
ē-tàng thiaⁿ-tio̍h niau-á in khâu-khâu-khâu ē chia̍h pn̄g siaⁿ.
Koh lâi, A-bú ē chūn-khui chúi-tō-thâu, kā chúi-tháng té chúi té hō͘ tīⁿ, kā chúi-tháng kōaⁿ kì gōa-kháu, sè-jī-á kā mn̂g-kháu ê hoe-chháu ak-chúi. Chiong thô͘ ak tâm liáu-āu, koh ē iōng chhiú hó-lé-á kā chúi hiù tī hio̍h-á téng-thâu. A-bú kóng án-ne hoe-chháu chiah ē khui kah súi-súi. Gún nn̄g bú-á-kiáⁿ tō án-ne ná ak hoe ná khai-káng.
Chit-chūn A-pa tō ē kiâⁿ ji̍p-khì kheh-thiaⁿ kā tiān-sī phah-khui, kā chhēng ê saⁿ phiaⁿ ji̍p-khì sé-saⁿ-ki sé. A-pa koaiⁿ-mn̂g ê sî lóng chiâⁿ tōa siaⁿ, kui-ê sé-saⁿ-keng tō chhiong-boán khui-mn̂g kap koaiⁿ-mn̂g ê siaⁿ, sé-saⁿ-ki hòng-hòng kiò ê siaⁿ, tiān-sī teh chhiùⁿ koa ê siaⁿ, koh ū gún saⁿ ê kóng-ōe ê siaⁿ. Nā sī sió-tī chit-sî tú-hó tńg–lâi, án-ne tō koh khah lāu-jia̍t loh! Tōa châng koh tōa nâ-âu khang ê i, chi̍t ji̍p-mn̂g tio̍h chhan-chhiūⁿ beh kā kui-ê sé-saⁿ-keng chiⁿ kah tīⁿ- móa-móa. Koh in-ūi i chi̍t ji̍p-mn̂g tō ē khai-sí kap A-bú khai-káng, kui keng chhù tō chhiong-móa kok-chióng siaⁿ-im. He sī hēng-hok ē siaⁿ.
Gún kui-ke-kháu-á kám-chêng chiâⁿ hó, tiāⁿ-tiāⁿ tàu-tīn, tiāⁿ-tiāⁿ hō͘-siōng liân-lo̍k. A-bú tiāⁿ-tiāⁿ kóng A-pa siōng ài ta̍k-ke lóng liâm chò-hóe, tō chhin-chhiūⁿ bah-chàng-kōaⁿ kâng-khoán. M̄-nā lâng sī án-ne, liân iá-niau-á mā lâi goán tau, sî-kan chi̍t kú, mā ē piàn kah chiok un-sûn. Tiāⁿ-tiāⁿ tòe A-bú kha-chhng āu niau-niau-kiò, beh kiò lâng kā in bong, chhī in chia̍h-pn̄g.
Gún chi̍t-ke-kháu-á tio̍h hām chiah-ê niau-á chò-hóe seng-oa̍h, kòe chi̍t tōaⁿ lāu-jia̍t kún-kún, bí-lē ē sî-kan.
M̄-koh, in-ūi A-bú “pit-gia̍p-lí-hêng”, niau-á tōa-pn̄g-tiàm mā chha-put-to beh siu-tàⁿ–ah. Kan-taⁿ chhun Sau-siaⁿ kap N̂g-sió-tī ē lâi chia̍h-pn̄g. Jû-kim siōng ài A-bú ê Sau-siaⁿ mā cháu ah. Niau-á tōa-pn̄g-tiàm mā chèng-sek kiat-sok. Bû-siông, chiah-sī éng-oán bē-piàn–ê. Tō chhin-chhiūⁿ put-koán-sî lóng tī chhù ê A-má, kám ē ū chi̍t-kang bē koh kā góa chiap tiān-ōe? Hi-bāng góa ē-tàng kín o̍h ē-hiáu “oa̍h-tī-chit-sî”, hó-hó-á pá-ak sin-khu-piⁿ ê it-chhè.
