Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.請安裝NunitoPOJ字型，配合Firefox瀏覽器來讀
◎陳姿吟
阿妹仔自坐胎佇老母ê腹肚內，tō是一个真奇怪ê查某囡仔。伊ê三兄iáu細漢就肺癆bô–khì，伊ê老父王晉福是漢醫，救別人仝款肺癆ê囡仔，家己ê 後生卻是無法度好起來。晉福心內鬱卒，萬千ê感慨。阿妹仔ê老母陳月桃，為著後生肺癆死去，tiāⁿ-tiāⁿ流目屎。Sui-bóng按呢，晉福看著牽手閣再有身，感覺人生又閣有tām-po̍h-á希望，心情mā好起來。
阿妹仔出世臍帶kho͘ 頷頸三liàn，人講：「喔！這是菩薩來出世，掛三phoa̍h 珠。」
晉福對待牽手月桃，性地本底無偌好，若是晉福屎leh緊，to大聲叫月桃：「桃仔！屎桶kā我提來！」月桃閣khah無閒mā tio̍h chông。
有阿妹仔chìn-chêng兩、三冬，晉福kap月桃ê感情才漸漸有khah好，晉福會叫月桃kap伊做伙坐飯桌仔吃飯，以早mā是月桃煮三頓，不而過查某人月桃以前是佇灶跤食飯。晉福看tio̍h生一个查某囝，to kā伊號做「甜蜜」，這就是阿妹仔ê名。阿妹仔生做足古錐，目睭大大蕊，逐家攏叫伊「阿妹仔」。阿妹仔是1911年佇安平出世，彼个時陣日本人已經來，阿妹仔細漢ê時，有日本婦人人佇路邊看著伊，就講：「kha-óa-i–neh（かわいい）！」
晉福性地bái，不而過人bē-bái，伊仁慈閣憐憫。晉福做漢醫看tio̍h無錢m̄敢kā囡仔拆藥仔ê老母，就共伊講：「這藥仔妳先提轉去choaⁿ hō͘囡仔食，錢妳m̄免煩惱，以後手頭khah lēng才還我就好ah！」
阿妹仔ê老母月桃，1878年出世，十七歲（出世就一歲）嫁hō͘ ke伊四歲ê翁婿王晉福。月桃ê老母生月桃了後，月桃ê老父就破傷風過往，月桃ê老母閣嫁。月桃繼承ê土地kap財產去hō͘ in阿叔占去變賣，阿叔閣kā月桃chhōe hm̂-lâng（媒人），收晉福ê聘金，kā月桃嫁出去。
月桃ê目睭têng-sûn（重巡），目睭仁是色緻足淺ê咖啡色，人講月桃ê外媽是荷蘭人kā查某𡢃仔收作細姨生ê。
原本媒人為晉福講ê chhin-chiâⁿ對象有兩位，因為媒人講減伊四歲khah sù-phòe（四配）。晉福本底探聽ê是另外一个，m̄-koh媒人講對方決定去菜堂，外口人是講伊是去煞tio̍h，因為伊ê老父請人佇牆仔壁安八卦kap劍獅，劍獅目睭圓lìn-lìn，喙咬kiuh-siù（匕首），親像有深仇大恨。晉福外媽是對蜈蜞潭嫁過來安平，in後頭佇大目降社，拄仔好外家ê厝邊有人佇這个查某囡仔in 兜做粗𡢃，講是in兜小姐受人侮辱無成，不而過有去驚著，規日神神。In老父無來晉福ê藥鋪，是去別位拆加味逍遙散。
「佇chia講，佇chia soah，名節ê代誌，一般人攏bē講，是家己ê外孫leh探聽才講，恁mā m̄-thang閣講出去。」晉福ê外媽按呢講。晉福m̄死心，想beh閣請媒人去講看覓，因為晉福認為這bē當怪查某囡仔，若是別人欺負伊，m̄-nā m̄是查某囡仔m̄著，而且更加值得人同情。不而過媒人講對方心意已經決定，勸晉福講，月桃bē-bái，晉福就送定去hō͘月桃ê阿叔，親事就按呢定落來。Kám-kóng世間一切緣分chiâⁿ-si̍t是命運ê安排？
1895年，滿清戰敗參日本人和談，簽立《馬關條約》，賠錢以外，閣將台灣、澎湖kap遼東半島讓hō͘日本。彼一年，晉福kap月桃生大漢查某囝，就是阿妹仔ê大姊。因為是春天生ê，所以晉福共大漢查某囝號做「素春」。10月份，也是舊曆8、9月ê時陣，日軍來到台灣府城，台灣民主國第二共和ê總統劉永福黑旗軍戰敗，人leh傳，講紅嬰仔tio̍h tēⁿ死，若無，驚去hō͘日本人聽著嬰仔leh háu ê聲來刣人。彼个時陣，是素春ê阿母月桃m̄甘，才kā伊留無落來無tēⁿ死。素春漸漸大漢，1910年16歲，嫁hō͘陳明輝；閣過一冬久，生一個後生，不而過這个囡仔出世就破病，指頭仔縫攏爛，晉福看外孫病chiah-nī重，心內艱苦，chhōe漢醫ê古冊，內底攏無寫這款病，是嚴重ê絕症。彼時漢藥用土茯苓以外，晉福閣用足濟珍貴ê藥材，猶原無法度挽回外孫ê性命。這款病，人講「生檨仔」，就是黴毒（梅毒），是傳入來殖民地ê「帝國之毒」，足濟國ê殖民軍隊攏有。
人講「做婊趁，生瘡了。」家己ê查某囝素春是良家婦女，晉福想bē到囝婿全家tio̍h這款病？Khah講mā是囝婿明輝in阿舅，講欲chhōa明輝來府城學做衫，啥人知影那學裁縫那chhōa明輝去查某間khai查某！
「哪會有chiah濟黴毒？是按怎òe kah chiah-nī嚴重？」晉福遇著同業阿發仔，討論心內ê疑問。
「Tō-sī tòe殖民軍隊來ê啊！殖民帝國ê軍隊到佗位，病就thòaⁿ到佗位，聽講足𠢕òe人，因為影響軍力kap治療ê費用，日本人ê對策是對母國引進日本籍ê娼妓，服務in家己日本人，管理khah嚴，攏有leh檢查；台灣人出入ê私娼，khah無leh管；而且檢查ài掀衫仔看身軀，mā歹管理。日本政府佇台灣南部管理重點雖然佇公娼，其實私娼mā有。」阿發仔回答。
晉福ê外孫死了後，明輝kap素春無法度閣有囡仔，就去台南州立病院治療，用606這款藥仔注射。日本政府mā用足濟政策kap規定，希望傳染病會當控制落來。日本人tú來ê時，傳染病足嚴重，1896年總督府發布律令，指定鳥鼠仔症、Kho͘-le-lah（Cholera，霍亂）等八種ê法定傳染病，1901年台灣因為鳥鼠仔症死ê超過3000人，傳染病不止仔嚴重。1902年日本派鳥鼠仔症ê專家來台灣防疫，mā因為發現鳥鼠仔症是對虼蚤傳染–ê，鼓勵民間逐家來掠鳥鼠仔，加上1898年設立ê保甲法，十戶一甲，十甲一保；無掠鳥鼠處罰金、掠著鳥鼠有賞金，疫情才漸漸控制。 （待續）
延伸閱讀：【甘為霖小說獎】
