(請安裝Taigi Unicode字形，配合Firefox來讀)
李南衡
有人事先無作完善ê計畫，邊仔ê人看kah會替伊煩惱，問伊按呢敢會使得？伊應講：「時到時當，無米食番薯湯（Sî kàu sî tng, bô bí chia̍h han-chî thng.）」是講真正代誌發生才來拍算，那像時到無米、上無mā猶會當煮番薯湯來止飢。
台語講物件若有一字「番」字，咱tio̍h知影he m̄ 是正台灣土產ê，是ùi外國來ê，像講番仔火、番麥、番仔薑，「番」字攏讀作“hoan”，干單「番薯」tio̍h讀作“han”。古早台灣原住民ê主食之一是「芋仔」，荷蘭人、西班牙人殖民統治台灣才ùi爪哇、呂宋引進番薯來，明鄭時代mā ùi福建引進一寡。可能因為台灣像一條番薯、koh番薯會tàng佇任何環境生湠，真濟台灣人認同家己是「番薯仔」、講戰後才來台灣ê中國人是「芋仔」，認真想起來mā小可怪怪。
台灣平原無大，而且溪流短短，土質鹹，所以tio̍h開「埤」（人工水池）蓄水、開圳溝（人工溪流）來灌溉農田。佇日治時代猶未建設嘉南大圳進前，米糧無夠ê情況下，番薯是上好替代主食，因為無論偌呢bái ê土質都會tàng種番薯，而且番薯koh耐洘旱。日本殖民統治者發現番薯ê好處，積極改進番薯ê質kah量，1907年開始，台灣總督府農業試驗所徵集島內各番薯品種以外，mā ùi中國、日本、美國、南洋引進各品種來台灣栽培改良。1922年至44年，干單農業試驗所一個嘉義分所，tio̍h育成32種；1900至37年，全台灣番薯種植面積ùi 3萬9000公頃擴大到13萬9000公頃，每公頃收穫量ùi 5200公斤增加到1萬3000公斤，全台灣年產量ùi 2億公斤增加到17億公斤。
戰後1954年種植面積24萬公頃才大大超過日治時代、1966年每公頃收穫量1萬4700公斤超過日治時代。今仔日，生產量上濟ê「台農57號」（黃皮黃肉）秋作每公頃會tàng收穫4萬3000公斤，產量第2名ê「台農66號」（紅皮紅肉）每公頃會tàng收穫3萬公斤。台灣番薯主要ê產地是中南部。頂個月，咱水林教會用貨運寄3大布袋番薯來送阮大直教會，才知影：雲林縣水林番薯上好食，產量mā是台灣第一。
現代生活無論做啥物攏需要精密ê計畫，連thit-thô mā無例外，舉一個例來講，Bat去海外自助旅遊ê朋友一定知影tio̍h愛有周到ê計畫，若存「時到時當，無米食番薯湯」ê心態，佇海外特別是寒天時仔，因為公共交通工具接無好勢、抑是旅館攏客滿，會真慘！另一方面，咱台灣人以番薯來作主食，1945年佔番薯總產量4成，到1950年代變2成半，到1965年才chhun 19% niā-niā，當今應該無夠一成。番薯大部分the̍h去作飼量飼豬抑是加工製粉。時到無米，敢一定有番薯thang食？敢食會慣勢？Chit句台灣俗語話有可能會愈來愈少人講。
李南衡《那teh褪色的台灣俗語話》（1-2冊 )已經出版，歡迎來交關，做伙進步
