(請安裝Taigi Unicode字形，配合Firefox瀏覽器來讀)
作者：Hūi-bêng
佇台北，捷運系統是所有交通工具 ê 主角，到站了後才接公車亦是跤踏車，甚至是坐一節仔計程車就會使到位，是一个真完整 ê 交通網路。毋過佇菲律賓煞是無仝 ê 情形，頂擺介紹馬尼拉 ê 捷運系統，這擺就來介紹佇大街小巷攏會當看著 ê 交通工具。
頭一个對菲律賓上有印象 ê 就是吉普尼（Jeepney）矣！當美國閣咧統治菲律賓 ê 時，吉普尼是美國 ê 軍用車，毋過 1946 年菲律賓獨立了後，美國將這款車攏留佇菲律賓，後來煞演變做菲律賓非常重要 ê「公車」系統。
In 每一台攏有固定路線，彼條路線較有名 ê 路名、捷運抑是商場、學校，攏會寫佇車 ê 腹肚邊 kap 做一張細張 ê 牌仔掛佇車頭玻璃遐予坐車 ê 人看，而且伊無分段路，毋管是坐一站抑是坐到上尾站，攏是仝價數。佇 2010 年筆者頭一擺來菲律賓 ê 時，坐一擺 Jeepney 是 7 箍 peso，佇 2015 年 ê 時是 8 箍 peso，到這陣已經起價到 10 箍 peso 矣（差不多是 6 箍台票）。
另外一个 kap Jeepney 類型真相同 ê 是 UV Express Service，伊仝款攏有固定路線，毋過 kap Jeepney 上大 ê 無仝是，伊有冷氣而且閣有固定上、落車 ê 站，這款「有冷氣 ê Jeepney」佇逐工攏是熱天 ê 菲律賓來講，是一个真好 ê 選擇，毋過也因為有冷氣 ê 關係，伊 ê 價數是傳統 Jeepney ê 3～4 倍左右。
閣來就是毋管恁兜蹛佗位，伊攏有法度將你載到門跤口 ê 三輪車（tricycle 嘛會當號作 sidecar）因為伊輕巧閣方便，所以佇街仔路頂懸定定攏是看著 in 穿插佇路中央。伊就是一台 o͘-to͘-bái 邊仔接一个通載人客 ê 座位，通常一擺會當坐 3～4 位 ê 人。In 通常攏親像台灣 ê 計程車仝款，有固定排隊載人客 ê 所在，車廂會有編號，色水嘛會無仝，若是去 in 固定路線 ê 所在，就會公定 ê 價數，若是另外講地點个，這个時陣就會使 kap 司機講價，有時陣若是外地來 ê，有可能價數會較懸，這部分會使刣價看覓。
雖然以上這規種對菲律賓 ê 交通來講，是非常重要 ê 部分，毋過因為車型攏較舊矣，大部分閣是用柴油來走車，對菲律賓整體 ê 空氣汙染造成真大 ê 傷害，所以菲律賓政府決定佇 2016 年 ê 時陣自日本引進電動三輪車（E-trike）來汰換掉一寡仔較舊 ê tricycle，也因為伊是食電 ê 所以就會當馬上感受著降低空氣汙染 ê 效果。另外，這个 E-trike ê 車色是固定 ê 攏是白色，無親像其他 ê 車型會當有五花十色 ê 選擇，而且車型比傳統 ê tricycle 大真濟，一改會當坐 6～10 个人客，毋過型體亦是比 Jeepney 閣較細台，伊 ê 收費會比傳統 ê tricycle 較貴淡薄，差不多是 1～2 倍个價錢。
除了這四款以外，計程車嘛是非常重要 ê 一部分。傳統 ê 計程車司機有時陣無法度講英文，所以若是拄著這款 ê 計程車司機就親像鴨仔聽雷仝款，艱苦矣！毋過自從前幾年 UBER 入來菲律賓了後，對規个計程車系統產生真大 ê 改變。毋若會當佇網路頂懸叫車，車 kap 車行閣有連線，in 起跳 ê 價數嘛 kap 傳統 ê 計程車差無若濟，毋過若是拄著上、下班較無閒 ê 時陣，in 起跳 ê 價數就會較懸，若是人客認為這款價數合理，就會使繼續叫車，所以對坐車 ê 人客來講是一个非常安全閣便利 ê 交通工具。
但是 UBER 自 2018 年 4 月予 GRAB 合併了後就退出營業系統，這陣就是 GRAB 咧營業。這个 GRAB 毋若將 UBER ê 優點攏吸收以外，閣增加真濟利便 ê 項目，譬論講會使用信用卡付錢毋免提現金，也就是 kap 司機完全無需要有金錢 ê 問題，而且若是學生或者是老人攏會有優待。
GRAB 毋若只是單純會使叫車爾爾，閣有固定地點通予人客安全上、落車，這馬連叫外送 ê 訂單嘛攏會使接，有影真方便。另外這款 ê GRAB kap 佇台灣 UBER 上無仝 ê 所在是，菲律賓 ê GRAB 會使予原本已經咧駛計程車 ê 司機加入，這款 ê 合併模式成做講，若是有人叫車，伊會當隨收著通知去載；若是無人叫車，伊就會使自由佇路个走車等人客，這款 kap GRAB 合併 ê 計程車，佇窗仔邊會貼一張 GRAB ê 貼紙來表示，這攏是 GRAB kap UBER 毋仝 ê 所在。
總講一句，佇菲律賓 ê 交通工具，若親像每一个攏是主角，嘛攏有固定 ê 使用者，雖然佇路上看著伊 nǹg 過來 pháu 過去，實在有淡薄仔 ê 危險，毋過總是有法度將每一个人平安送到厝，這算起來也是一个真無簡單 ê 任務矣。
