(請安裝Taigi Unicode字形，配合Firefox瀏覽器來讀)
作者：胡沛晴 指導老師：吳蝦米
台灣最近不安定 Tâi-oân chòe-kīn put an-tēng
武漢肺炎湠真猛 Bú-hàn hì-iām thòaⁿ chin béng
電視新聞報無停 Tiān-sī sin-bûn pò bô thêng
按怎解決看眼前 Án-chóaⁿ kái-koat khòaⁿ gán-chêng
一級二級到三級 It-kip jī-kip kàu saⁿ-kip
疫情愈來愈危急 Ek-chêng lú lâi lú gûi-kip
心頭綴咧一直翕 Sim-thâu tòe leh it-ti̍t hip
逐工兩點就著急 Ta̍k-kang nn̄g-tiám tō tio̍h-kip
即時控制有難度 Chek-sî khòng-chè ū lân-tō
配合政策莫抹烏 Phòe-ha̍p chèng-hú mài boah-o͘
統計市場上恐怖 Thóng-kè chhī-tiûⁿ siōng khióng-pò͘
逐个分批菜蔬補 Ta̍k ê hun-phoe chhài-se pó͘
出門就愛掛喙罨 Chhut-mn̂g to̍h ài kòa chhùi-am
防疫面罩提來罨 Hông-e̍k bīn-tah the̍h lâi am
天氣翕熱喙罨澹 Thiⁿ-khì hip-joa̍h chhùi-am tâm
看著囡仔上毋甘 Khòaⁿ-tio̍h gín-á siōng m̄-kam
欲去市場愛登記 Beh khì chhī-tiûⁿ ài teng-kì
身分證件提來見 Sin-hūn chèng-kiāⁿ the̍h lâi kìⁿ
人客煞攏毋敢去 Lâng-kheh soah lóng m̄ káⁿ khì
外口買好就轉去 Gōa-kháu bé hó tō tńg–khì
毋通四界烏白踅 M̄-thang sì-kè o͘-pe̍h se̍h
去到店頭小等咧 Khì kàu tiàm-thâu sió-tán leh
代先體溫愛通過 Tāi-seng thé-un ài thong-kè
最後閣愛實聯制 Chòe-āu koh ài si̍t-liân chè
三級停課佇厝裡 Saⁿ-kip thêng-khò tī chhù–nh
學生學校袂當去 Ha̍k-seng ha̍k-hāu bē-tàng khì
線頂學習度時機 Sòaⁿ-téng ha̍k-si̍p tō͘ sî-ki
教室上課等何時 Kàu-sek siōng-khò tán hô-sî
聽講疫苗紲咧來 Thiaⁿ-kóng e̍k-biâu sòa leh lâi
鼓勵大家注看覓 Kó͘-lē tāi-ke chù khòaⁿ-māi
目前順序已經排 Bo̍k-chiân sūn-sī í-keng pâi
我到何時才會使 Góa kàu hô-sî chiah ē-sái
提升家己免疫力 Thê-seng ka-kī bián-e̍k-la̍t
早暗運動愛設法 Chá-àm ūn-tōng ài siat-hoat
食好睏好莫齷齪 Chia̍h hó khùn hó mài ak-chak
袂 hông 傳染有把握 Bē hông thoân-jiám ū pá-ak
醫護人員足感心 I-hō͘ jîn-oân chiok kám-sim
只要逐个下決心 Chí-iàu ta̍k ê hē koat-sim
大家一定愛仝心 Tāi-ke it-tēng ài kāng-sim
我對台灣有信心 Góa tùi Tâi-oân ū sìn-sim
