◎ 高嘉徽
阮tau chū細漢就是 chi̍t ê 拜拜ê家庭，só͘-tì，我 mā自然 tòe爸母拜，m̄-koh，in chiok有環保 ê 意識，就是會燒香bōe燒金錢。雖罔我tòe teh 拜， tī我tha̍k中學 ê 時，心內出現一種聲音，就是阮 só͘ 拜ê神敢真正會kā我保庇？因為我 tha̍k中學ê時，hō͘同學霸凌，嚴重影響我ê 心靈，hit時，我無hoat-tō͘接受家己kap環境。
我真幸運，佇大學一年ê時，熟似教會 ê 姊妹phōaⁿ。In通過耶穌ê話來 kā 我講上帝疼世間人， 主連罪人mā kā接納kap疼惜。阮大學內有福音ê社團，兄弟姊妹會招chiok-chē福音朋友kap教友來參加。
佇我接受福音ê時，我真喜樂！因為主就佇咱ê心內，讀主ê話，佇靈裡祈禱，伊就會kā咱看顧！咱 lóng是普通人，只要簡單ê祈禱kap唱詩歌，唱leh唱leh ，唱kah流目屎，che苦ê mā變做甜ê滋味！咱要呼求主耶穌伊ê名，伊就會保守咱ê心。
我真感謝佇大學時期tú著這位寶貝ê救主，hō͘ 我ê人生親像重新活起來，有動力繼續行落去，hō͘我佇面對身體病痛ê 時袂驚，有勇氣！我確信，主會保守咱，向望未來，主會繼續 kah我同在！
