早前ê台灣人認為，貓日時siān-siān、暝時有精神，而且tī暗bong-bong ê所在，貓ê目睭那親像會發出黃色ê光，莫怪伊有法度tī黑暗中掠貓鼠，致使hō͘人認為伊是屬「陰」ê；甚至有傳說講，若有親人死去一定tio̍h「守靈」，萬不幸貓若ùi屍體頂面跳過，身屍會自動徛起來行路；mā有人講貓有9條命，死了tio̍h用細條索仔kā吊tī樹頭，七七四十九工風吹日曝雨沃了變焦ê屍體乾，伊ê魂魄四散就bē chhōe人討命。所以才有「死貓吊樹頭（sí niau tiàu chhiū-thâu）」chit句俗語話kah民間風俗。60年前阮作囝仔ê時陣，每遍去溪裡泅水一定tio̍h經過林投林，行過ê時定定都會看tio̍h有死貓仔吊tī林投樹頭，腳步自然會加真緊，m̄ 是驚死貓ê臭味，實在是驚吊tī樹頭ê死貓忽然活起來jek倚來。
台灣人迷信狗hông拍kah死死昏昏去，胸坎若拄tio̍h土、鼻若鼻tio̍h土氣，tio̍h會koh醒起來，若真正死去，埋入土裡會變成妖怪。若投入水中出在伊去漂流，狗才會有機會往生轉世做人。所以才有「死狗放水流（sí káu pàng chúi lâu）」chit句俗語話kah民間風俗。
20年前，我tī一間社區大學教「台語ê美」課程，我問同學，台灣俗語話講：「死貓吊樹頭，死狗放水流，CD neh？」全班同學無人應答。我講：「CD tio̍h the̍h來聽。」同學罵我唬人！In講，阮想講老師是teh問「死豬」咧！啥人想會到21世紀13年代ê中國，竟然koh有死豬放水流ê代誌發生！
今年3月初，tī中國上海市ê黃浦江hô͘ tio̍h 900外隻死豬仔子，江裡ê死豬仔子一工比一工khah濟，到3月12已經hô͘起來5900外隻，續落去每工hô͘起來ê死豬仔子攏無小可減少落來，到3月20下晡3點為止，hô͘起來ê死豬仔子已經有1萬零395隻，上海政府soah m̄ 敢koh公布死豬仔子ê數目。有一部分上海人飲ê自來水是取用黃浦江ê水，上海人煩惱每工飲chit款浸過萬外隻死豬仔子ê水，敢無問題？Khah嚴重ê是，到taⁿ猶無法度查出來，死豬仔子是tùi叼位來ê。
雖然tī台灣庄腳所在罕罕á猶會看tio̍h吊tī樹頭ê死貓，抑是tòe溪水流ê死狗。但是大部分台灣人飼貓仔狗仔作寵物惜命命，飼了死去會足m̄ 甘、會傷心，in會去chhōe民間經營ê「寵物火葬場」處理，集體燒ê一隻貓抑是狗大約tio̍h 1500箍，若是個別燒koh beh拾骨灰ê一隻tio̍h 5000箍，按呢m̄ -nā有kā寵物死後作sù-sī ê處理、hō͘寵物死後有尊嚴，處理方式mā加真清氣。相信免幾年，你若kā台灣ê少年人講：「死貓吊樹頭，死狗放水流。」in可能m̄ 知你teh講啥，你若解說hō͘聽，in真有可能會罵講：「恁那會hiah呢無衛生！」
