Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
作者◉Basil of Caesarea
台譯◉Iû Nái-kî
7
“Góa kiám ū tùi lâng bô kong-pêⁿ?” Lí kóng, “Góa pó-liû sio̍k tī góa ê mi̍h kám m̄ tio̍h?” Chhiáⁿ kā góa kóng, sím-mi̍h sī sio̍k lí ê? Lí chhut-sì ê sî kiám ū tòa mi̍h-kiāⁿ lâi sè-kan? Lí tùi toh-ūi tit-tio̍h? Châi-chú só͘ chòe–ê chiū chhin-chhiūⁿ chi̍t ê lâng chē tī hì-īⁿ ê tē-it-pâi, i bô-ài hō͘ pat-lâng jip–lâi, án-ni i chiū ōe-tàng ka-kī hióng-siū goân-pún sio̍k tī tāi-ke ê kiōng-tông lī-ek. Châi-chú lia̍h-tiâu chèng-lâng ê mi̍h, tī kî-tha ê lâng iáu-bōe ū ki-hōe ê sî seng chhut-chhiú, kun-kù iu-sian bé-bē ê sūn-sū lâi soan-kò i ê só͘-iú-koân. Lán nā kan-taⁿ theh ka-kī só͘ su-iàu ê mi̍h, kā chhun ê chu-goân lâu hō͘ pat-lâng, sè-kan chiū bōe ū sàn-hiong-lâng, mā bōe ū châi-chú. Bô lâng ōe koh ū khiàm-khoeh.
Lí chhiah-sin-lō͘-thé lâi chhut-sì, mā án-ni kui tī thô͘-hún. Lí ê châi-hù sī tùi toh-ūi lâi? Lí nā kóng só͘ tit-tio̍h–ê lóng sī chhàu-tú-khám, lí chiū sī teh hó͘-jīn Siōng Chú ê chûn-chāi. In-ūi lí m̄-bat hit-ê chhòng-chō lí ê Chú, bōe kám-siā I só͘ siúⁿ-sù–ê. Lí nā sêng-jīn it-chhè lóng sī Siōng Chú ê siúⁿ-sù, án-ni, lí chiap-siū un-tián ê bo̍k-te̍k sī sím-mi̍h? Kám kóng Siōng Chú ê hun-phòe sī bô kong-pêⁿ ê? Ūi-sím-mi̍h lí hó-gia̍h, pat-lâng sàn-chhiah? Ūi-sím-mi̍h ōe kóng lí sī hó koh tiong-si̍t ê koán-ke? Koh kóng sàn-hiong-lâng jím-siū khó͘-lān ōe tit o-ló? Tān-sī lí kā it-chhè lóng hē tī tham-loân ê lak-tē-á–ni̍h, kiò-sī ka-kī bô pháiⁿ khoán-thāi lâng. Khêng-si̍t, lí í-keng pak-siah pat-lâng ê chu-goân.
Siáng sī tham-loân–ê? Sī í-keng tit-tio̍h só͘ su-iàu ê soah bô móa-chiok ê lâng. Siáng sī kiông-tō? Sī chiong sio̍k tī tāi-ke ê mi̍h lia̍h-tiâu tī ka-kī ê chhiú-thâu ê lâng. Lí kiám m̄-sī kiông-tō? Lí chòe koán-ke kiám bô kā só͘ úi-thok ê mi̍h hē tī ka-kī ê lak-tē-á–ni̍h? Chhiúⁿ pat-lâng ê saⁿ–ê kiám m̄-sī chha̍t? Ū lêng-le̍k the̍h saⁿ hō͘ lâng chhēng m̄-koh bô ài án-ni chòe ê lâng kiám m̄-sī kāng-khoán? Lí lâu–lo̍h-lâi ê mī-pau tio̍h hō͘ iau-gō ê lâng. Lí siu khí–lâi ê saⁿ tio̍h hō͘ bô saⁿ thang chhēng ê lâng. Lí bô teh chhēng ê ê-á mài khǹg hō͘ pháiⁿ, tio̍h hō͘ bô ê-á ê lâng chhēng. Lí tâi tī tē–ni̍h ê gîn-á tio̍h hō͘ ū-su-iàu ê lâng. Lí bô pang-chān hiah-ê eng-kai tit-tio̍h pang-chān ê lâng, lí kan-hoān bô kong-gī ê chōe.
8
“Chiah-ê ōe lóng chin hó,” chóng–sī lí kian-chhî kóng, “tān-sī kim-á iáu-sī khah hó.” Che chiū chhin-chhiūⁿ hiah ê chin ài kap hòng-chhiòng–ê tâm-lūn sûn-kiat ê lâng sio-siâng: in teh chek-pī bô tō-tek ê sū, hō͘ in chek-pī ê lâng siāng-sî in-ūi in ê thê-chhíⁿ lâi hām-lo̍h io̍k-bōng. Góa beh cháiⁿ-iūⁿ hō͘ lí lí-kái sàn-hiong-lâng ê khó͘-chhó͘, lí chiah ē bêng-pe̍k chek-chū châi-hù ê hêng-ûi só͘ tòa–lâi ê pi-kio̍k? Tī sím-phòaⁿ ê ji̍t thiaⁿ-tio̍h chiah ê ōe ē chhiong-móa ǹg-bāng: “Lâi, lín chiah-ê siū góa ê Pē chiok-hok–ê, lâi sêng-siū tùi chhòng-chō ú-tiū í-lâi chiū ūi-tio̍h lín chún-pī ê kok-tō͘. In-ūi góa iau, lín ū hō͘ góa chia̍h; góa chhùi-ta, lín ū hō͘ góa lim; góa choh chhut-gōa-lâng, lín ū kā góa siu-liû; góa chhiah-sin-lō͘-thé, lín ū hō͘ góa chhēng.” Tān-sī tng lí thiaⁿ-tio̍h sóa–lo̍h-lâi ê sím-phòaⁿ ê sî, lí ōe ngia̍uh-ngia̍uh-chhoah, kōaⁿ chha̍p-chha̍p-tih, hō͘ o͘-àm ûi-lûi: “Lín chiah-ê siū chiù-chó͘ ê lâng, lī-khui góa, ji̍p-khì ūi-tio̍h Mô͘-kúi kap i ê sù-chiá só͘ chún-pī éng-oán ê hé–ni̍h. In-ūi góa iau, lín bô hō͘ góa chia̍h; góa chhùi-ta, lín bô hō͘ góa lim; góa choh chhut-gōa-lâng, lín bô kā góa siu-liû; góa chhiah-sin-lō͘-thé, lín bô hō͘ góa chhēng.” Keng-bûn só͘ chí-khòng–ê m̄-sī thau-the̍h mi̍h-kiāⁿ ê lâng, sī hiah-ê bô ài kap pat-lâng hun-hióng ê lâng.
Chiah-ê ōe sī tùi lí ū lí-ek–ê. Lí nā sūn-thàn, chiū ū bí-hó ê èng-ún teh tán-thāi lí; lí nā bô beh sūn-thàn, chiū ū hêng-hoa̍t tī lí ê bīn-chêng teh tng lí. Góa ǹg-bāng lí m̄-thang chhin-chhiūⁿ châi-chú. Án-ni lí ê châi-hù ōe chiâⁿ-chòe lí ê sio̍k-kim, lí thang ǹg bí-hó ê thian-tông lâi pháu-cháu. Hō͘ un-tián ho͘-tiàu lán ji̍p I ê kok–ê, goān êng-kng kap koân-pèng kui tī I, ti̍t-kàu éng-oán, A-men. (Choân-bûn kiat-sok)
延伸閱讀：Beh thiah ka-kī ê chhng-khò͘
