3773期專題企劃
走入歷史 賴永祥的佳美腳蹤1-4｜願接得下他的棒子 繼續向前方奔跑
｜總編踏話頭｜
賴永祥長老史料庫，這是任何一個曾經上網查找教會故事材料的人，都不可能跳過的名字。他就像一座大山，指引來人的方向，也滋養每一個尋找前人腳跡的研究者。一個時代的結束，也是另一個時代的開始，祈願賴永祥長老的佳美腳蹤，引領後輩棒棒接力，開創新局。
總編輯｜陳逸凡
長老教會的寶藏
用愛催生史料庫
【特稿／林俊育】慟聞敬愛ê良師益友賴永祥長老今á日（6月7日）蒙主恩召，感念伊對台語文事工出錢、出力koh出智慧。真m̄甘！願主親自安慰！
若講tio̍h「感恩」，我第一ài感謝ê是上主引chhōa帶領我來kah賴永祥長老tòa厝邊，thang不時拜候伊，向伊請益；tī伊ê指導下完全投入台語文事工。
1990年，我搬來tòa 波士頓ê市郊，頭一工去波士頓台灣基督教會禮拜to̍h kah賴長老熟sāi，伊人真和諧可親；伊一知影我是台北市雙連教會ê會友，to̍h問我有關教會ê tāichì。我提起雙連教會ê盲人事工，伊隨安排ài我tī長執會報告，thang鼓舞教會從事社區關懷ê事工。
過無gōa久伊to̍h邀請我去in tau做客，伊一見面to̍h送我伊編著ê《教會史話》第一緝（1990.4，台灣教會公報社）。我一掀to̍h掀tio̍h第211頁，出現「教會史話#73，盲人事工ê發軔」；ná ē hiah tú好！我一讀chiah知甘為霖牧師tī 1884年to̍h著手台灣ê盲人事工。我感覺真奇怪，台灣基督長老教會ná ē tī甘為霖以後無人繼續做盲人事工，一直到1989年我tī雙連教會服務委員會推動盲人事工講是頭一个。我真hanbān寫文章，m̄ koh我寫盲人事工投稿《台灣教會公報》，m̄ bat有退稿；後來認bat hit當時做總編輯ê盧俊義牧師，我問伊我ê文章ta̍k篇lóng刊出ê原因，伊講全台灣kantaⁿ你teh寫關心盲人ê文章。Tio̍h感謝賴長老ê指導，hō͘我ê文筆有大進步。
我2000年投入台語文運動了後，因為台文聖經ê上網來kah信望愛網站合作，架設「台語信望愛」、「客語信望愛」kah「思羅安信望愛」（台語點字）網站。賴長老看chiahê網站to̍h真意愛kā伊收集ê文獻架設網站，伊to̍h使用我催生ê「信望愛台語客語輸入法」（https://taigi.fhl.net/TaigiIME/）繼續寫文章，koh有李秀卿牧師娘（林皙陽牧師）ê幫贊，「賴永祥長老史料庫」（http://laijohn.com/）網站就ánne成做台灣基督長老教會ê寶藏。
我一直意愛採用咱台灣普遍腔（以高雄市為中心ê中南部腔）ê台文聖經，tī台語信望愛網站teh進行，tú好蕭清芬牧師退休ê感恩禮拜中講：「我一世人lóng teh用外國話（廈門話ê《巴克禮白話字聖經》）聖經，taⁿ退休了後beh來出版人台灣話ê聖經。」阮兩人「一拍即合」to̍h決定beh出版台文聖經。賴長老to̍h建議成立全民台語聖經協會來進行，《全民台語聖經》漢羅版kah白話字版就ánne順利出版「台灣基督長老教會設教150週年記念版」，這tio̍h感謝賴長老ê出錢、出力koh出智慧。
我有開發台文漢羅Ruby版（漢字頂面加註白話字）ê軟體，我kā馬太福音ê漢羅Ruby版印出來請賴長老鑑定。有一工伊khà電話講伊有一位非基督徒ê朋友講真kah意漢羅Ruby版，問講kám有無上帝ê作品。賴長老to̍h講咱來出版《聖經ê愛情+智慧文學：雅歌kah箴言》（2014年11月，全民台語聖經協會），因為《雅歌》內底無上帝，讀者thang tùi《雅歌》ê愛情文學進入《箴言》ê智慧文學。我真佩服賴長老ê超然智慧。
賴長老真意愛台語文，tī伊ê指導下，我有kā《陳夫人》（以賴長老娘ê父母做model ê日文小說）翻譯做台語。台灣教會公報社方嵐亭社長2017年來波士頓拜訪賴長老ê時，伊知影chit本出名ê台語文學作品，to̍h要求來hō͘公報社出版（2018年10月）。
續落來，賴長老koh叫我翻譯伊ê親小弟盧焜熙博士著ê日文版《主ê祈禱文》翻譯做台文（2019年4月，台灣教會公報社）。Koh有kā日文小說《アルトーロの贈り物》翻譯做台文版《Arturo ê禮物》（2022年8月，前衛出版社）。
Tī馬偕牧師來台宣教150週年ê時，賴長老講馬偕原著ê “From Far Formosa” 已經絕版，中文譯本真chē，若是出版台文譯本kah英文對照版來做記念版to̍h真有意義。感謝台灣教會公報社tī 2022年8月出版《馬偕在台灣記事》（From Far Formosa）。
Tī賴長老ê指導下來做上主ê工是我siōng大ê榮幸。伊jú來jú有年歲，體力有khah衰退，m̄ koh記持iáu真好，kah伊開講猶原ē tàng得tio̍h真chē智慧。我to̍h tiāⁿtiāⁿ chhōe機會帶伊愛食ê Daikanyama日本料理去in tau同坐桌，領受上主賞賜hō͘ 阮ê做伙機會。無意料tio̍h 2月初四hit pái是阮最後ê同坐桌，總是我ē永遠siàu念賴永祥長老。（作者為台語信望愛網站志工）
