Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
作者◎William Barclay
台譯◎陳惠雅
基督教傳到印度ê過程真神祕，總是咱ē-tàng知影基督教佇印度有真久長ê歷史。佇馬拉波（Mailapore, Mylapore）ê聖多馬山有一个用石頭做ê十字架，這个十字架頂懸有用中古波斯語Pahlavi刻 ê pi-bûn（碑文）：
「這tō是佇十字架頂受處罰koh受痛苦ê，伊是真ê基督，獨一ê神，完美ê chhōa-lō͘-ê。」
佇聖多馬山ê十字架可能是第八世紀ê物件。佇果塔延（Kottayam）ê特拉凡可（Travancore）發現ê十字架約略是第十世紀做ê。
印度koh有另外一派ê基督教，代表ê人物是有佇尼西亞會議簽名ê波斯ê約翰（John of Persia）。波斯ê約翰是全波斯kah大印度ê主教。這是一个真闊ê教區，「印度」tō是這个教區ê名。根據盎格魯-撒克遜編年史（Anglo-Saxon Chronicle），阿佛烈王（King Alfred）佇主後883年派西格荷（Sighelm）kah埃瑟斯坦（Athelstan）載米糧kah食物去羅馬賑濟，ùi hia koh去印度、去多馬kah聖巴多羅買。M̄-koh，siōng有價值ê證據是科斯馬士（Cosmas Indicopleustes）ê《全基督教地形學》（The Universal Christian Topography），科斯馬士佇第六世紀初bat去印度冒險，佇冊內面，伊講伊有發現基督徒，佇出產胡椒ê馬拉巴（Malabar）有一个教會，koh講孟買（Bombay）山崙ê卡里亞拿（Caliana）有一个主教手頭有波斯ê委任書。這是印度佇主後500年就已經有基督徒ê證據。
▍多馬行傳ê多馬 ▍
佇次經內底siōng趣味ê行傳是多馬行傳（Acts of Thomas），講多馬án-chóaⁿ受差遣去印度，án-chóaⁿ佇hia做工。故事ê大概是án-ne：
使徒佇耶路撒冷會面ê日子beh到，in想tio̍h耶穌bat命令in去四界做見證，直到地極（使徒行傳1章8節）。In kā世界分做無仝區域，抽khau-á決定siáng應該去tó位。多馬tio̍h負責印度ê工課，m̄-koh多馬無想欲去，伊講家己ê身體lám，bē堪得遠徒旅行，koh講伊家己無才能。「我是希伯來人，chóaⁿ-thang佇印度人ê中間ǹg in宣講真理？」Hit暗，耶穌ǹg多馬顯現，kā伊講：「多馬，免驚！你去印度傳福音，我ê恩典kah你同在。」多馬猶原m̄願，應講：「主啊！無論祢差我去tó位lóng ē-sái，m̄-koh若是印度，我tō m̄去。」
Hit時，有一个ùi印度來耶路撒冷ê生理人號做阿巴拈士（Abbanes），伊是國王君達弗洛斯（Gundaphorus）派來ê，beh chhōe一个功夫好ê木工師傅。這時，耶穌出現tī市場，刁工tn̄g-tio̍h阿巴拈士：「你beh買一个做木ê，tio̍h無？」阿巴拈士回答：「無錯！」耶穌用指頭仔指多馬，kā阿巴拈士講：「我有一个奴才是做木ê，我想beh kā伊賣出去。」Tō án-ne，in隨時立約，約定三公升ê銀（多馬iáu-koh m̄知這層代誌）。耶穌chhōa多馬來，kā伊交hō͘阿巴拈士。阿巴拈士問多馬：「伊敢是你ê主人？」多馬回答：「伊的確是。」阿巴拈士koh對多馬講：「我已經ùi伊hia kā你買lo̍h來ah。」多馬恬恬無講話。隔tńg工，多馬透早起來，耶穌koh對伊顯現，多馬講：「主啊，我已經決定，無論祢ài我去tō位，我lóng願意照祢ê意思來行。」多馬tō tòe阿巴拈士去印度。
In到印度ê時，阿巴拈士問多馬會曉做啥物？多馬回答：「關係木工，我會曉做犁、牛擔、趕牛ê刺棍、船、船槳、chûn-ûi（船桅）、tiàu-lián-á（吊輪車）。關係石頭，我會曉做柱kah神廟，我ē-sái起造國王ê王宮。」阿巴拈士非常歡喜，因為這拄好是國王需要ê人才。君達弗洛斯派多馬去起造王宮。多馬選擇一个有樹林kah水ê所在， kā國王講伊kā王宮趕緊起造起來，tō開始用蘆葦kah量器做設計。「伊kā門設佇日頭出來ê方向，窗仔門ǹg西迎風，烘麭ê房間tī南面，水道tō ǹg北部流。」國王hō͘多馬充足ê金錢kah米糧，m̄-koh多馬無kā錢開費tī建造王宮，多馬四界走傱，去逐鄉鎮傳講福音，用錢銀賑濟散赤、欠用ê人，koh幫贊苦難ê人。國王叫人傳話，欲問多馬講王宮起造kah啥物程度？多馬應講：「厝頂已經起好ah！」事實是，王宮猶袂開工，錢已經用了了ah。多馬ǹg主祈禱：「主啊！祢暫時ê死，hō͘我通永遠踮佇祢內面，祢kā我賣掉，祢通過我，tháu放濟濟人，hō͘人得tio̍h自由，我欲為tio̍h一切來感謝祢。」多馬m̄-bat閃避教導、傳福音抑是救濟艱苦人ê代誌，伊lóng對人講：「這是主欲hō͘你ê，伊賜hō͘每一个人食物，伊養育孤兒、看顧寡婦，hō͘苦難中ê人得tio̍h安慰kah向望。」
鴨卵較密嘛有縫。有人走去kā國王講多馬根本tō無teh起王宮，m̄-koh hia-ê報馬仔mā承認，多馬實在是一个聖人。「伊時常禁食祈禱，kan-taⁿ食麭kah鹽，啉ê是水，規年冬穿一領衫。伊m̄-nā無接受任何人ê物件，反tńg kā家己所有ê一切lóng分hō͘別人。」
時間到ah，國王beh看多馬起ê王宮。多馬講：「你chit-má無法度看tio̍h，ài等到這世人過去chiah看會tio̍h。」國王聽了真受氣，命令人kā多馬關入監，下令kā多馬kap阿巴拈士這兩人處死。多馬tō tī監獄內等死。
君達弗洛斯王有一个兄弟叫做葛德，聽tio̍h多馬所做ê代誌，氣kah破病強beh死去。Beh死進前，伊要求君達弗洛斯王咒誓，ài活剝多馬ê皮，chiah koh kā燒死。葛德死了後到天頂，天使chhōa伊去看tòa ê所在，問伊有佮意無？In行到一間真氣派ê王宮頭前，葛德講伊向望tòa tī這間偉大ê王宮內面，準講是內底siōng樸素ê房間，伊mā感覺真滿足！M̄-koh天使講hit王宮已經hông tiāⁿ去ah，「He是基督徒為你ê兄弟起造ê。」葛德明白一切，伊懇求天使容允伊koh tńg去人間，hō͘伊有時間kā代誌講hō͘君達弗洛斯聽。
葛德tńg來人間了後，隨時要求君達弗洛斯kā天頂ê宮殿賣hō͘伊，m̄-koh君達弗洛斯聽無伊leh講啥。葛德tō將伊tī天頂看tio̍h宮殿ê代誌解說hō͘伊聽。這時君達弗洛斯知影，多馬ê所做是leh為伊佇天頂備辦所在。君達弗洛斯tō緊叫人kā多馬放出來，接受多馬ê洗禮，成做熱心ê基督徒。
這是多馬佇印度ê傳奇故事，故事koh講，多馬ê遺體hŏng徙去伊德沙（Edessa），佇hia有一間用多馬做名ê紀念教會。
▍結論 ▍
真濟學者講，多馬佇印度ê故事不過是一个傳奇ê故事爾爾，in講hit个對印度教會有大貢獻ê多馬，原底是一个景教（Nestorian）ê宣教師，m̄是使徒。羅褒辛格（Robert Sinker）tī《基督教古蹟辭典》（Dictionary of Christian Antiquities）內面寫講：「當然，咱ē-sài凊彩kā這个傳奇故事當做是真實歷史，mā ē-sài ka看做是無影無跡ê代誌，雖然後壁ê講法有一點仔馬馬虎虎，m̄-koh比頭前ê講法koh khah有道理。」雖罔講咱若kā多馬佇印度ê傳奇故事khì-sak無當做事實，hō͘咱感覺真可惜，m̄-koh，咱ē-sái相信遮个傳說對多馬ê人生kah性格ê描寫是確實ê。
無一个聖徒比多馬所承受ê誤解koh-khah大！多馬ê反應拄開始是m̄聽mā m̄信，而且hō͘伊ê任務定定lóng真oh-tit hō͘人接受，對佇伊，好消息mā時常是無可能ê代誌，m̄-koh，實際ê情形是，多馬ê困難反tńg hō͘伊ê信心koh khah堅強kah火熱。耶穌顯現以外，無啥物代誌ē-tàng hō͘伊tháu開心肝頭ê憢疑。多馬所發現ê —— mā是每一个基督徒應該發現ê，tō是：對伊家己，萬項代誌lóng ká-ná無可能，m̄-koh對佇上帝，啥物代誌lóng有可能！ (全文完)
