(請安裝Taigi Unicode字形，配合Firefox瀏覽器來讀)
作者：陳柏壽
昨昏（2019年7月13日）為崑南牧師做葬式轉來，心情真餒志。一禮拜前看伊，佇門口伊 ê 查某囝叫講「陳牧師來看你」，伊佇眠床頂 toh 講：「我知啦！聽著伊 ê 聲 toh 知是伊啦！」我牽著伊 ê 手祈禱，伊用二支手 kā 我 ê 手 moh 條條，毋放我去。伊可能知影這是最後一擺我 kap 伊做伙祈禱。
Chit-má 我確信知影，伊是佇上帝身邊，離開十幾年巴金森病 ê 艱苦，離開牧會 50 冬 ê 世間 ê 風湧，離開彼個「海水嘩嘩哮抬湧」，離開彼個「山搖 chhoah 變遷地動」ê 世界（詩篇46）。Chit-má 伊蹛佇遐，是蹛佇「青翠 ê 草埔 kap 安靜 ê 水邊」（詩篇23）。伊佇上帝 ê 身邊，是一個安心 kap 安息 ê 世界。
雖然是按呢講，佇西雅圖十幾年中間，自從伊身軀開始衰弱，行動開始袂自由，講話開始不斷重複 ê 時，我發現伊漸漸開始進入伊家己 ê 世界。我知影伊 ê 思考猶真清楚，但是伊無法度自由表達，我想這是伊最痛苦 ê 所在。伊進入佇人群中間，但是閣無屬佇人群。人無認同伊 ê 獨立思想 kap 意見，一切心思念頭只有會當囥佇心內，上深 ê 所在。這世間迫伊生活佇孤單無助 ê 生命。
主耶穌初出傳道 ê 時，伊給咱講：「……伊有差我 kā 受掠 ê 人講，in 會得 tháu 放， kā chhiⁿ-mî ê 講，in 會得 thio̍h koh 光，來 tháu 放受壓制 ê 人。」（路加福音4章18b節）但是遮個情況，無發生佇崑南牧師 ê 身上。巴金森病 ê 惡魔，繼續掠牢伊，繼續壓制伊，壓制到遮爾久長。
路加福音 5 章寫著學生佇海邊掠魚，掠規暗掠無魚，耶穌上 in ê 船，叫學生 kô 到水 khah 深 ê 所在落網。水深所在表示光線 khah 無，目睭看袂清 ê 所在。咱 ê 人生常常著去彼個 khah 深 ê 所在，彼個陰陰暗暗 ê 所在。咱 ê 人生毋是常常佇日頭腳。耶穌叫咱著去拋網去 khah 深 ê 所在，佇遐才掠有魚，意思是講咱佇彼個閣深、閣陰暗、霧霧無明 ê 所在， khah 會看著真正 ê 人生。彼個所在就是咱靈魂欲去 ê 祖家，佇 hia 有性命 ê 本質。
耶穌閣活了後佇學生面前、佇日頭腳清天白日 ê 中間，上天。學生頭殼抬高高，結果干單看著耶穌升去天頂，看著 ê 只是藍色 ê 天 kap 白色 ê 雲。佇彼個所在，kap 深深 ê 大海仝款，甚物攏無 khoàiⁿ，但是 hia 就是性命 ê 本源。
咱 ê 上帝安排互咱 ê 性命 kap 咱 ê 靈魂，實在就是按呢，咱 khah 按怎看就是看攏無。上帝本來 toh 是無愛咱看著家己未來咱 ê 性命 kap 靈魂。佇彼個藍色 ê 深海 kap 藍天白雲 ê 天空，甚物攏無 khoàiⁿ ê 所在，實在就是咱信耶穌 ê 人一定著相信 ê 所在。「信就是所 ǹg 望 ê 事 ê 實在，kap 未看見 ê 事 ê 憑準。」（希伯來書11章1節）
黃昏 ê 西雅圖天空，風微微仔吹，天頂淡淡 ê 白雲咧飛往故鄉 ê 台灣，故鄉 ê 一山一水，東後寮 ê 老教會，攏佇崑南牧師心中。故鄉 ê 獨立出頭天 ê 意念，攏時時留佇牧師 ê 心懷中。伊佇天頂咧祈禱，咧祝福，咧看顧咱。
