台語小說《灶雞仔》 府城台語作家陳正雄

(請安裝Taigi Unicode字形,配合Firefox瀏覽器來讀)

作者:杜信龍

咱tī 2014年熟 sāi chiâⁿ 濟台語人,he 是正雄兄用台文筆會名義佇葉石濤紀念館開袂少台語講座,咱才有這機會 se̍k-sāi 真濟前輩。Mā 因為 án-ni,咱佇台語 chit 條路一開始行起來無 hiah 孤單。

正雄兄人重心思,重感情。總–是,有時 tiāⁿ-tiāⁿ 放袂開,soah 家己激氣家己,是苦命詩人。這話是咱相信有某種交陪才敢講。

向望伊心情 khah tháu–leh,詩人平常時講話,免帶詩意,有話就講,m̄-thang 向望別人有詩情 thang 理解對方 ê 心情 kap 想法,意象留予詩就好。這話 mā 是我想欲 kā 濟濟 se̍k-sāi ê 台文有志講–ê。

正雄寫 ê 詩不時 leh 著 獎,結構能力是咱做袂到–ê,非常適合想欲寫詩 ê 人來讀,做見本。Nā 有人問,敢會使紹介幾本寫台語詩 ê 冊,我絕對先 kéng 正雄兄 ê 詩。Nā 冊 oh chhōe oh 買,這 to̍h 看機緣 ah。因為早期真濟台語作家 lóng 是 óa 靠地方政府來出冊,出冊少,通路 mā 相對 khah 狹。

目前伊出 ê 詩集分二大類,一大類是寫家己 ê 體會,一大類是寫地誌。伊上好 ê 詩 lóng iáu-bōe 出。伊捌 kā 咱講過,未來準備 koh 出二本詩集。一本猶原是家己人生 ê 體會,另一本就是 kā 過去所有著等 ê 詩集做一本。咱做一个朋友、後輩 kap 讀者,心肝頭向望伊早日新冊會當緊來出世。

M̄-nā 寫詩,正雄兄 koh 真 gâu 寫小說,最近出一本短篇小說集,內底10篇著獎 ê 小說,這有影是咱台語文學 ê 寶。現此時,小說是 siōng 欠 ê 文類,有 chiah 好 ê 文本 thang 好 hō͘ 後輩做見本,知影台語仝款 ē-tàng 寫出 hiah-nī-á súi ê 作品。我想這冊 siōng 好是一人一本,好好仔研究才是。聽伊講想欲好好 á 計劃畫koh 出一本,咱聽了真替伊歡喜,mā 真替台語人歡喜。

咱知真 chē 台語人 ē 怨嘆時勢,怨嘆市場,總–是,咱 m̄-thang lóe-chì。怨嘆 bô-khah-choa̍h,拍拚無一定會成功,無拍拚一定袂成功。開時間 hō͘ 家己 khah chêng-chông–leh,koh-khah 厲害。Án-ne,mā 無時間去看別人 ê 欠點。做寡成績留 hō͘ 後代。有成績才 thang 大聲。

真心向望正雄兄 ē-tàng 繼續寫,千萬 m̄-thang 停。咱 mā 向望咱家己看是 m̄ 是有法度 jiok tio̍h 伊 ê 尻脊影無!

*相關出冊紀錄:《白髮記》《戀愛府城》《失眠集》《風中的菅芒》《故鄉的歌》《眠夢南瀛》《灶雞仔》

我有話要說