Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎陳姿吟
話閣講倒轉來，1895年《馬關條約》彼冬，晉福後來聽人講劉永福總統阿婆仔làng（閬）港，裝作hū-jîn-lâng（婦人人）對安平港逃走，去到廈門。府城人士走chông，請巴克禮牧師用英國人ê身分冒死出城去參日本人講和，日軍才和平進入台南府城。
晉福是漢醫世家，閣有米絞，雖然伊ê老父已經心臟病過身，總是生活猶會得過。晉福猶閣有一个小弟，伊足疼這个小弟，1895年ê年底，晉福共小弟娶新婦，為著誠意kap禮數，晉福共送定ê餅做kah足大塊，開足濟錢，晉福第一擺感受tio̍h hōaⁿ-ke（扞家）ê壓力，就親像俗語leh講ê：「世事pôe-tòe（陪綴）kah到，無鼎koh無灶。」
晉福因為老父早早就過往，漢醫ê智識學猶未齊全，日本人來閣重西醫，晉福姑不將，1898年過去唐山深造，進修漢醫，mā向望趁錢，看ē-tàng有一寡仔發展無，一去就是三冬外，收入mā無穩定。厝裡ê漢藥鋪kap米絞hō͘小弟kap弟婦仔la̍k-khoân，弟婦仔外家ê人來put米轉去食攏無納錢，in大魚大肉食kah有chhun，kan-taⁿ hō͘月桃kap素春母仔囝食飯用箸ùn豆油；弟婦仔ê囡仔點心擔taⁿ來賣ê時，豆花、豬肚、豬血湯食kah m̄愛食，月桃kap素春連一碗通食攏無。月桃規日坐leh共人thīⁿ-saⁿ（紩衫），趁淡薄仔所費。
晉福轉來安平，隔冬1902年閣生第二个囡仔，是一个查甫嬰，m̄-koh早產，閣倒踏蓮花，好佳哉產婆真gâu，才保tiâu母仔囝ê性命。雖然按呢，囡仔ê目睭soah變成chheⁿ-mê（青瞑），看bē著。阿妹仔ê二兄清貴是盲人，做父母ê晉福kap月桃足煩惱，這个囡仔將來m̄知beh按怎才好？
人共晉福講，有一位甘為霖牧師，辦盲人ê教育已經十外冬，伊1891年就佇府城成立台灣第一間盲人學校Hùn-kó͘-tn̂g（訓瞽堂），日本人來了後改作盲啞學校，盲人mā ē-tàng讀冊受教育！晉福kap月桃聽人按呢講，心內親像暗暝有人點燈仔火仝款，有足大ê溫暖kap新ê希望！
三冬後，1905年，阿妹仔ê三兄清水出世，晉福kap月桃足歡喜！這个囡仔自細漢乖巧得人疼，啥人知soah嗽bē停，嗽kah出血，倒佇眠床，目睭共老母月桃金金看，足可憐ê模樣，hō͘月桃閣khah m̄甘。1906年嘉義梅山tōa-tē-tāng（大地動），府城mā有感覺，晉福kap月桃認為環境無安穩，為著beh趁閣 khah濟ê錢來應付醫藥費kap生活開銷，晉福決定閣一擺去唐山，想bē到一落船就去hō͘人當作殺人犯lia̍h（掠）起來，好佳哉仝船有同鄉盡力保證，閣sì-kòe奔走，官府才知影掠m̄著人矣！晉福就無佇唐山發展，轉來安平。月桃心內煩惱，1908年生ê查某囝素蘭，因為月桃無奶thang飼，tiāⁿ-tiāⁿ用米湯hō͘食，過tō͘-chè了soah突然間死去。
後生清水肺癆過往，tō͘-chè ê查某囝素蘭閣無去，晉福kap月桃心內足艱苦，兩人漸漸生出互相扶持ê心，感情愈來愈好。晉福做漢醫足認真，tiāⁿ-tiāⁿ查醫書到三更半暝，研究欲按怎治療病人。患者病好矣閣報新ê患者來，伊所khui ê「萬生堂漢藥鋪」seng-lí那來那好，三枝téng-á（戥仔）gia̍h bē離。厝裡ê經濟khah好了後，晉福kap月桃生阿妹仔，hit-chūn一般人khah重男輕女，因為靠後生奉待序大人食老，雖然阿妹仔出世m̄是查甫嬰，晉福kap月桃認為家己猶閣會生，感覺真歡喜！
阿妹仔1911年佇安平出世，晉福聽見人講唐山不時內亂，有人想欲推翻滿清朝廷kap皇帝，建立新制度ê民主國家，就無閣有去唐山ê想法。阿妹仔出世ê時，日本人已經來十外冬，阿妹仔就無pa̍k-kha（縛跤），伊ê大姊素春，拄開始縛跤ê時攏háu，暗時仔睏bē去；日本政府罵講bē使縛跤，素春ê跤就放開，無閣縛；不而過猶原phēng天然ê跤khah細雙，人講這是改良跤。
「無縛跤，將來按怎參人講chhin-chiâⁿ？」素春ê阿媽煩惱外孫將來kám會嫁bē出去。
「日本人罵，講這是歹風俗！M̄-niā叫人改鴉片，閣提倡查甫人剪頭毛無留mn̂g-bóe-á（毛尾仔），日本ê查某囡仔m̄免縛跤，ē-tàng有一雙『天然足』自由行路，而且閣讀冊受教育，kap查甫人仝款！」素春ê老母月桃繼續共ta-ke講：「若是按呢，囡仔暗時嘛會當好好仔歇睏，m̄免為著跤疼kah睏bē去！」月桃做老母ê人，就是khah軟心：「日本政府已經按呢講矣！咱照政府所宣傳ê去做就是啦！」月桃驚ta-ke閣欲提起縛跤ê代誌，雖然婉轉，mā趕緊sòa落去講，素春有老母ê堅持，早早就響應日本政府放跤ê政策。 （待續）
延伸閱讀：【甘為霖小說獎】
