Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉李南衡
福伯看tio̍h我笑講：「Che明明是『竹篙鬥菜刀』（Tek-ko tàu chhài-to)。」我問講：「是啥人beh相拍？」福伯笑講：「Tio̍h。永過咱台灣人足愛相拍，Hō-ló人kah客人相拚，漳州人kah泉州人相拚。佇一遍相拚中有一个天才發明『竹篙鬥菜刀』ê新武器，講：『竹篙長長，敵人拍咱bē-tio̍h，竹篙尾縛一枝菜刀有殺傷力。』逐个聽了大笑：『竹篙長lóng-sòng，干單夯tō真歹轉倒，beh那有可能當作武器相刣咧？』Chit項新武器自了無人用過，趣味ê是講兩項無相干ê物件抑是代誌硬beh kā鬥做伙，『竹篙鬥菜刀』煞變作用來罵戇人ê一句台灣俗語話。」我問講：「你笑講：Che明明是『竹篙鬥菜刀』，是teh罵啥人？」
福伯應講：「舊年5月25 ê幾工前，藝人郭彥均佇面冊頂貼出kah醫護朋友ê對話，其中一句『看tio̍h chiah濟囝仔tio̍h按呢行去』，引起足濟細漢囝仔ê父母緊張、驚惶。伊那像teh講醫界一位朋友ê苦衷：『某主任直直beh倒落ah」、「伊4月初五到chit陣攏無歇睏』、『逐工攏佇病房救人』、『囝仔愈來愈慘』、『足可怕ê日子』『伊講伊做醫生以來上慘ê日子』、『看tio̍h chiah濟囝仔tio̍h按呢行去。』佇驚惶中mā引起真濟人ê質疑。」
「5月28，專門研究假訊息ê IORG研究室公布研究分析指出，5月25至26，至少有25个面冊粉專發布內容完全仝款ê貼文，頭一句攏是『真濟囝仔行去ah！』其中有19個粉專貼文發布ê時間攏仝款是15:31，貼文內容完全仝款，而且貼文ê頭一个留言攏是kah內容農場beautygirl01.com ê文章相連結。」
「5月28，彰濱秀傳紀念病院胸腔外科主治醫師杜承哲佇面冊頂面，PO出1922提供ê圖片講：『4月初5至4月14，兒童中重症ê病人是0』。伊慼心罵講：『佇疫情chiah呢嚴重，有人製造假截圖，有人大出手出錢散布謠言才是背後ê目ê。郭彥均先生，全台灣根本無一个你講ê某主任，你ê截圖mā m̄是kah朋友ê對話，你ê截圖是ùi叼位來ê？』5月28，中國國民黨主席朱立倫佇面冊頂面發文問講：『10个囝仔性命敢算少？幼chíⁿ ê生命teh失去，今仔日有2个5歲、6歲孩童行去，攏總已經有10个囝仔行去ah！』」
福伯真受氣講：「人罵郭彥均講4月初5進前有『真濟囝仔行去ah！』是造謠，因為4月初5至4月14，兒童中重症ê病人是『0』，mā無囝仔死去。朱立倫講5月28以前有10個囝仔行去ah，che m̄是竹篙鬥菜刀，無是啥？」
