Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎ 林俊育
慟聞敬疼ê蕭清芬牧師蒙主恩召！真m̄甘！真siàu念全民台語聖經協會創會理事長蕭牧師對《全民台語聖經》ê貢獻，願上帝記念伊所做ê工！
Kah蕭牧師熟sāi是tī 2008年ê北美教協神學研討會。主辦單位ài我分享白話字台語輸入法，年長ê牧師ē曉白話字，bē曉ㄅㄆㄇㄈ ê輸入法；蕭牧師真意愛白話字輸入法，阮to̍h常常做伙。
蕭牧師時時lóng是笑容滿面，和諧可親。伊有機會to̍h ài我kā伊處理電腦ê白話字輸入法，tùi「輕鬆輸入法」「Kài輕鬆輸入法」到「信望愛台語客語輸入法」，伊lóng真認真來學、來使用，koh報真chē年紀khah大bē曉ㄅㄆㄇㄈ ê牧師來用。我當然mā掠tiâu機會kā伊請教聖經ê問題，伊真有耐心kā我指導，mā時時刻刻鼓勵我對台語聖經ê探討。
我提出「kā受台灣基督長老教會肯定ê《巴克禮修訂版白話字聖經》翻寫做人人讀有koh愛讀ê聖經」ê想法，是因為長老教會通用ê台語聖經是1933年出版ê白話字聖經，to̍h是廈門話ê《巴克禮修訂版聖經》，kah現今台灣普遍腔ê台語約10%無仝款。
蕭牧師mā有同感，伊tī「榮退感恩禮拜」中致詞，第一句to̍h講伊退休了後beh做《全民台語聖經》。伊mā認同賴永祥長老ê建議，成立「全民台語聖經協會」，thang制度化來研究發展。為tio̍h招khah chē人來參與，hō͘ chit ê有意義ê事工ē tàng永續發展，咱tio̍h用巴克禮ê廈門話聖經做基礎，kā它翻寫做「現代台語普遍腔」來代替原底ê廈門話詞，to̍h是全面採用現在台灣khah普遍ê腔口，to̍h是以高雄市做中心khah偏向南部腔、內埔腔ê台語；同時，mā kā有原文kah華語ê語法改做台語ê語法，翻寫做hō͘讀者khah ē tàng了解ê字句。Án-ne，讀者容易明白上主ê意思，福音chiah有法度廣傳。
蕭牧師對全民台語聖經協會出錢、出力koh出智慧，眾望所歸，協會一致推選伊作理事長。伊tòa紐澤西，我tòa波士頓，駛車tio̍h五點鐘ê路程，阮tiāⁿ-tiāⁿ chhōe機會討論協會ê事工。蕭牧師mā擔任多種族婚姻基金會ê董事，ta̍k年春天tio̍h來波士頓開會，阮to̍h安排來kah賴永祥長老做伙參詳協會ê tāi-chì。有一pái，周宏毅牧師mā專工來波士頓，做伙討論「重新翻譯台語聖經」ê議題。
郭得列牧師提議：kā聖經人名kah地名，mài koh照傳統漢字台語音，kā改做盡量接近原文發音。蕭牧師講真讚！伊to̍h真耐心教我希臘文kah希伯來文ê字母，thang好來做更新kah新舊對照表。我mā kā遐ê字母加入去我ê輸入法ê「自定詞庫」，án-ne，我ê信望愛台語客語輸入法to̍h ē tàng phah 希臘文kah希伯來文ê字母，真正方便。
我參加大紐約聯合退修會á是美東夏令會，蕭牧師tiāⁿ-tiāⁿ請我順路去tòa in tau，有khah chē時間討論全民台語聖經協會ê事工。Siōng歡喜ê是kah牧師娘講台語，伊是美國人，嫁hō͘蕭牧師了後來tòa台南，he是siōng有台灣味ê府城台語。牧師娘mā有煮台灣味ê chheⁿ-chhau hō͘ 我享受，chit時特別siàu念in對我ê好款待。
2019年ê協會會員大會中，蕭牧師kā協會ê大印移交hō͘ 張德香牧師。Taⁿ in lóng行完上帝賞賜hō͘ in ê一生，留落來深深ê siàu念，總是hō͘ 人感覺真m̄甘。 （作者為七星中會雙連教會會友）
