Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
Chok-chiá: 蘇聖詠
2020年11月初4，成功大學台文系邀請陳正雄老師來專題分享，伊是真出色ê現代文學家，一開始先踏話頭，講起佇伊少年時，受著「美麗島事件」和「台灣鄉土文學論戰」ê影響，對台灣ê鄉土文學有興趣，開始看一寡文學家ê作品，發覺用家己ê母語來記錄內心ê情感，是一件真要緊ê代誌，所以開始gia̍h筆創作，自按呢行ùi台語文學這條路。
代起先，伊去參加台語研習班，學練台語ê書寫方式，接紲koh去參加讀冊會kah寫作會，雖罔tú起頭ê作品較普通，m̄-koh經過慢慢仔訓練，以及吸收其他會友分享ê經驗以後，就開始投稿。因為作品jú創作jú濟，mā jú 來jú 優秀，其中佇台語刊物《菅芒花詩刊》，kah黃勁連和方耀乾成為主要ê作家；後–來出版足濟台語詩集，koh得著各種ê文學獎。
紲落開始分享伊家己ê作品，有幾若首台語詩，其中三首我上有印象，第一首先講著〈戀愛府城〉，這首詩共分做三段，每一段結構攏仝款，講5月ê時陣，是梅雨來、透南風、鳳凰花開ê季節，作者想起以早佇府城ê過去，包括對人、風景、古蹟siàu念ê心情，這首詩siâng時mā是一首歌，伊佇下課ê時，有放送hō͘ 逐个欣賞。
第二首是〈延平老街〉，這ê所在佇安平，m̄-koh陳正雄先生有強調，「老街」是受華語影響，台語應當ài叫「舊街」較適合。這條街有經過ùi荷蘭到國民政府遮ê政權ê記號，ē-tàng 代表台灣beh四百冬ê歷史，頭兩chōa「上早ê皺紋」和尾仔兩 chōa「上新ê傷痕」對比，hō͘人感觸足深，原來「上早」是珍貴ê，「上新」顛倒是傷痕，表達作者對古早 ê 寶惜。另外koh有一首〈湯德章紀念公園〉，湯德章是一名律師，佇二二八事件hō͘人銃殺，這个公園佇台南市區ê圓環，七條路交會ê所在，地點真顯目，雖罔已經改做湯德章ê名來紀念伊，m̄-koh 煞無像進前兒玉總督和孫文受人重視，一个台灣人煞 hām 日本人 kah 中國人袂比並tit，感覺誠稀微。
陳正雄先生鼓勵逐个做伙來寫作，伊講寫作若beh進步，一定愛捷寫，因為若家己去寫，就知影會拄著啥物問題。另外，mā需要ke欣賞別人ê作品，若是看著家己袂曉ê語詞和語法，ē-tàng 順紲學習kā記起來。我大學開始beh寫台語ê作品，就像伊講ê拄著困難，而且寫無sáⁿ會出–來，後–來jú寫就jú進步，m̄-koh若一段時間無寫，就會koh退步。所以講，這是寫作兩个蓋重要ê撇步，這馬想想咧，這門課除了ē-tàng聽著大師ê演講，koh有法度訓練寫作，有影是學習上飽滇ê一門課。
