◎李南衡
早前，台灣庄腳傳統ê徛家厝厝內無便所，便所攏是起佇厝外ê豬椆邊抑是牛椆邊，離徛家厝有小可距離；街市內厝內mā是無便所，大部分攏是一簇厝會有一間公共便所。三更半暝beh大便，無論風偌透、雨偌大、天偌寒，唯一ê辦法就是chông出去厝外ê便所解決；若是小便tio̍h加真方便，差不多每一間厝ê每一間房間攏會囥一腳尿桶作應急之用。細腳尿桶當然攏會逐工拚洗清氣，大腳–ê tio̍h無一定lo̍h，所以才會有「十二月尿桶，盡拚。」（Cha̍p-jī-goe̍h jiō-tháng chīn piàⁿ）chit句台灣孽仔話（歇後語）。這mā hō͘咱知影，當時尿桶平常時無一定會拚kah真清氣，tio̍h等到舊曆過年前ê12月才會「盡拚」。
60外年前，我作囝仔ê時陣去親成ê厝，上驚無細膩chông入去妗婆、嬸婆、抑是姑婆ê房間，因為古早式ê建築無注重採光kah通風，一下chông入去陰暗ê房間，tio̍h會鼻tio̍h臭尿hiam味，有時臭kah會流目油。
有人大項物件已經失落去ah、大條代誌已經無法度挽回ah，猶teh計較零星疕仔ê代誌，早前ê老大人就會搖頭罵一句俗語話講：「某死ah，看kah hit腳尿桶！（Bó͘ sí ah, khòaⁿ kah hit kha jiō-tháng.）」並m̄ 是講真正有人某死去ah，只不過teh比並重要性差真大ê兩項代誌而已。
1895年日本殖民統治台灣了後，日本政府佇各所在起日本式宿舍hō͘日本內地來台灣ê各級公務人員kah教師tòa，日本宿舍一個真大ê特點，地基拍平了後，厝ê地板kah土腳會làng成尺懸ê空間，才用木料隔間pho͘板仔，頂面才koh pho͘「畳（tatami）」，beh睏ê時才koh佇tatami頂面pho͘底被蓋棉被。佇宿舍ê上內底面會留一條巷路，頂面干單pho͘柴枋叫作「縁側」（yen-gawa），佇「縁側」ê上角仔有一間便所。
厝內底有便所？對19世紀末年、20世紀初年ê台灣人來講實在真稀奇。當時有一首囝仔唸謠按呢唱：「人插花伊插草，人抱嬰伊抱狗，人坐轎伊坐畚斗，人睏新眠床伊睏屎礜仔口。」因為有禮無體ê日本人烏白soān尿，台灣人罵in是狗；台灣人坐轎、日本人坐人力車那像畚斗；日本人tòa佇日本宿舍有影是睏佇屎礜仔口。
日治時代漸漸有台灣人起西洋式ê新厝，便所mā起佇厝內，特別是第二次世界大戰後，西洋式ê建築愈來愈濟，佇房間內囥尿桶ê人當然mā愈來愈少，甚至已經真少看tio̍h ah！mài講將來，現此時真濟少年人tio̍h已經m̄ 知尿桶是啥物，
你若講：「某死ah，看kah hit腳尿桶！」chit句俗語話，in應該m̄ 知你teh講啥物；相信m̄ 免偌久，無人會曉講chit句俗語話。
