Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉陳金順
人生頭擺參加別人ê畢業典禮。
別人，敢毋是「他者」？
經歷過三个無仝朝代ê歐吉桑，佇當權者ê眼內，正正號做「他者」。今仔日，歐吉桑ê畢業典禮，伊是「主角」，毋是「他者」。
連假四工最後一日，買無高鐵票，只好坐俗閣久ê客運。咱毋是食飽傷閒，閣較毋是食飽換枵，純然是對歐吉桑久年堅持ê敬重，才來這逝往回成十點鐘ê旅程。透早四點起床，提早出門走標。參昨暝仝款，走運動埕12輾半，5000公尺。走煞，kín-mé轉厝洗浴。早頓，麭、卵配舒跑。食飽，行路來客運站。
遵照主辦單位指示，今仔日穿kah規身烏趖趖。頂身長ńg烏色防曝衫，下底烏色條紋長褲，連揹仔mā是tōa-pān ê烏色，干焦運動鞋媠紅仔媠紅。
早時七點，客運車幫往台北城進發。中晝12點，佇台北轉運站落車。盤兩線捷運，行來師大就近ê素食天地食自助餐。食飽晝，下晡1點20行來台大校門口，歐吉桑畢業典禮遊行ê集合地。
現場看過，群眾無蓋濟。不而過，少年人占ê比例不止仔懸，翻轉1990年代ê街頭印象。彼時，台獨運動beh看tio̍h少年家，的確是阿婆仔生囝——誠拚。這陣，濟濟少年朋友手gia̍h「台灣民族主義」ê旗仔，等待較停仔向凱達格蘭大道起行。
未到2點，遊行隊陣冗早起行。獨立台灣會ê四台戰車做前，紲落，二十台插大枝「台灣民族主義」布旗ê三輪車綴後，對各地聚集來ê群眾排隊押陣，一步一跤印，勻勻仔行往目標地。沿路，「台灣獨立萬歲」ê口號無時停。
量約3點10分，大隊人馬行到地。這時，群眾那來那濟，拍算有一、兩千人。會場正中央白色大布篷裡掛奧里桑人像，邊仔一副對聯。毋過，最高統治當局無偌久beh出席搵豆油，民眾袂當近倚式場。
現場上重要ê鋪排，是kā歐吉桑百外冬ê人生，簡要條列展示hō͘眾人知捌。
遮有幾落个台灣社團排擔，敢若文化市仔，在人踅、在人揀、在人買。
主辦單位kā今仔日定位做歡樂ê畢業典禮，逐家歡喜來送別奧里桑。所致，會場無一絲仔哀傷ê氣氛。朋友絞規陣，序大kap幼囝，外勞sak老人，sòaⁿ-iā佇烏陰ê凱達格蘭大道。
四點半，我偷偷仔溜旋。畢業典禮猶閣幾落點鐘，請歐吉桑毋通見怪，下港人to͘-ha̍p較袂拄好。
建國ê路真遠閣真長，咱愛勻勻仔行。
