Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉Lōa Phek-chhong
Góa chò gín-á ê sî
Ū chi̍t pái, kūn-óa gō͘-ji̍t-chiat
Góa ê a-má pau kúi-ā kōaⁿ goán ài chia̍h ê kóe-chàng
He sī iōng lâng-sn̂g chhoe ê kóe-chòng
A-má kóng
Góa chit-má beh tiám chi̍t ki hiuⁿ
Tán hit ki hiuⁿ kòe–khì ê sî
Kóe-chàng to̍h se̍k ah
A-má kā góan nn̄g hiaⁿ-tī-á kóng
Chit-má lín tī-chia hó-hó-á kò͘-hóe
Goán ūi-tio̍h ē-tàng kín-kín chia̍h tio̍h hó-mi̍h-á
Chiū tī chàu-khang piàⁿ-sì hiâⁿ-hóe
Siūⁿ tio̍h hó-chia̍h ê kóe-chàng
Goán nn̄g hiaⁿ-tī-á kiông beh lâu-chhùi-nōa
Goán ti̍t-ti̍t long chhâ, ti̍t-ti̍t hiâⁿ
Kóaⁿ kín-hóe, kóaⁿ kín-hóe
Hit ki hiuⁿ kòe–khì
A-má hian-khui lâng-sn̂g-kòa
Khòaⁿ tio̍h kui tiáⁿ pau tī chàng-ha̍h-á lāi-bīn ē kóe
Lóng lâu-liáu-liáu, lóng tîm–tī tiáⁿ-té
Chit-sî
A-má ê ba̍k-sái
Chha̍p-chha̍p-tih
Goán ê ba̍k-chiu mā
Chhop-Chhop-nih
