Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉Alana Hana
Góa kah góa ê sió-tī jīn-chin sǹg–khí-lâi chiah chha cha̍p-it kò goe̍h nā-niā, tī góa ê kì-tî tiong bô ū kah i chò-hóe chhit-thô ê ìn-siōng. I lóng teh chò siáⁿ-mi̍h? Kah siâng chhit-thô? Góa lóng m̄ chai-iáⁿ. Kî-si̍t, goán tau ê hiaⁿ-tī chí-moāi bô siáⁿ-mi̍h chhit-thô–tio̍h. Goán pâ nā khì taⁿ chng-á, gín-á mā ài khì tàu poaⁿ. Tōa-hiaⁿ, a-chí kok-sió pit-gia̍p tō chhut-khì chia̍h thâu-lō͘, chhun jī-hiaⁿ, góa kah sió-tī, góa ê hāu-lu̍t bô hó, lóng sī jī-hiaⁿ kah sió-tī teh poaⁿ. Hit chūn góa tha̍k sió-ha̍k it nî, sió-tī iáu-bē ji̍p-o̍h. Poaⁿ chng-á ê ji̍t-chí bô-jōa-kú, goán pâ to thàn-tio̍h chîⁿ bé thó͘-tē, goán ōaⁿ khì hn̂g–ni̍h khau chháu, goán chò-hóe tùi chhù kiâⁿ khì chhân-hn̂g–ni̍h, tiām-tiām-á khì, tiām-tiām-á khau-chháu, tiām-tiām-á tńg–lâi, bô siáⁿ-mi̍h ōe-sái. Góa chin ùi khau chháu, liâm-mi thâu-khak thiàⁿ, liâm-mi pak-tó͘ thiàⁿ, soa-sap chin chē, lóng sī jī-hiaⁿ kah sió-tī liân góa ê hūn-gia̍h chò-liáu–liáu, án-ne chiah ē-tàng khah-chá tńg–khì. Tńg-khì ê lō͘–ni̍h ū tang-sî-á ē tú-tio̍h pin-nn̂g chhiū ê hio̍h-á lak–lo̍h-lâi, sió-tī khioh pin-nn̂g chhiū-hio̍h-á, kiò góa chē-leh, i kā góa thoa teh kiâⁿ, thoa sioⁿ kín, góa ē péng-tó, ah-sī chhiū-hio̍h-á tn̄g–khì, góa tō lè thô͘-soa, che sī góa kah sió-tī chhit-thô ê î-it ìn-siōng, “khó͘-tiong-chò-lo̍k”.
Góa tha̍k saⁿ-nî, sió-tī nî-bóe gín-á, tha̍k it-nî, goán poaⁿ sin-chhù, to-sī tī ka-kī ê thó͘-tē khí ê chhù, tī chhân-tiong-ng, ko͘ goán chi̍t hō͘, bô ū kî-tha ê gín-á thang sio-chhōe, jī-hiaⁿ bô-jōa-kú mā bô tòa tī chhù–ni̍h ah. Chhù-lāi kan-taⁿ góa kah sió-tī, m̄-koh, goán nn̄g-lâng mā bē sńg chò-hóe, iah-sī ōe-sian, sûi-lâng chò sûi-lâng ê khang-khòe. Ū chi̍t-táu, āu-piah ê soa-mn̂g pháiⁿ–khì, phòa chi̍t khang, goán pâ kā goán nn̄g-lâng hoa̍t-kūi tī lâu-thui-thâu, nā bô sêng-jīn siáⁿ-lâng lòng pháiⁿ–ê, bē-tàng peh khí-lâi, goán lóng kóng goán bô phah-pháiⁿ. Goán pâ kóng: “Lín nn̄g-lâng í-gōa, bô ū pa̍t-lâng, lán chhù tī chia bô-chhù-piⁿ bô gín-á, te̍k-khak sī lín nn̄g-lâng kî-tiong chi̍t-ê.” Bêng-bêng to m̄-sī goán lòng-pháiⁿ, án-ne siū óng-khut, góa sim-lāi hui-siông put-ho̍k, kam-goān kūi. M̄-koh, sî-kan chi̍t-tiám chi̍t-tih teh lâu, góa ê ba̍k-sái mā tòe leh chhap-chhap-tih, in-ūi kha-bâ io-sng kut-thiàⁿ, tiōng-tiám sī siū óng-khut siong-sim lâi khàu. Bô-gî-gō͘, chit-sî sió-tī, ēng kha-thâu-u ná pê ná óa khì goán pâ khùn ê bîn-chhn̂g-thâu kūi, kóng sī i lòng pháiⁿ–ê. Góa thiaⁿ chi̍t ê sim chiok kan-khó͘–ê, sió-tī ūi tio̍h góa ē-tàng kín thoat-lî khó͘-thàng, lâi taⁿ chit ê oan-óng-chōe. Góa phah-sí to bē siong-sìn sī sió-tī lòng-pháiⁿ–ê. Chit ê chêng éng-oán teh tī góa ê sim-koaⁿ-thâu. Che sū liáu-āu, goán mā bô te̍k-pia̍t ū ōe-kóng, i ū i ê chhit-thô-phōaⁿ, góa ū góa ê tông-o̍h, góa kok-tiong pit-gia̍p, lī-khui kò͘-hiong, tha̍k-chheh, chia̍h thâu-lō͘, lóng sī án-ne. (Āu kî koh khan)
