Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉Alana Hana
Góa tú chhòng-gia̍p ê sî, sió-tī thiaⁿ lāu-bú kóng góa kim-gia̍h bô kàu, tiām-tiām-á hōe chi̍t tiâu chîⁿ hō͘ góa sio thiⁿ ēng. Kiat-hun í-hāu, góa ê ang-sài bat ūi tio̍h chi̍t chân tāi-chì gō͘-hōe sió-tī, sió-tī kan-nā tùi góa kóng: “Lí kè chhut-khì ah, ài tòe ang kiâⁿ.” Sió-tī iû-goân kià tang kià sai lâi hō͘ góa, hō͘ góa an-sim thang chiàu-kò͘ góa ê ka-têng. I lóng àm-chiⁿ pang-chān góa, che sī bô-hoat-tō͘ hêng ê chêng.
Sió-tī sī chi̍t ê bô-ōe bô-sái ê lâng. Góa jú cháu jú hn̄g, Tâi-pak, kok-gōa. Kî-tha ê hiaⁿ-ché koh bián-kóng, chhù-lāi chhun sió-tī chi̍t lâng. I ê pêng-iú sī chng–ni̍h ê téng-ē iân ê tông-o̍h teh ká-kún. Tû-liáu chò-peng hit nn̄g-tang, i m̄-bat lī-khui chng-thâu. Goán pâ kiò i chò siáⁿ-mi̍h sit-thâu, i to tiām-tiām-á khì chò, sī lāu-pē ê hó kha-chhiú. Goán pâ nā teh hoan, khí sèng-tē, i sī goán bú-á siōng hó ê an-ùi-chiá. Lāu-bú sin-thé bô hó, lóng sī sió-tī chhin-sin kā I jiû seng-khu, sió-tī ū khó-tiâu tī Thô-hn̂g Lâm-khàm Tióng-êng hòe-kūi ê goân-kang, I pàng bē lī lāu-bú, lō͘-bóe hòng-khì ko-sin an-ún ê thâu-lō͘.
Ū chi̍t-chām-á, tōa-hiaⁿ keng-chè chiâⁿ bô hó, sì-kè poaⁿ-chhù, bô-lūn in poaⁿ-sóa khì tó-ūi, sió-tī lóng ē khì chhōe–in, tiaⁿ-tiaⁿ àm-chiⁿ thè tōa-hiaⁿ hêng-siàu, liáu-hāu, kā tōa-hiaⁿ nn̄g ê gín-á chiap-lâi kap I chò-hóe tòa, kiòng-èng in tha̍k-chheh, ti̍t-kàu in ka-kī ē-tàng to̍k-li̍p ûi-chí.
Jī-hiaⁿ kang-tiûⁿ khiàm sai-hū, kiò sió-tī kap I chò-hóe chò, sió-tī kha-chhiú mé-lia̍h, kang-hu hó, chi̍t-ê lâng tú saⁿ-lâng ēng, hiaⁿ-tī nn̄g-lâng phòe-ha̍p chiâⁿ sù-sī, piàn-chiâⁿ jī-hiaⁿ ê tōa-chhiú-kut. M̄-ku, hit-ê bô-iân ê jī-só hit tang-sî put-sî tùi sió-tī khiā-tang khiā-sai, sió-tī ê úi-khut lóng thun pak-lāi. I lóng m̄-bat ūi ka-kī siū gō͘-hōe siū úi-khut lâi piān-kái, chí-iàu ta̍k-ke ē-tàng oân-boán lia̍h-chò siōng iàu-kín ê tāi-chì. Si̍t-chāi kóng goán chit ê ka-cho̍k sī goán chit ê bô-ōe bô-sái ê sió-tī tiām-tiām-á teh siú-hō͘, kā hiaⁿ-tī chí-moāi kho͘-kho͘ óa chò chi̍t-hóe. (choân-bûn kiat-sok)
