Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎So͘ Sèng-éng
Ē-kì-tit tī ko-tiong ê sî-chūn, bu̍t-lí lāu-su bat mn̄g kòe chi̍t-ê bûn-tê: “Sī án-chóaⁿ Lâm-ke̍k ē hoat-seng chhàu-ióng-chân phòa-khang (Ozone depletion,臭氧層破洞)？” Bô án-sǹg tap-àn sī,“Lâm bô o͘-mih-tō͘-hu̍t”. Sui-bóng kan-na sī chi̍t-kú chhiò-khoe, m̄-koh hiān-si̍t ê chêng-hêng soah hō͘ lâng chhiò bē chhut–lâi. Lán lóng chai-iáⁿ chhoe léng-khì pâi–chhut–khì ê jia̍t-khì sī kî-tiong chi̍t-ê hiong-chhiú, ē hō͘ phòa-khang jú-lâi-jú-tōa.
Lâm-ke̍k ê gûi-ki mā-sī án-ne, chok-ka Tō͘ Sèng-liông chit-phiⁿ “Ross Sea ê ōe” lāi-té ū kóng–tio̍h, lâm-ke̍k-chiu ê peng-chàn chiām-chiām-á iûⁿ–khì. Chit ê goân-pún chū-kó͘ bô lâng kau-chhap ê só͘-chāi, bô lâng iàu-ì mā bô it-tēng bô hó-chhù, hái-pà kah khiā-gô͘ ē-tàng bô-hoân-bô-ló tòa tiàm chia. Bô-ta-ôa tāi-chì chóng ū piàn-sò͘, tē-kiû un-tō͘ ê thê-seng hō͘ hái-bīn tiòng-koân, khó-sioh hái-pà hām khiā-gô bô-hoat-tō͘ chò-hóe lâi hiáng-siū in ē hoaⁿ-hí, ka-chài chit-má choân-kiû khai-sí chù-tiōng khoân-pó, lâi pī-bián bī-lâi ê gûi-ki hoat-seng. Chok-chiá mā ūi in khún-kiû, m̄-thang iáu-bē chham in kìⁿ-bīn tō ài kóng chài-hōe ah.
Si̍t-thé ê mi̍h chin bêng-hián, lán thang lâi tin-sioh, nā khòaⁿ bô, bong bē tio̍h–ê, kám ū lâng chù-ì ? A̍h-sī chai-iáⁿ mā sûi-chāi I hông thún-ta̍h? Lán Tâi-gí sī m̄ sī kah Lâm-ke̍k ê peng-chàn kāng-khoán, ta̍uh-ta̍uh-á iûⁿ–khì, koh the̍h-seng Hôa-gí chit phiàn hái ê tē-ūi? “Lâng bô chiàu thiⁿ-lí, thiⁿ bô chiàu kah-chí.” Lán nā tit-sit tāi-chū-jiân, in ê iōng koh khah kiông-lia̍t ê le̍k-liōng hoán-tôaⁿ, nā-chún lán lâng tit-sit ê sī Tâi-gí, lán kám ū hoat-tō͘ ū chiok-kàu ê le̍k-liōng ǹg Hôa-gí soan-chiàn ?
Chok-chiá ūi Lâm-ke̍k ê thó͘-tē saⁿ khún-kiû, lán mā ài ūi Tâi-gí lâi khún-kiû:
“Siōng bô hō͘ góa ūi Tâi-gí lâu kúi chiat kàu-io̍k ê khò-têng, kám ē-sái ?”
“Siōng bô hō͘ góa ūi Tâi-gí pó-liû chèng-khak ê miâ-chheng, kám ē-sái ?”
“Siōng bô hō͘ góa sî-kan ūi í-āu ê kiáⁿ-sun ē-hiáu tha̍k-siá Tâi-gí, kám ē-sái ?”
Ross sea ê ōe sio-kâng chiâⁿ-chò sī Tâi-gí ê ōe.
Tâi-oân sì-bīn lóng-sī hái, Tâi-gí hiān-chhú-sî kám m̄ sī ? Sī Hôa-gí ê hái. Bē ui-hia̍p jîn-lūi sèⁿ-miā ê mi̍h-kiāⁿ, lán kám ē chhan-chhiūⁿ Ozone depletion ê tāi-chì hām Lâm-ke̍k ê peng-chàn hiah-nī kín-sīn kah pó-sioh ?
