◎康順添
有人講：教育部108課綱提掉中國人寫的文章〈廉恥〉，害中學生無法度思考「恥」的相關問題，是「無恥課綱」。聽著這句話，互人氣甲趒跤頓蹄，足想欲問講：你食台灣米，到底是咧講啥？
第一、真濟老師攏知影，教育部抾15篇中國人寫的古文是「提供參考」，老師會當家己撙節，這是權力的下放，學術的自由，嘛是足濟高中老師爭取足久才有的權利。今仔日有人講話顛倒頭講，干焦是突顯家己的無知抑是家己自私的政治立場。你若是欲教這篇，無人講𣍐使。
第二、敢愛教學生培養廉恥心？當然嘛愛教。毋過，咱的身軀邊就有足濟教材矣，是按怎愛用中國人寫的古文？遮的人攏是用性命佮行動來佮逐家講：「知恥才是勇士。」遮的人毋才愛囥佇教科書內底做教材。而且，遮的人無論是佇空間抑是時間上，離咱閣較近。譬論講：推捒捌字運動的巴克禮牧師；主張「莫互母親哭」，一世人為台灣人走傱的第一个留美博士林茂生……，在在攏是這馬的中學生愛了解認捌的勇士。
講著「無恥課綱」的彼个人，我真正毋知你到底是咧講啥？毋過，咱向望未來的囝兒序細攏知廉恥，咱閣較向望後一代會當認捌這塊土地往過有偌濟知廉恥，甚至無惜性命為這塊土地奉獻的人。 （作者為德光高中教師）
