Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
南四縣腔客語／二二八紀念
◎Chhang Ngâ-yì
Châu chhó-phû tî-poi
Kà-là-me̍t fùng-lièn-lièn
Chhiong â-mê kiáng-hong ke sân-fù pha̍t-lien
Cho sîn-ngiòng sṳ̀-chiet â-pâ sung ke
N̂gâu-hâ-hi
Sôn-sôn thiàm-thiàm ko tit chṳp
Yit-tén-hó ke mi-si yô !
Ke ngièn chhûn-thiên
Kiú-kiú mò lo̍k-yí, ngit-theù chhin lat
M̀-chhièn tông-chu
M̀-chhièn ńg-se
Ngài pûn â-mê tai to chhúng-phû
Chhiang â-mê ngi̍p-hi mu-theù koa-chṳ́
N̂gài thê mu-yèn-sùn liau, tén…..
Hó-chhai chhìm-tó yá-teû kà-là-me̍t ô!
Choi-châu tú-kî chhiuk-khói m̀ kiâng lé…..
Koi chhiong thâng-tó â-mê kieu-chṳ̂
Yit sâng yit sâng, yit chhṳn sa yit chhṳn…..
Ngài yit-lia̍p sa yit-lia̍p chak mò-thìn
Sṳ̍t to choi-ku̍k-ku̍k
Fùng-fùng ke chṳp tit-tit ta̍p-ta̍p
tiet-lo̍k ngâ kiáng-kîn, ngâ hiûng-chhièn ……
Yit-sên-ngìn m̀-voi thiâm-piong-thet
Chui siâng-ngìn ke kà-là-me̍t mi-si
Koi tô ngièn yî-heu ngài chang tî
He â-pâ cho-khi ke chṳ̂-mi
1947 sâm-ngie̍t
Ngài chang tui-se
Â-pâ phuk thê Su-sân-táng thai-su-hâ
Yat-chhut-lòi, fân-sṳ̂n
Thùng â-mê mien-tui-mien
N̂giàm-sṳ̀ chhit-khúng liù-hiet…..
Ko si-ngièn
Â-mê lîm yàm-sôn thèn â-pâ hi lé
Chhiang â-che thùng ngài
Vuk-é pûn chhîn-chhit cham-tén
Lióng kû-yì yit-nai liù-long
Chhìm ko-chai chhìm:
Â-pâ m̀-chhièn khon-tó ke…..
Vi-chho̍k moi-é ôn-miàng
N̂git-theù-sî cheu-tén phiàng-yòng…..
Â-pâ chui-mî liù pûn Thòi-vân ke mung
注解：
林界（1910～1947年），高雄苓仔寮人，做過連雅（今「苓雅」）區長、《台灣新生報》印刷廠廠長。1947年3月初六，林界並高雄市參議會議長彭清靠等七位和談代表上壽山，同高雄要塞司令彭孟輯談判，佢就無過歸屋下。同年3月21日，林界ke屍體thê壽山頂一頭大樹下yat（挖）出來，已經分人槍決。二戰結束以前，林界láu-tó台灣「回歸祖國」就會有希望。該時節佢me愐著，若係kiâ姊é胡錦華kiung lai-é（囝兒），就會安名做「黎明」，表示脫離殖民ke「暗晡」，迎接「光明」。總係kiâ姊é kiung兩個妹仔，分別安名做「黎影」、「黎彩」。這首詩係用林黎彩ke角度來寫，內容me根據佢ke口述。林黎彩正九歲，kiâ阿姆就自殺。兩姊妹分佢等ke四叔、五叔收養，受盡多苦。數十年來，兩姊妹都從事二二八歷史公義ke重建。林黎彩ke老公係「外省人」台獨運動者廖中山。
馬來西亞出世ke導演廖克發2021發表一個有關高雄二二八ke紀錄片《野番茄》，有描述林黎彩還細thê墓唇摘kà-là-me̍t食ke事情。
感謝邱淑華姊舊曆過年期間病痛中還then手這首詩ke修改。
