(請安裝Taigi Unicode字形，配合Firefox瀏覽器來讀)
作者：陳柏壽
1. 三個僕人 ê 比喻（馬太福音25章14～30節）
「有一人欲去外國，就召伊家己 ê 奴僕，將伊所有 ê 交代 in；一個互伊五千，一個互伊二千，一個互伊一千，各照 in ê 才調，就去外國。領五千 ê 隨時去做生理，閣趁五千。領二千 ê 也是按呢閣趁二千。獨獨彼個領一千 ê，就去掘地，來囥密伊主人 ê 銀。過久久，奴僕 ê 主人到，及 in 算數。領五千 ê 來，閣趁五千，講『主啊，你交代我五千。你看，我有閣趁五千。』主人給伊講：『好啊，好閣盡忠 ê 奴僕，你佇少 ê 已經盡忠，我欲設立你來管濟 ê；通入你 ê 主人 ê 快樂。』領二千 ê 也來，講：『主啊，你交代我二千。你看，我有閣趁二千。』主人給伊講：『好啊，好閣盡忠 ê 奴僕，你佇少 ê 已經盡忠，我欲設立你來管濟 ê；通入你 ê 主人 ê 快樂。』領一千 ê 也來，講：『主啊，我知你是嚴轄 ê 人，未撒 ê 所在就欲收割，未分散 ê 所在就欲拾做堆，所以我驚，就將你一千銀去埋佇地裡。今你 ê 原物還你。』主人就應伊講：『歹閣貧惰 ê 奴僕啊，你既然知我無撒 ê 所在就欲收割，未分散 ê 所在就欲拾做堆，就著將我 ê 銀下佇錢店，我來 ê 時，通得著我 ê 本銀及利息。所以著對伊提彼一千來，互彼個有十千 ê。因為見若有 ê，欲互伊，互伊有剩；無 ê，連伊所有 ê 也欲提伊。給彼個無利益 ê 奴僕趕伊佇外面烏暗 ê 所在；佇遐欲有啼哭咬牙切齒。』」
2.葡萄園中 ê 工人（馬太福音20章1～16節）
「天國親像家主透早出去倩工入 ê 葡萄園，及做工 ê 人約一日一錢銀，就差 in 入伊 ê 園。九點 ê 時出去，閣看見有閒閒徛佇街市 ê，就給 in 講：『恁也去葡萄園，我欲照公道互恁。』因就去。十二點及三點 ê 時閣出去，也按呢做。五點 ê 時閣出去，閣拄著有人徛 teh，就給因講：『恁啥事通日閒閒徛佇遮啊？』因給伊講：『因為無人倩阮。』伊給因講：『恁也去葡萄園。』到日暗，園主給伊 ê 管家講：『叫做工 ê，互 in 工錢，對路尾來 ê 起，到代先來 ê 為止。Hiah-ê 五點所倩 ê 到，逐個領一錢銀。代先倩 ê 到，in 拍算欲領較濟，毋過 in 也逐個領一錢銀。領了，就給家主 nga̍uh-nga̍uh-liām 講：『阮通日拖磨受熱，hia-ê 路尾倩 ê，做工一點鐘久，竟然互 in 及阮平濟？』伊就對 in 一人應講：『朋友啊，我毋是無公道款待你，你豈毋是及我約一錢銀嘛？你 ê 做你提去！我欲互這個路尾 ê 及你平濟。用我 ê 物件做我所愛 ê，豈袂使得？抑是因為我做好，你就目孔赤嘛？』親像按呢，路尾 ê，欲做代先；代先 ê，欲路尾。」
3. 機警 ê 管家（路加福音16章1～9節）
「耶穌對學生講：『某個好額人有一個管家 ê，有人將伊破費主人 ê 業對伊 ê 主人告伊。主人叫伊來，給伊講：『我所聽見你這個代誌是怎樣？今你管家 ê 事著及我清楚，因為你袂當繼續做管家。』管家 ê 心內想講：『主人辭我做管家 ê 職，我欲怎樣啊？舉鋤頭？無氣力：做乞食？感覺見笑。今我知著按怎做才好：到人辭我管家 ê 職 ê 時陣，人會接納我入 in ê 家。』伊就叫欠伊主人 ê 債 ê，一個一個來，給頭一個講：『你欠我 ê 主人偌濟？』應講：『油一百桶。』就給伊講：『提你 ê 數，緊緊坐，寫五十。』閣給別個講：『你欠偌濟？』伊講：『麥一百石。』給伊講：『提你 ê 數，寫八十。』主人就呵咾這個不義 ê 管家，為著伊所做 ê 代誌有智識：因為這『世間 ê 人』，為著世情來圖謀，比『光明 ê 人』卡有智識。我也給恁講，著用不義 ê 錢財結交朋友，到錢財了去 ê 時，因才欲接納恁入永遠 ê 帳房。」
主耶穌講 ê 以上三個現象，不但佇古早游牧民族 ê 部落社會，或是東方 ê 農業民族 ê 田庄社會，尤其是現代 ê 資本主義社會，每日發生 ê 通常現象，你我攏袂當逃閃，咱人人攏有可能扮演管家及主人 ê 角色及行為；嘛有可能扮演僕人及受雇 ê 角色，做仝款 ê 行為。
經濟生活是人間社會必然 ê 現象。有人所在就有經濟，有經濟就有波浪及風湧。經濟親像飛佇天空中 ê 風，或是空中 ê「靈」（以弗所書 6 章 12 節）。咱日日及經濟爭鬥車拚，無法度脫身。經濟生活是整個社會生活 ê 波浪，佇矛盾對立妥協中繼續進前。
人生活佇集團對頂面落來 ê 規範及束縛，互人依集團生存。但是社會運作，毋是一成不便，毋是風平浪靜，是有矛盾、對立、欺騙、橫霸，因為人生活佇經濟內面，經濟生活造成個人及社會 ê 命運。
無公道 ê 道理
主耶穌講 ê 第一例毋是伊 teh 支持階級社會 ê 形成。人 ê 階級性是自然形成 ê 產物。伊講這實例，是欲啟發咱欲佇經濟社會中 ê 生活 ê 態度。伊主要 ê 重點是伊愛咱佇經濟生活中，不可「維持現狀」。
第一例及第三例是講咱著突破現狀，不但袂使將咱天賦 ê 才情埋入土腳，著運用咱 ê 能力，來為咱創造新 ê 社會階級，創造新 ê 個人運命。咱著親像彼位管家，突破階級 ê 束縛，創造新 ê 經濟行為以及新 ê 運命、新 ê 社會秩序。正常社會 ê 經濟活動是不允准利益獨占，因為利益獨占及財富過度集中會互社會全體崩潰；社會全體崩潰 ê 時，利益獨占者也不可能生存。
第二例是講著主人無照世間「照工報酬」ê 規矩。世間逐所在、逐文化攏有一貫 ê 經濟道理，就是做偌濟工領偌濟錢，若無照這項道理，人類社會無法度進行。有人講這個主人真有良心，知影好額人及散赤人攏仝款著食飯，所以攏領平齊錢。我想最後只有一項會當解說，就是這位主人有「權柄」決定一切。主人雖然破壞世間公認 ê 道理，互世間 ê 公道顛倒 péng，主人做反叛世間 ê 行為，但是伊 ê「權柄」決定一切。這是一種無公道 ê 道理。
佇第三例所在，主耶穌講這位做反抗行為 ê 不義 ê 管家，實在是不但留互這位管家，嘛是留互咱每一個人一條活路。伊講咱人是「世間之子」，人不可能是完全。人欲成做「光明之子」是做人 ê 最高目標，但是真難達成。最後耶穌謳咾這個管家，講伊做代誌有「智識」，反對既成 ê 倫理規矩，煞變做有智識 ê 人。
反抗帶來改變
近代資本主義是向「合理主義」發展。人雖然依賴集團 teh 生活，人 ê 運命可以講大部分是取決於「集團」，但是「個人」ê 形成及獨立，是集團兌變及集團擴大 ê 因素，個人 ê 自我及集團漸漸一體化，「團體依存主義」及「個人運命」合一。最初人雖然活佇大 ê 社會環境所鎖定 ê 規則，但是猶有個人 ê 反抗，破壞既成 ê 集團環境。
咱來觀察第三例：因為管家 ê 反抗行為，互集團 ê 活動內部，產生協調，互集團內部人間關係有親和感，變做集團運作 ê 一部分。個人及集團改變，管家及主人，變做「協同」及「妥協」ê 關係。這會使講是上帝 ê 手伸入去人 ê 社會生活，互社會人群及個人，佇共同 ê 時間及共同 ê 環境之下，外口看親像是對立，其實是社會質變 ê 必然演變。伊互社會對立化解，互社會經濟及資本行為「合理化」。
這是現代社會「傳統」及「現代」，「對立」及「妥協」ê 辯證關係。無反抗，就無妥協；有反抗，就有妥協，有妥協，社會會向前行。
頂次世界大戰時，日本軍要求 2、30 歲 ê 少年士兵，去做「特攻敢死隊」。有 ê 少年人，佇飛機起飛 ê 時送一個電信互伊 ê 長官：「恁 chia-ê 攏是『Ba-kai-ya-lo！』（馬鹿野郎）」（參閱鴻上尚史《不死身の特攻兵》），用按呢表現心底對命令伊駛飛機去自殺 ê 人 ê 最極度 ê 反抗及嚎叫。是最後 ê 抗議，也是用死做 ê 最後抗議！
這及主耶穌佇聖殿前 kā 生理人「péng 桌」仝款。主耶穌是 teh 做一項最後 ê 抗議。因為伊 ê 這項行為，猶太宗教人開始準備欲謀害耶穌。耶穌知影伊這款行為並無法度改變猶太人 ê 宗教習慣及現實：就是長久以來聖殿及生理攏結連做伙，宗教及經濟是共同體。咱著知：耶穌 kā 人「péng 桌」是一種叛變，一種全心全身 ê 賭注，親像用雞卵 khian 石頭，chûn-pān 死 ê ，伊知影伊無法度改變罩佇世間真強 ê 既成 ê 宗教及政治勢力。耶穌 ê 行為所代表 ê 意義，只有是「反抗」，也因為這項事件伊提醒世間人，聖殿 ê 本質以及伊存在 ê 意義。
困境中上帝 kā 咱開路
頂面三個實例攏是代表咱對現實世界 ê 反抗，chiah-ê行為 ê 當事人，真有可能因為按呢受害犧牲。但是咱看另外有一面：可能就是因為按呢，咱人會當生存落去。安靜想起來，咱每一人攏是對這種困難環境，掙脫出來，生存落來。耶穌 ê 教導，並無因為伊及這世間根本 ê 社會制度及傳統思想 ê 衝突，互咱無路通行，反轉咱佇人生 ê 衝突及困境中，上帝 kā 咱開路。
雖然是無道理 ê 道理，但是也是上帝留互咱世間人有不得已 ê 選擇。福音 ê 和平不是在佇無衝突，是在佇人不管時對現實世界 ê 勢力，不斷產生不滿，對不公道 ê 代誌不斷 ê 反抗。我雖然無贊成使用暴力 ê 反抗，但是我贊成一定著愛有心靈及思想 ê 反抗。反抗是做人最基本 ê 出發點及動力。法國哲學家 Camus 講：「反抗互人脫離孤單及孤立 ê 狀態，奠定人類首要價值 ê 共通點。我反抗，所以我存在。」
