(請安裝Taigi Unicode字形,配合Firefox瀏覽器來讀)
作者:吳春滿
鼠年到 到鼠年
鳥鼠仔 鳥鼠仔愛過年
膨鼠 樹頂唱歌詩
鼢鼠 塗底揣好物
錢鼠 咬錢過好年
玲瑯踅 踅玲瑯
鳥鼠仔 鳥鼠仔硞硞傱
傱到大廳堂
搪著貓仔 起跤 lōng
險險仔予伊 捎去拜天公
姻緣牽 牽姻緣
鳥鼠仔 鳥鼠仔當少年
骨力拍拚 無怨言
十八般武藝 全盡展
娶著好某 較贏咧做仙
運氣好 好運氣
鳥鼠仔 鳥鼠仔上拚勢
學著功夫 候時機
照顧某囝 無推辭
一家和樂 幸福千萬年
Chhí-nî kàu kàu chhí-nî
Niáu-chhí-á niáu-chhí-á ài kòe-nî
Phòng-chhí chhiū-téng chhiùⁿ koa-si
Bùn-chhí thô͘-té chhōe hó-mi̍h
Chîⁿ-chhí kā chîⁿ kòe hó-nî
Lêng-long se̍h se̍h lêng-long
Niáu-chhí-á niáu-chhí-á khok-khok chông
Chông kàu toā-thiaⁿ tông
Tn̄g-tio̍h niau-á khí-kha-lōng
Hiám-hiám-á hō͘ i sa khì pài thiⁿ-kong
In-iân khan khan in-iân
Niáu-chhí-á niáu-chhí-á tng siàu-liân
Kut-la̍t phah-piàⁿ bô oàn-giân
Cha̍p-peh-poaⁿ bú-gē choân chīn tián
Chhōa-tio̍h hó-bó͘ khah iâⁿ leh chò-sian
Ūn-khì hó hó ūn-khì
Niáu-chhí-á niáu-chhí-á siōng piàⁿ-sì
Oh-tio̍h kang-hu hāu sî-ki
Chiàu-kò͘ bó͘-kiáⁿ bô the-sî
Chi̍t-ke hô-lo̍k hēng-hok chhian-bān nî