約坦 ê 咒詛

◎柯三益

士師記 9 章 19~20 節記載,約坦對示劍人、米羅人以及伊 ê 兄哥亞比米勒 ê 咒詛,約坦是士師基甸上細漢 ê 囝,伊 ê 名 ê 意思是「上帝是正直 ê」,咱知影基甸是耶和華上帝親自揀選 ê 勇士,伊 bat 為上帝起一座壇,名叫「耶和華沙龍」,就是耶和華賞賜平安 ê 意思。伊也 bat 奉上帝 ê 命令拆毀巴力 ê 祭壇,所以有人稱基甸作耶路巴力,意思是講伊拆毀巴力 ê 壇。

基甸為以色列人立下上大 ê 戰功是 bat 帶領 300 人攻打虐待以色列人 ê 米甸人、亞瑪利人以及東方 ê 眾人,聖經記載 chiah-ê 人親像草蜢 hiah 濟,in ê 駱駝 bōe 算得,濟到親像海墘 ê 沙,但是基甸用 300 人打敗對敵13萬5000人,伊靠著上帝打敗米甸人,並 thâi 死米甸人兩個首領。以色列人對基甸講:「你既然救阮脫離米甸人 ê 手,願你 kap 你 ê 囝、你 ê 孫管理阮。」基甸講:「我無欲管理恁,我 ê 囝也無欲管理恁,獨獨耶和華做恁 ê 王。」因為有士師基甸,以色列人日子太平 40 年。但是基甸死了後,以色列人 hoán-tńg 去拜偶像,用巴力比利土做上帝。

基甸總共有 70 ê 親生囝,因為伊有真濟妻後,伊有一 ê 細姨住佇示劍,有生一 ê 囝,基甸將 chit-ê 囝 ê 名叫做亞比米勒。基甸死了後,亞米比勒有野心想欲做王,伊就去示劍找伊 ê 眾母舅,對伊 ê 母舅以及伊外公全家 ê 人講:「請恁講互示劍 ê 眾人聽,看是我 70 ê 兄弟管恁卡好,抑是我一 ê 人管恁卡好,恁要想清楚做好決定,因為只有我是恁 ê 至親骨肉。」亞比米勒 ê 眾母舅就將 chiah-ê 話講互示劍 ê 人聽,最後示劍人決定欲請亞比米勒做王,因為示劍人認為只有亞比米勒才是示劍人 ê 兄弟。示劍人就對巴力比利土 ê 廟內提出 70 銀兩互亞比米勒,互伊用這些錢請濟濟殺手,將伊 ê 兄弟攏 thâi 死佇一塊石磐頂,只有耶路巴力 ê 尾子約坦沒死,是因為伊有走去 bih。

真鬧熱也真風光,示劍人與米羅 ê 家攏聚集,聯合起來欲立亞比米勒做王,有人向約坦講這件事,伊就去 khiā 佇基利心山頂,大聲喊講:「示劍人啊,恁著聽我 ê 話,互上帝也聽恁。」當時百姓聚集佇山下面 ê 平原,約坦所 khiā ê 位置會通互所有 ê 人聽見伊所講 ê 話,伊用設立一叢樹做王 ê 比喻來表示伊對設立王 ê 反應,佇比喻中間伊用四叢樹所表現 ê 態度來教示 kap 責備眾人。

約坦用樹 ê 國家選立王,來描寫說明以色列人 ê 所做所為,伊用莿仔樹比做亞比米勒,用橄欖樹、無花果樹、葡萄樹比做基甸 kap 他 ê 70 ê 囝兒。橄欖樹、無花果樹、葡萄樹全部攏真明智拒絕離開上帝所指定 ê 職分,去 tiàm-tī 眾樹木 ê 頂面。但是莿仔樹卻是無同款,伊不但熱切接受做王 ê 邀請,而且警告講會毀滅 hiah ê 無選伊做王 ê 柏香樹。

當樹木請橄欖樹做王 ê 時,伊回答講:「我豈通放拺我 ê 油,就是人所用來尊重上帝 kap 人 ê ,去搖佇種樹 ê 頂面嗎?」當樹木請無花果樹做王 ê 時,伊回答講:「我豈通放拺我甜閣好 ê 果子,去搖佇眾樹 ê 頂面嗎?」當樹木請葡萄樹做王 ê 時,葡萄樹應講:「我豈通放拺我 ê 新酒,就是互上帝與人歡喜 ê ,去搖佇眾樹 ê 頂面嗎?」當眾樹邀請莿仔樹做王 ê 時,莿仔樹應講:「恁若實在設立我做恁 ê 王,就愛降服佇我 ê 蔭影下,若無按呢做,願火對莿仔出,燒滅黎巴嫩 ê 柏香樹。」

這個古早 ê 比喻,對佇今日 ê 基督徒來講是一 ê 真好 ê 教示,就是咱只有一 ê 王耶穌基督,佇咱 ê 心中來管理咱 ê 一切,咱要親像士師基甸以及伊 ê 70 ê 囝同款,只是佇咱 ê 本分頂面忠心盡職。親像橄欖樹出產油為主發光、無花果樹結美好 ê 果子、葡萄樹做酒互人與上帝歡喜,但是毋通親像莿仔樹只想欲家己做王,害人害己。

約坦比喻講息,續接講:「現在,恁豈是誠心實意立亞比米勒做王,恁豈有記念基甸,照伊為恁所做 ê 來好款待伊 ê 後代?我 ê 老父為恁爭戰,出生入死解救恁脫離米甸人 ê 管轄,但是恁竟然反叛阮 ê 家族,恁佇一塊大石頭頂面 thâi 死伊 70 ê 囝。就因為亞比米勒是恁 ê 親戚,恁立伊做示劍 ê 王。如果恁今日所做 ê 攏是誠心誠意對待基甸 kap 伊家內 ê 人,若按呢我祝福恁 kap 亞比米勒彼此攏得到快樂。若無,願亞比米勒放火燒盡示劍人 kap 米羅人,也願示劍人 kap 米羅人放火燒掉亞比米勒。」

以上約坦所講 ê 話就是「約坦 ê 咒詛」,chiah-ê 話講息,約坦因為亞比米勒 ê 追殺,就逃走 bih 佇比珥。示劍人、米羅人確實無誠心實意好款待基甸家族 ê 後代,所以約坦 ê 咒詛後來真正應驗,佇士師記 9 章 56~57 節 ê 所在記載講:「上帝報應亞比米勒向伊父親所行 ê 歹,就是 thâi 了兄弟 70 人 ê 歹,示劍人一切 ê 歹,上帝也攏報應佇 in 頭頂,耶路巴力 ê 子約坦 ê 咒詛歸佇 in 身上。」

我有話要說