用母語了解土地 ê 文化 kah 歷史

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

Chok-chiá: 蘇聖詠

2020年10月14,成功大學台文系邀請張辰漁總監專題分享,伊 ê 興趣是影片製作,創立「世界柔軟數位影像文化公司」。一開始伊是 uì 畫尪仔冊入門,內容攏是 hām 台灣 ê 歷史有關係,親像「四六事件」咧講1949年國民政府懷疑台大 kap 師大學生有人加入共產黨,警方掠人 kap 學校保護學生權利ê過程;另外,「中壢事件」是因為1979年選舉桃園縣長 ê 過程發生做票,引起群眾不滿 sòa kap 警察起衝突ê過程。

因為 chit-má ê 少年人對以早政治 ê 代誌,可能無啥物要意,m̄-koh 若用尪仔冊 ê 形式來展現,改用圖片做主體,m̄ 是只有硬 piang-piang ê文字,就有真好ê效果,che kap利用繪本講「台語囡仔古」有 sio-siâng ê 作用。伊 mā 有 hām 滅火器歌團合作製作 MV,比如,〈一九四五〉就有 in ê 插圖設計 tī 內底,hō͘ MV 呈現真實 kah 插圖互相交替 ê 景象。

除了政治方面,張總監用心研究台灣 ê chia̍h-si̍t 文化。關係食ê物件,咱大部分ê人kan-na知影啥物所在有啥物好食物,攏 bē 去思考伊ê源頭是啥物?到底是按怎演變?為啥物會遮爾有名?張總監 mā kā 伊所研究–ê,用節目 ê 方式報 hō͘ ta̍k-ê 知,hō͘ 咱 tī 咧享受 chia-ê 食物 ê 中間會當想 tio̍h in 發展 ê 故事。

伊 mā uì 拍影片 ê 方向發展。伊製作ê電影《妖怪人間》真有名,咧講人類 kap 妖怪 beh 按怎做伙和平鬥陣,mài kā 對方當作敵人 ê 過程;另外 koh 有最近 liâm-piⁿ beh 放送 ê《水下事務所》,我感覺這 ê 名蓋趣味,是紹介嘉義地方派系 kap 政治 ê 關係,用中央觀點 kap 地方觀點去討論,因為嘉義縣有一个地點是「水上」,影片 sòa 號作「水下」,會當 hō͘ 人聯想是這所在發生ê代誌,m̄-koh 無 ài 明顯表明出來;張總監 koh 有用這齣電影出桌遊、大富翁 ê chhit-thô 物,hō͘ 人對人物抑是劇情進一步ê了解,順紲 hō͘ 人來 sńg,結合教育 kap 娛樂,創造商機,實在是「一兼二顧,摸蜊仔兼洗褲」。

佇互相討論內底,hō͘ 我上有印象ê是有學員反應 ài 用原本 ê 語言來展現,才 ē-sái kā 上真實 ê 情形 hō͘ 觀眾知影,in-ūi 這个提醒,我才發現有 ê 劇情內底有 ê 所在確實應該用台語表達,會較接近現實ê情形,親像咱若看外國 ê 影片,sòa m̄是用當地ê語言來講,就無法度完全表現出語言 ê 情感,所以這 mā 應當是拍片 ê 人 à i注意 ê 問題。

我有話要說