◎李南衡
福伯問我敢bat聽過「掟驚死，放驚飛（Tēⁿ kiaⁿ sí, pàng kiaⁿ poe.）」chit句台灣俗語話？我問講是啥人掠tio̍h啥物鳥是bô͘？福伯應講：「M̄是，我是beh講中國對立陶宛ê處境tio̍h是án-ne，傷出力驚掟死去，放khah lēng驚飛去。」
福伯講：「立陶宛政府舊年（2021）宣布beh佇台灣設立辦事處，拓展亞太市場。立陶宛接受咱國ê建議，7月20，咱國外交部長吳釗燮宣布，會佇立陶宛首都維爾紐斯（Vilnius）設立代表機構，名稱是『駐立陶宛台灣代表處』，che是佇中國邦交國內底，頭一個以『台灣』作名ê代表處。中國相當受氣，8月初10發表聲明召回中國駐立陶宛大使，而且要求立陶宛召回駐中國大使，koh中斷直達立陶宛ê鐵路貨運，暫停立陶宛對中國出口食品等報復手段，作為經濟制裁。事實上對立陶宛影響GDP 1% niā-niā。問題是中國每年對立陶宛出口14億美金，立陶宛對中國出口4億美金，m̄知啥人制裁啥人。前年咱台灣有贈送十萬片嘴掩，協助立陶宛第一線醫護人員對抗疫情。舊年6月22，立陶宛宣布beh捐送武漢肺炎疫苗hō͘台灣，7月31，三萬劑ê AZ疫苗tō運送到台灣。9月22，立陶宛宣布beh koh捐送23萬5900劑ê AZ疫苗hō͘台灣，10月初9送到台灣。Che tō是蔡英文總統所講ê，台灣貢獻國際ê善良力量，已經成做『善ê循環』。9月14，立陶宛經濟部長佇華府拜訪咱國駐美國大使蕭美琴ê時講，足期待10月中，台灣經貿投資考察團beh去訪問斯洛伐克、捷克、立陶宛三國。中國bē使看立陶宛小國，tō kā凌遲。立陶宛駐中國大使離開北京hit工，所有歐盟駐中國大使招伊做伙翕相留念。伊是歐盟成員國第一位hông召回ê駐北京大使。若是中國對立陶宛chit-ê人口只有280萬ê小國過頭歹，有可能引起其他歐盟國家ê倒彈。9月15，佇芬蘭首都舉行ê『北歐—波羅的海八國外長會議』頂面，討論kah中國ê關係。其他七國外交部長攏對立陶宛表示充分ê支持，而且強調佇面對中國時，hit地區kah歐盟ê立場應當團結一致。我才會講中國對立陶宛『掟驚死』。立陶宛准台灣佇in ê首都，設立有大使館實質ê代表處用『台灣』ê名，中國絕對bē-tàng忍受，m̄是干單佇立陶宛ê問題，因為中國上驚chit-ê例一下開，免偌久歸個歐洲逐國ê首都攏會看tio̍h『台灣代表處』。所以中國無踏硬bē使ê。我才講中國對立陶宛『放驚飛』。可見力頭ê準節真要緊。」
我講掠鳥仔ê人愈來愈少，將來無人會曉講chit ê台灣俗語話。
