◉賴永祥
馬偕牧師（Rev. George Leslie MacKay）1872年開始佇台灣傳教，今年慶祝北台灣教會150週年。伊是北台灣長老會 ê 創始者，30年來有開創60 gōa間 ê 教會，得 tio̍h 3000 gōa 名 ê 信徒，培養60 gōa 位 ê 福音傳道者；伊 iáu 創辦偕醫館 kah 戰後成做真理大學 ê 牛津學堂（理學堂大書院）。
是 án 怎一位宣教師 hiah-nh 成功？謝大立牧師／博士 kā 馬偕看做是宣教歷史 ê 一部分，m̄ nā kan-taⁿ 是傳記，而且 tùi 宣教神學中 kā 看做是神學。宣教學（missiology）當做神學 ê 一部分佇19世紀末開始，當時有少數學者提倡，無親像系統神學 án-ne 是普遍受接受 ê 理論。對 chit 種未穩定 ê 理論中，謝博士參考各國 ê 書籍，創造自己 ê 方法論，而且想 beh tùi 各種角度來紹介 kah 評論馬偕 ê 成就。這是一个充滿挑戰 koh 有趣味 ê 事工。M̄ koh，chit 種方法並無容易處理；我鼓勵讀者不時 tio̍h 翻開目錄頁，通來全面了解謝博士 ê 項目。
馬偕是啥款 ê 人？
咱想講台灣北部基督教是馬偕做起頭，伊是第一代的宣教師，m̄ koh 謝博士解說講，馬偕是第三代 ê 宣教師。成做頭一位來 Chiná ê 宣教師馬禮遜（Morrison）kah 翻譯 Chiná 經文 ê 理雅各（James Legge），分別是第一 kah 第二代宣教師，in 為 hit 當時是 Chiná 一部分 ê 台灣宣教做準備 ê 工作。Tùi 傳教史來看，利瑪竇（Mateo Ricci）等人佇這 chìn 前 to̍h 佇明帝國 teh 傳道，koh 再往前推，第一、二代 lóng 是 teh 指保羅 kah 使徒 ê 工作。這一切 lóng 是為 tio̍h 完成事奉 ê 偉大使命，tú-tú to̍h 是 chit 本冊所努力圖謀 ê，tùi chit 種歷史 kah 神學 ê 角度，來詳細說明馬偕 ê 生平 kah 工作。
作者寫馬偕是 án 怎選擇去台灣宣教，伊佇普林斯頓神學院接受 ê 教育對伊 ê 影響 án 怎，伊 kah 門徒 kah 會眾 ê 關係親像 án 怎等等，作者有閱讀加拿大長老會 ê 報告 kah 馬偕 ê 日記，而且想 beh 來做解說。Tùi 宣教 ê 角度來看，he 真複雜，oh 得閱讀。M̄ koh，kan-taⁿ 看 án 怎使用材料，對馬偕牧師 ê 研究人員來講，是一本 bē tàng 欠缺 ê 冊。
第三部分起頭，謝博士講：「有趣的是，馬偕自身是一個從『海外宣教』努力走向『本土化宣教』的拓荒宣教師……」作者 án-ne kā 馬偕定位。馬偕hiah-ni̍h 認同台灣，融合東西方 ê 文化，娶台灣 bó͘。
「本土化」to̍h 是佇 bē 彎曲 ê 狀況下宣揚基督教 ê 本質，同時佇基督教 ê 本土化教義 kah 無仝文化之間 chhōe tio̍h 一个接觸點。馬偕通過研究中國傳統文化，尤其是儒家思想，向提倡孝道 ê 台灣儒者來認同摩西十誡中 ê 第五誡，就 án-ne 得 tio̍h in ê 信任。伊有收嚴清華、吳寬裕等等 ê 好弟子，培養 in，幫贊 in 傳道，hō͘ in 獨立；這致使伊 ê 成功。
就「本土化」來講，宣教師 ê 角色是傳道 ê 使者，á 接受傳道 ê 人是主要 ê 行動者。Tio̍h 算佇教會歷史上，mā 一定 to̍h 是台灣教會成員 ê 歷史，卻 m̄ 是宣教師 ê 成就。馬偕對這有認真思考，m̄ koh，接替伊 ê 宣教師 kám 有 chit 種感覺？台南神學院助理教授 Yuki Takai（高井由紀）博士有做真好 ê 研究。
順續講一句，謝博士佇文中寫講，我佇台灣教會史 ê 開拓時期開始撰寫《教會史話》ê 時 to̍h 有強調 chit 點；真感激鄭仰恩牧師、王政文博士 kah 謝博士等繼續 chit 个無成熟 ê 熱情，kā 變成輝煌。
讀完 chit 本冊，感覺台灣神學家 ê 研究當 teh 漸漸 óa 近發達國家 ê 水準。台灣 kiám-chhái 是時 chūn，有出現一種獨有特殊 ê 研究方法 à。論 tio̍h chit 點，黃彰輝牧師提倡使用Contextualization「處境化」一詞，來代替 chit-má 普遍使用 ê Indigenization kah Inculturation。這是台灣神學家 ê 理論是被世界接受 ê 一个真好 ê 例。
我今年99歲 à，期待未來 ê 少年一代有進一步 ê 發展。 （作者為圖書館學學者）
編註：這是賴永祥長老特別為謝大立牧師的論文出版寫的推薦文，謝大立已徵得同意刊登。今年9月21日是賴長老百歲大壽，文章最後一句的心願是他99歲時對台灣年輕一代的期許，在此與各位分享。
