◉A-mui-a
最近毋知為啥物，雄雄佇心中唱出1994年陳水扁的台北市長競選歌曲。雖然是競選歌，毋過歌詞內容所表達的快樂佮希望真正互人感動。〈台北新故鄉〉的歌詞：「老樹換新枝，枝枝向上天。」互我的感想是，人毋免驚食老，年歲毋是阻擋咱學習新的事物的理由，咱猶原會使學新的物件，逐項新的代誌都是正面、光明、向上天看的。互人感覺人生是光明燦爛，逐工攏是新的。
「打開燈火揣希望，希望原來就是咱。」讀書時陣，老師講：「恁是未來的主人，以後國家就靠恁。」原來人就是社會上的燈火，人有力量會發光，有人才這個社會才有活力。「夢已經振動，奮鬥毋通放。」鼓勵咱毋通放棄夢想，為家己的夢想來打拚，來奮鬥。日頭已經出來了，夢想就要實現，佇生活中拄著困難咱愛用這個歌詞來鼓勵家己，夢已經振動了，奮鬥千萬毋通放。
上出名的歌是〈有夢最美，希望相隨〉，其中歌詞「起心為著好所在，尊嚴自在傳百代」，互咱知影祖先傳落來的土地，咱要好好珍惜。「夢佇窗口咧閃爍，照著將來照自己」，光明照咱佮未來，有光就會看見希望。我上合意是：「行過歷史的牆圍，步步向前春花開，有夢的人上蓋媠，希望永遠伴相隨。」遮爾媠的歌詞互我真正足感動，歷史共咱講，只要勇敢向前春花就會開。有夢的人毋是稻草人無魂有體，是有希望佇身邊，是上蓋媠。 （作者為基督徒）
