Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
作者◉Herman Melville
翻譯◉黃正州
馬普牧師（Mapple）徛起來，用溫柔ê聲，吩咐會眾坐khah倚leh。伊講：「佇船倒爿ê，向正爿坐過來；正爿ê，向倒爿坐過來；請大家攏坐來船ê中央。」
歸排ê椅仔跤，傳出水手ê鞋仔khong-lông khong-lông ê聲，不時mā有幾聲查某人、較輕ê腳步聲。無偌久，四周圍 tiām落來，大家看牧師。
伊無開喙，隨時跪落來；兩支勇壯ê手骨，攬leh胸崁。伊kheh目睭，小寡攑頭，開始祈禱，迫切祈禱，若親像跪loeh深深深ê海底祈禱。
祈禱煞，伊tau̍h-tau̍h-á 用嚴肅、無啥物起落ê聲，讀出聖詩，若親像有水手佇bông-bū茫茫ê海，一直槓鐘，警告附近ê船隻。
「海翁ê骨頭kap恐怖ê感覺，崁佇我ê頭殼頂，我無望啊。上帝ê光，照金海湧，一陣一陣chhiâng過來ê湧，我有時浮出水面，總是連鞭摔落去閣較深ê所在。我看見地獄ê入口拍開，內面是永遠袂煞ê苦難kap歹夢，只有陷落中間ê，才知影有偌歹忍受。
啊，我愈沉愈深，愈來愈絕望。佇烏暗ê痛苦中，我向上帝呼求，雖然我m̄敢想，m̄敢肯定我猶原屬佇伊，總是伊àⁿ耳聽我講我ê委屈，海翁就開喙，放我自由。上帝hō͘我thang喘氣，伊親像坐佇hái-ti頂面，大雷槓袂停，天色hō͘人敬畏，我看見我ê救主ê面。我ê詩歌著永遠記錄，彼个驚人chóng–sī猶有喜樂ê路途。榮耀全部歸佇上帝，世間ê恩慈kap權柄全部歸佇上帝。」
會眾漸漸開喙，隨牧師做伙吟詩，聲愈來愈大，超過外口ê風雨聲。唱煞了後，牧師拍開聖經，tau̍h-tau̍h-á péng，péng到位，手囥佇聖經頂面，講：「我親愛ê水手，咱做伙坐一隻船，m̄-thang袂記得《約拿書》第一章上尾一句：『上主安排一尾大魚kā約拿吞落去。』」
伊繼續講：「Kap我共船ê啊，這本冊kan-ta四章niā-niā。若講聖經ê記載是粗勇ê索仔，這本冊算是細條ê。M̄-koh，《約拿書》這條索仔，直接牽咱ê靈魂入去jōa-nī-á深ê海底！這个先知hō͘咱jōa-nī-á大ê教示！伊佇魚腹所吟ê詩歌實在寶貝，ká-ná大湧，有大氣力。咱感受著，大水已經淹過咱ê身驅，咱kap伊做伙佇海底，邊仔只有水草kap nōa-kô͘-kô͘ ê thô͘ 。
Chóng–sī，《約拿書》欲教示啥？Kap我共船ê，伊ê教示有兩條：第一條是針對咱大家，咱遮ê有罪ê人；第二條是針對我，我這款，受永活上帝所指派ê船長。
對咱，所有ê罪人，這本冊講ê，是一个罪惡ê故事：反背ê心思；突然醒過來ê驚惶；隨時來ê刑罰、後悔、祈禱；kap約拿佇路尾得tio̍h救ê感恩kap喜樂。這个亞米太ê囝kap所有ê罪人m̄-tio̍h ê所在像款，tiau-kang對抗上帝ê命令。咱先免管是佗一款命令á-sī命令是m̄是清楚，chóng–sī，約拿感覺伊做袂到。
其實，恁ài會記得，上帝ài咱做ê絕對m̄是簡單ê代誌。所以上帝不時ài kā咱提醒、kā咱指示、ài咱順服。M̄-kú咱若欲順服上帝，就tio̍h違背家己ê想法。因為按呢，跟綴上帝，才會chiah-nī無簡單。這个m̄肯順服ê罪，刻牢佇約拿ê心，而且伊kā上帝看輕，想欲逃走，離開上帝。伊想講人造ê船隻就夠額載伊去上帝管袂tio̍h、只有人teh統治ê所在。伊佇約帕ê碼頭ná kiâⁿ ná bih，驚人注意tio̍h，伊趕欲chhōe去他施ê船。
遮有一件代誌要補充，照學者ê研究，他施應該是今仔日ê加底斯。共船ê啊，加底斯佇叨位？加底斯屬西班牙，古早時代，約拿若對約帕行水路，thang去上遠ê就是chit-ūi。因為彼時猶無人敢凊彩出入大西洋。
共船ê啊，恁敢有了解約拿teh暗算啥物？伊欲閃去世界ê另外一角， bih hō͘上帝chhōe袂tio̍h。可憐啊，約拿這个人！實在真好笑！伊phōng-song ê帽仔下面是虧欠、見笑ê眼神，伊欲偷偷仔離開，tú親像一个賊仔，想辦法欲偷走去國外。伊外表是hiah-nī-á緊張、 gāi-gio̍h、無自然；彼時若有警察看tio̍h伊，早tō kā伊掠來問。一个無行李、無同伴、趕緊欲出海ê人，誠明顯是犯了大罪ê thong-chı̍p-hoān 。
Ná chhàng ná chhōe真久了後，伊看tio̍h一隻欲送貨去他施ê船，taⁿ khioh貨欲煞。伊緊peh上船，去見船長，水手攏停下來看伊，注意tio̍h伊奇怪ê眼神。雖然約拿拍拚kēng出輕鬆、有自信ê款，但是無路用，伊ê笑容傷過勉強，反轉hō͘水手koh khah確定，in所ioh ê無m̄對，這个人有問題。
有水手細聲kún-sńg-chhiò講：『我看伊有搶劫一个寡婦。』『我看伊是娶兩个某hō͘人chang–tio̍h。』『Khah差不多leh，伊明明就是對古早ê蛾摩拉抑是所多瑪，這兩个上罪惡ê城，偷走出來ê強姦殺人犯。』
有一个水手kui-khì落船，去看貼佇碼頭ê公告，有賞金500个kim-pè，欲掠一个刣家己父母ê hiâm-gî-hoān，有描寫伊生做啥物款。彼个水手ná讀公告，ná遠遠仔siòng 約拿。這時船上ê水手已經將約拿包圍，準備動手kā sa起來換賞。約拿驚kah phi̍h-phi̍h-chhoah，面色lú想欲保持平靜，看起來lú緊張、 tah-hiaⁿh，mā koh kah hō͘人懷疑。Chóng–sī，伊有忍耐，無亂去。無偌久，水手發現伊m̄是公告欲掠ê彼个，in就散開hō͘伊過。約拿趕緊行過甲板，kiâⁿ去下面ê chhng-pâng。
『啥物人？』船長大聲問。伊ê桌頂滿滿是連鞭要交hō͘海關ê交件，當teh無閒。約拿面對『啥物人』這个普通ê問題，心頭亂糟糟，強欲越頭做伊走。M̄-kú，伊有thun-lún落來。伊講：『我想欲隨恁去他施；歹勢，船長先生，m̄ chai tang-sî 出海？』
約拿gāng-gāng徛佇船長面前，船長原本無攑頭看約拿，直到伊聽著約拿kín-tiuⁿ、虛弱ê聲，伊才好奇，chim-chiok 看約拿。
『等後一改tīⁿ-lâu，水位有夠，阮就出發。』船長ûn-ûn-á講，ná講ná teh kā siòng。
『歹勢，船長先生，敢有法度較緊ê？』約拿問。」（待續）
