Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉李南衡
福伯看我入去in厝tio̍h喝講：「日頭赤炎炎，隨人顧性命！（Ji̍t-thâu chhiah iāⁿ-iāⁿ, sûi-lâng kò͘ sèⁿ-miā !）」我問講：「Chit句台灣俗語話是啥意思？」福伯解說講：「平常時你兄我弟，ná-chhiūⁿ感情誠好，一旦抵tú-tio̍h危急、抑是牽涉tio̍h重大利害關係ê時，各人有打算，隨人顧家己ê性命khah要緊。」
我問福伯講：「你無代無誌，ná-ē講chit句俗語話？」福伯應講：「是世界大代誌那會無代無誌？Ùi 舊年2月24俄羅軍入侵烏克蘭beh成個月，戰事並無俄羅預定hiah順利，ē-sái講是損失慘重。3月18，美國總統拜登（Biden) kah中國國家主席習近平舉行視訊會談，拜登總統特別吩咐中國絕對bē-sái軍援俄羅，若違反會受tio̍h嚴厲ê制裁。天賜chiah好ê藉口，習近平歡喜kah bē曉講。」
福伯講：「2022年初hit陣我tio̍h kā你講，北京舉行冬季奧運ê時，俄羅總統普丁專工拚去北京kā奧援，兩人發表聲明講中國kah俄羅ê友誼無上限、是透天ê。事實上，俄羅對烏克蘭ê侵略戰爭，中國抑是習近平，攏干單唇皮人情會出ê nā-niā，實際上軍事抑是經濟支援俄羅是絕對無可能。你hit陣問我是啥物原因？我講，俄羅入侵烏克蘭，包括美國在內ê北約國家，攏支援烏克蘭各種上新ê武器kah裝備，俄羅一人拍眾人，對中國來講，兩旁所燒掉ê錢愈來愈濟。上好是兩旁攏拍kah淒慘落魄，兩旁ê損失愈慘重愈好。橫直戰場離中國遠遠，完全bē受傷害損失。戰kah體質虛弱ê俄羅，戰後佇中國ê頭前變作是『細漢ê』，出在中國差派。到時，俄羅逐項代誌攏tio̍h看中國ê頭面。
舊年9月以後，烏克蘭部隊佇東北部kah南部發動強力反攻，俄羅兵敗那像山teh倒，初五才講收復失地有2,000平方公里，無兩工講已經收復4,000平方公里，9月14講收復6,000平方公里。6,000平方公里，差不多是宜蘭縣加基隆市加新北市加台北市加桃園市ê大細。過一禮拜講已經收復8,000平方公里。
俄羅總統普丁想tio̍h上好ê朋友中國。9月16，習近平去中亞參加『上海合作組織高峰會』，普丁趕緊拚去kah習近平見面，希望習近平開嘴支援。習近平講啥攏無報導。唯一ê消息是普丁講，習近平對烏克蘭戰爭有表示關心kah擔憂。」我問講：「按呢nā-niā？」
福伯笑講：「當然是按呢nā-niā。日頭赤炎炎，隨人顧性命！俄羅總統普丁是大失望kah侮辱。轉去了後，隨時宣布9月22至29『西伯利亞力量』管道對中國供應ê天然氣暫停，理由是檢修。kôaⁿ–lâng iáu bē kòe，看中國按怎反應。你m̄驚我死，我ná-ē驚你無命？」
照按呢看，「日頭赤炎炎，隨人顧性命！」chit句俗語話猶會流行一站。
