Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎林朝成
《聖詩》〈主，我愛就近祢〉，作詞者莎拉‧亞當斯（Sarah Flower Adams）（1805～1848年），少年ê時向望將來做一个演員，毋閣因為身體無好，影響伊ê學業，致到伊真失望。這款心境，hō͘伊開始親近主、倚靠主，佇主內面得著真大ê安慰。莎拉‧亞當斯有寫作ê天分，伊真疼主，決志將伊ê才華奉獻hō͘主，伊就寫出這首真súi閣感動人ê詩歌。彼陣伊ê病痛愈來愈嚴重，伊知影這是主hō͘伊ê十字架，伊tio̍h勇敢背十架行天路。親像詩歌所寫：「雖然著背十架，求祢扶持。」伊相信，十字架愈重，主愈親近。
莎拉‧亞當斯用創世記28章雅各天梯ê故事，寫這首聖詩。雅各當時為著閃避兄哥以掃ê追殺，離家出走，來到曠野，毋知頭前道路佇佗位？伊孤單無助，暗暝伊頭khòa一塊石頭睏去。夢中看見有梯hō͘天地相連，天使佇梯頂面吟詩o-ló。主上帝佇梯頂面顯現，對伊講：「我欲kap你同在，欲永遠保護你。」雅各清早起來，tio̍h驚koh歡喜，原來上帝無離開伊，上帝一直kap伊同在，欲永遠kā保護。這首詩歌安慰濟濟飄泊、流浪ê心靈，hō͘失喪ê人揣著人生ê方向。1856年，梅遜博士（Dr. Lowell Mason）為這首詩歌譜曲，梅遜博士是美國頭一个得著音樂博士ê音樂家。
這首詩歌因為鐵達尼號（Titanic）事件sòa通人知。1912年全世界上大ê船Titanic頭擺出海就lòng-tio̍h冰山，致到船tau̍h-tau̍h-á沉落去。彼陣，船內ê人真驚惶不安，面臨死亡。根據記載，船頂樂團ê指揮華萊士（Wallace Hartley）chhōa樂團演奏這首歌，講：「真榮幸ē thang 為逐家演奏到路尾。」〈主，我愛就近祢〉，hō͘眾人混亂ê心靈漸漸平靜。逐家真有秩序，先hō͘婦女kap囡仔優先坐救命船，若猶有位，查埔人才入救命船。所以，得著救ê人khah濟是婦女kap囡仔。樂團演奏，直到船沉落去。華萊士、樂團kap眾人，因為基督ê信仰有勇氣，願意犧牲家己。這个故事hō͘人大感動，〈主，我愛就近祢〉成做基督徒上意愛ê其中一首歌。
〈主，我愛就近祢〉
1. 主，我愛就近祢，來近倚祢，
雖然著背十架，求祢扶持；
我心時常吟詩，主，我愛就近祢，
主，我愛就近祢，來近倚祢。
2. 雖然抵著出外無位通歇，
更深暗暝罩我，掛頭用石；
眠夢猶原欣慕，主，我愛就近祢，
主，我愛就近祢，來近倚祢。
3. 夢中看見天開，榮光出現，
上主施落恩惠，天地相連；
天使對我招呼，主，我愛就近祢，
主，我愛就近祢，來近倚祢。
4. 睏醒歡喜記念，謳咾吟詩，
所過悽慘煩惱，成伯特利；
苦境變做聖路，主，我愛就近祢，
主，我愛就近祢，來近倚祢。
