Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
作者◎William Barclay
台譯◎陳惠雅
實在真oh-tit想像，一个hiah-nī-á親近耶穌ê人，竟然會出賣伊ê主基督，ùi chia來看，咱可能會感覺加略人偤大是新約中siōng hō͘人無法度了解ê人物。偤大這个hông記佇三份十二使徒ê名表內面（馬太福音10章4節；馬可福音3章19節；路加福音6章16節），馬太hām馬可lóng用「出賣耶穌hit ê加略人偤大」來形容伊，路加kā伊稱做「變成叛徒ê加略人偤大」（譯註：參考現代中文譯本2019版經文：「後來成為出賣耶穌ê加略人猶大」）。
前三本福音書，偤大最後一幕才出現。M̄-koh，tī第四福音書內底，伊有兩擺出現ê時間khah早，而且伊ê出現mā有相當ê意涵。Hō͘五千人食飽了後，有一个運動勻勻仔leh形成——眾人想beh強迫耶穌起來做王（約翰福音6章15節）。當耶穌表明伊有其他無仝ê目標了後，有真濟本來tòe伊ê人因為án-ne tō來離開伊。耶穌對門徒講，in若beh，mā會使離開伊。這時彼得大聲表白家己ê忠誠，講出hit句其他門徒無法度講出ê性命之言。耶穌sòa leh應講：「我kám m̄是揀lín十二人？Lín中間mā有一个是魔鬼！」約翰解釋，這是耶穌leh講加略人偤大將來beh背叛伊（6章66～71節）。
第四福音書有關偤大ê故事，講tio̍h伯大尼ê馬利亞án-chóaⁿ用一罐純koh高貴ê芳油來抹耶穌ê跤。He是充滿疼ê舉動，m̄-koh偤大ê反應soah hō͘人tio̍h驚；伊認為芳油ē-tàng賣三百個銀á，用來賑濟sàn-chhiah人。約翰解說講，偤大chia-ê話並m̄是真心leh關心sàn-chhiah人，只是因為伊是管錢–ê，英王欽定本（KJV）koh講伊「tiāⁿ-tiāⁿ偷the̍h伊所管理ê公款」（12章1～8節）。希臘文「bastazein」是”to bear”或者是”to carry”（chah、帶）ê意思；tī口語上mā有「偷the̍h」ê意思。Kán-ná kah蘇格蘭人ê動詞”to lift”（the̍h起來）ê用法仝款，有kā物件the̍h起來通好chah走ê意思。M̄-koh若是”a shoplifter”（店內ê賊），tō會使講是「偷the̍h」ê意思。約翰所beh表達ê是：偤大是一个貪心ê人，伊利用管錢ê身分，偷the̍h使徒ê公款。
日子逼近ê時，偤大開始扮演主要ê角色。偤太教當局ê人關心ê問題是：beh án-chóaⁿ掠tio̍h耶穌，koh bōe引起暴動？因為耶穌當時真得tio̍h百姓ê愛戴。偤大等於是替in解決這个難題。「撒但」，路加講：「入去tī hit ê叫做加略ê偤大ê心。」（路加福音22章3節）伊行去偤太教當局hia，kā in約束好三十个銀á，beh chhōa in去無群眾ê所在，kā耶穌交hō͘ in（馬太福音26章14～16節；馬可福音14章10、11節；路加福音22章3～6）。約翰所描述ê時間lio̍h仔有出入，伊講撒但是tī最後ê晚餐時掠tio̍h偤大ê心，而且hō͘伊開始有背叛ê意圖（約翰福音13章2節）。偤大beh去做這件可怕ê代誌進前，並m̄是無受tio̍h耶穌ê提醒。這个提醒tī福音書內底有三个sió-khóa-á無仝ê記述。所有ê福音書lóng寫講，耶穌真憂悶leh預言，十二使徒中有一个beh出賣伊。馬可kah路加並無提起hit个人ê名，但是有進一步警告（馬可福音14章18～21節；路加福音22章21～23節）。Tī馬太福音書，偤大問耶穌：「老師，總m̄是我hoⁿh？」（26章25節）伊得tio̍h ê答案是：「你ka-kī講出來à。」約翰福音ê記述khah完整koh有戲劇性（13章18～30節）。咱必須ài注意門徒食飯時安排ê坐位。古早人食飯時ê座位會當hō͘人身軀倒趨趨，用倒手曲thèⁿ leh，正手才提食物抑是酒起來食。真明顯，約翰是坐tī耶穌ê正爿，所以伊才會當óa tī耶穌ê胸坎前（13章23節，合和本譯做『側身挨近耶穌的懷裡』）。Siōng受歡迎ê人客是坐tī主人ê倒爿，因為主人ê頭會chhū過去倒爿hit个人ê胸坎hia。咱讀約翰福音，看會出來偤大應該tō是坐tī這个特別尊貴ê位。Tī pôaⁿ過節ê時，飯桌頂有三項特別ê食物。頭一項是「Charoset」，就是蘋果、棗仔、石榴kah果子仁lām-lām做伙拍出來ê漿，代表百姓tī埃及為奴時做磚仔ê泥漿。第二項是苦草，親像山鵝仔菜、苦菜根、苦菜kah苦汁薄荷hit類苦苦ê草抑是菜，用來提醒以色列人做奴隸時食苦ê生活。第三項是無酵ê餅（抑是麭）。 （後期koh刊）
延伸閱讀：主 ê 門徒
