Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎李南衡
福伯講，30年前有一个立法委員愛tio̍h伊ê助理，hō͘ in某發現tio̍h，in某誠冷靜，無嚷mā無吵，問講：「你到底khah愛伊抑是khah愛我？你按怎揀，我攏會接受。」無疑誤，立法委員講：「我足愛你mā足愛伊。」In某講：「無chit號代誌！你那會使雙腳踏雙船？你一定tio̍h作一個決斷。」福伯笑講：「咱台灣俗語話講：『雙腳踏雙船，心頭亂紛紛。』（Siang-kha ta̍h siang-chûn, sim thâu loān hun-hun.）」我問講hit ê立委路尾按怎處理？福伯笑講：「差不多每十年tio̍h有一个立委按呢眩船，愛tio̍h伊ê助理抑是新聞記者。咱那有精神記hiah濟！」
我問講，是按怎今年台灣流行現任議員làu-phâu去選立法委員？福伯講：「我才teh謳咾何博文kah李坤城兩个新北市前市議員，in兩年前tio̍h決定beh拼明年ê立委，舊年tioh無kah人選市議員。市民tio̍h愛支持chit款人。舊年（2022）11月26 ê九合一大選，蔣萬安當選台北市長，伊原本台北市第三選區立法委員ê缺tio̍h補選。上蓋歹款ê是台北市議員王鴻薇。抵抵當選台北市議員、猶未宣誓就任tio̍h出馬競選立委，今年1月初8立委補選，戰贏民進黨提名ê吳怡農，當選立法委員。Che mā算是一種真bái ê鼓勵。明年1月13 ê九合一大選，除了總統副總統大選以外，立法委員ê選舉算是上hông注目ê。真濟縣市議員就任猶無半年，tio̍h宣布beh拼明年立委選舉，che叫作真歹款！」我問講：「In按呢雙腳踏雙船，心頭敢bē亂紛紛？」
福伯應講：「你teh心頭亂紛紛，人in歡喜kah笑hai-hai！」照公職人員選舉罷免法規定，候選人除了全國不分區kah僑居國外國民立法委員選舉以外，當選人一個人，得票數達各該選舉區當選票數三分之一以上者，當選人若兩個人以上，得票數達各該選舉區當選票數二分之一以上者，應補貼伊競選費用，每票補貼新台幣30箍。像講王鴻薇連選兩遍，短短70工領兩遍選舉補助共259萬元。台北市議員徐巧芯chit遍市議員選舉the̍h 2萬7205票，補助款81萬6150元，伊mā決定beh選立委，若當選立委至少有一兩百萬ê補助。全國各縣市現任縣市議員有想beh選立法委員ê至少有30位，萬不幸攏總當選，in歡喜當選立法委員koh會tàng領一兩百萬ê補助，完全bē記得選民對in ê信賴kah付託。全國tio̍h koh開錢補選30个縣市議員，m̄ nā勞民傷財，mā kā選民當作戇仔。應該修法限制民選公職人員就任未滿任期一半以上，bē使làu-phâo去參選別種公職人員。修法完成進前咱選民會tàng做ê，tio̍h是拒絕選hō͘ làu-phâo去參選ê人，按呢才會tàng hō͘ 雙腳踏雙船ê公職人員心頭亂紛紛。按呢有理無？
