【編按】：郭水龍牧師（1881～1970年），是馬偕牧師的學生。1897年，16歲的郭水龍進神學校讀書。根據《台灣基督長老教會北部教會大觀》（1972年），郭水龍「初入學不太識字，漢文，羅馬字都不會寫」，三年後（1900年），以第一名成績畢業。後來，郭水龍繼續留在神學校，替因喉癌無法講話的馬偕上課。本特別企畫是郭水龍牧師於1969年撰寫的宣教手稿，當時已88歲高齡。原作多半使用台語白話字，部分採漢字，本文以底線標註漢字，保留原作風貌。
原作◎郭水龍
翻譯整理◎蘇晏德
相片提供◎郭恩信
七、古時傳教者困難（續）
別ê傳道死，傳道娘著閣嫁，一名女傳道薪水一月三元真儉是食飽 nā-tiāⁿ，教會 ê 義學漢文先生一月五元，一家5、6人欲食五元，他亦著趁外路錢才食會飽。彼時雖然講物較俗，1人1月著食＄4.00，若濟人相佮食亦著＄3.00。傳道若做較久，1月＄10.00，這是中國銀水扣抵日本金水 chhun ＄7.00。台灣日本管，買賣是用日本錢是金，母會亦是用金水，chiáⁿ 樣會 pìⁿ 做銀，閣即金水，這是 Pān-chhiu ê 人食去？án-ni 後來才定一个子女閣貼每月五角，到10年久，hit-chiú 才廢換金水，領十元即是實。今傳道師著盡忠為主作工，食不飽衣不暖欲盡忠？無做副業閣較無，做副業亦有種菜、掠漁補貼。南部傳道師ê親人saⁿ補助予囡仔讀冊，逐个ê兄弟較有親，親人較有親saⁿ助予囡仔讀冊，北部傳 ê親人兄弟無相助，隨人顧家己。北部傳道之子無出身者無人幫助，傳道做到終身真少。有人有好頭路，就做別項。
Cháiⁿ 樣傳道師月給 hiah-nih 少？這m̄是偕牧師定 ê，通知來，廈門、台南教會是佮台北教會3位攏是英國人創設，in 3位教士會攏有 siong 通。前廈門神學校有教英語佮教醫生，出業了，去予英商倩，有ê做醫生，李春生來台灣茶行英商和記為買辦，一月幾若百箍，李玉東台灣做醫生，亦開藥房趁錢真濟。所以廈門寫來阻擋，m ̄ 通教英語、教醫生，後日走了了。伊想真錯，雖然就無做傳道，若做會友嘛有利益教會，亦一戶薪水少，嘛是廈門通知著 hiah 少。
台南 ê 母會及廈門仝英國創設，偕牧師是照 in 2位來款待遮ê傳道。英國人傳真理，口頭云仁愛，所為殘忍刻薄。當時，外國牧師一月美鈔＄3.00倩一个總舖、一个 chhōa 囡仔、一个苦力（ku-lí）、一个排桌，傳道一月日10箍銀，平等主義 tī 佗位？英人看中國人是豬，口是心非，外人家己hiah享福，台灣將餓死，無同情心，無體貼心。到今日台灣教會自治，牧師一月三千元、四千元至少一千外元，今日英人牧師皆無權，教會、學校、病院皆無權。感謝上帝救台灣教會傳道者。
八、偕叡理牧師ê病
1900年6月偕牧師講話 sau 聲，掠做是感冒，到7月阮學生畢業閣無幾日，河南省有一英人宣教師女醫來淡水看偕牧師之病，即時診斷是喉癌，禁止偕牧師m̄通講話，對 hit-tia̍p 偕牧師無講話，攏用筆寫字。到開學ê時，偕牧師來教學生，坐 tī 台上，恬恬叫我替伊教學生，伊 teh 聽。一日過一日，病無較好，才去香港就醫。我代教，到學期學校停學，我才搬去踮鷺洲。偕牧師去香港有柯維思、陳清義、郭希信、陳錫，仝伴他去在香港四個月就醫，無較好，就轉來淡水。有一日病較傷重袂喘氣，請五行ê英人醫生來對頷頸割一空予伊喘氣。後來全家搬入台北，tī Hô-kau-thâu 稅厝，醫生逐日來看才利便。病症日日 ná 傷重，後來閣搬轉去淡水，到1901年6月2日受主恩召，死 tī 淡水57歲，來台灣30年久，埋葬 tī 淡水，出葬用外國式ê棺材，chèng 傳道 kā 伊扛。
九、偕牧師日常生活
偕牧師ê體真勇，若m̄是喉癌，會食到100歲。偕牧師規日直直行，行路真緊，大學前創真濟條路，路ê雙爿種樹，剪真媠真大欉，路是舖小基隆海墘粗沙，亦有螺殼，赤色真清氣真媠。Ku-lí 逐日 teh 修路牽線，齊齊真濟條路，第一媠就是大學前ê路，偕牧師逐日行遊tī遮ê路，無一枝草，罕得破病。偕牧師逐早起洗身軀，伊佮伊ê後生三頓食西洋食，伊 ê 某佮2个查某囝食台灣食，睏台灣眠床，穿台灣衫褲。到日本管台灣，才攏穿外國衫睏鐵眠床，伊踮一間大樓，抑有一間博物院內，磺物、逐項 ê 石攏有，青番 ê 物各項有，伊歇睏 tī 後面一間小樓。伊真閒全教會ê事伊家己辦，逐日著教神學逐日著考試學生，逐个拜六著巡教會，逐日12～2點著去醫館醫病人。伊亦是醫生，總是無醫生名，後來日本政府令偕牧師袂使 kā 人醫。當時神學全無教科書課本，逐課攏用筆記，攏是偕牧師家己 teh 教，到暗時做禮拜ê時，將今仔日所教出在伊叫何人上台，講今仔日simsím-mi̍h課，逐日教之書，逐暗試驗，到學期欲歇熱，歇年攏試驗，畢業亦免試驗，這是英國之法度。
熱天逐个牧師、姑娘著去日本、福州歇熱，偕牧師 m̄-bat 去歇熱，偕牧師 tī 社寮島（和平島），現時有買一塊土地佮一間樓，熱天攏 chhōa 學生踮遐海水浴，hit 个土地後來予日本政府強制收容去。偕牧師身體真勇，有外國拳頭真霸，佮學生相偃，伊一个讓3、4个攏輸伊，馬伊ê後跤掠–起來，馬恬恬袂走–去。偕牧師真歹性地，學生若有代誌當面大聲罵、jióng。伊真好膽，青番ê所在伊亦常常去，驚番ê所在伊亦去設教會。偕牧師到52歲有買一塊土地四甲種竹圍，hit 地真瘦，種逐項果子攏種袂起來。就中學運動埕起hit片開真濟錢袂成功，第二次大戰偕先生賣–去，偕牧師逐日去督工，想老–來欲tī遐隱居，無拍算才57歲就死，hit 時偕叡廉是tī香港讀高中，後來轉去加拿大讀高中，畢業才去美國讀，大學畢業了轉來台灣創立淡江中學，hit 時全島只有台北一中是日本人讀 ê 學校，台灣人一半 ê 是1911年10月 hit 時我tī淡水教神學，對偕先生khai大歡迎會，有辦50 tè 桌一 tè 桌＄2.80，柯醫師食錢佮kā人收錢，m̄ 佮我算起冤家，官廳ê中學無講，淡中是第一間ê中學，hit時代台灣人皆是讀師範學校國語學校，hit時宣教師吳威廉、宋雅各、約美旦、劉忠堅、マカイ（ma-khá-ih）先生，女宣會有金理、高哈拿，遮ê人攏tī淡水，猶袂徙來台北，是1914年ê中間。
十、宜蘭教會ê位置
1888年ê時排列tī下底
北關教會、頭城教會、打馬煙教會、番社頭教會、奇立板教會、加禮遠（按：宛）教會、波羅新仔宛教會、流流仔教會、南方澳教會、其武荖教會、真珠里簡教會、埤頭教會、達仔美教會、掃忽（按：笏）教會、斗門頭教會（董門頭）、三結仔街教會、新仔罕教會、武暖教會、其武蘭教會、大竹圍教會、基立丹教會、紅柴林教會、頂破布烏教會、下破布烏教會、天送埤教會、八王城教會、亞里史教會、銃櫃城教會。
宜蘭昔時名 Kap-chú-lân（甲子年）日本管台灣改名宜蘭，佮台北交通不便，去宜蘭比去唐山較 oh，宜蘭亦真少到台北行路著3日，對帆船著2日到基隆。宜蘭ê衙門前清時有宜蘭縣、頭城分縣，bē 有羅東街亦無蘇澳街，亦無三星街或是八里沙，這是日本時代才有，80年前頭城街鬧熱，因為頭城港真深，中國ê大隻商舟入頭城港倚岸大隻 o͘-chô 唐山船會入，不時來來去去，予頭城街真鬧熱，頭城對面海邊，海邊打馬煙社亦真鬧熱，教會真濟，行船漁魚真快活，hit 時海產真濟，大俗價一尾 iâ-á 魚3斤價錢3个錢（三文）。
十一、平埔人的生活
In 所踮ê所在較愛有近水、海、港、埤、池，有水通洗浴、通掠魚，in ê 事業耕作農業，80年前男女無穿褲無穿衫，是用裙圍下身、用番仔幔幔身軀，在室女用巾仔幔胸前，對 ka-chiah 仔縛咧，無眠床、睏竹綁ê 總鋪，無椅桌食飯 tī 塗跤，無碗箸食飯用手 ni，欲食著洗手，無鞋穿柴屐，伊ê柴屐佮日本柴屐親像用 tōa-pō͘-bú（大部拇）koeh teh，男女攏愛食烟愛食酒，無拜佛，只有敬天，愛食青物（chhiⁿ-mi̍h）chhiⁿ 豬肉 chhiⁿ 菜，逐項攏無煮就食，或是豉鹹ê物 in 愛食，有phē，有ê無 phē，網魚無蠓罩。囡仔出世隨時掠去洗冷水，若破病叫番仔女巫番仔司公來唸經，真厚譴損（khiàn-sńg），出門欲去街市行到半路若有 phit-lô-kê chiah háu 就行倒轉，若有死狗 tī 伊ê田，hit 坵田就 m̄ ti̍h，若 chhōa 某來，3日內若摃破碗就離緣。離緣真簡單，叫老番婆來 kā 雙爿講講，2个錢予女，女用2个錢予男，番仔話講 tèng-liú-pâi，按呢離緣。
十二、平埔人之勝敗
平埔人ê祖宗真早就來占台灣，有人講一千年前其祖公對南洋海嶼漁魚帆風船流來台灣，hit 時台灣已有青番，青番居高山，平埔居平地。300外年前，荷蘭之商船尋著台灣，荷蘭人管台灣，有政府亦有基督教，教會有一萬外人，攏是平埔人。在台南赤崁城，是荷蘭之首都，在淡水，英領事館是荷蘭人造之砲台，現時尚在。後來中國明朝敗於清朝，鄭國姓戰敗逃來台灣，荷蘭敗於鄭國姓，鄭國姓管台灣，後–來清國管台灣，清國政府優待平埔，賜彼「有大租」之權利，各人之田著納平埔人之大租每年一甲田，若干稻榖納平埔人，家家戶戶皆有收租榖，而且自己有田收獲食至真富裕到日本管理台灣十年久，政府對平埔人買收，以後即無可收。In ê 失敗 in 食飯有，食菜婦人去拾菜，逐項青草10項8項會食 teh，海墘之海菜10項9項會食teh，chhiⁿ 魚 chhiⁿ 豬肉青牛肉 chhiⁿ 田螺抑食，in 無椅無桌，食飯飯盤排 tī 塗跤，菜逐碗排 tī 塗跤，食飯無用碗箸是用手 mi，無床睏 teh 叉仔，無蚊帳，男女無穿衣服，是用番仔幔幔 teh，用裙（chhau-in）圍下身，有敬神，是天及因祖父公，若欲啉酒就先潑一寡 tī 地上，若破病就叫老番婆來用一枝竹仔 tī 塗跤拍，用一粒珠置一支銅箸嘛會 tiâu 就會好。逐年 khan-tiân 就是 tau-hē，若病好答謝ê意思，真厚譴損，聽鳥聲摃破碗，in 會快活，逐戶真富有，in 會失敗是逐个愛食酒貧憚做工，政府好款待 in，家己會使製造鹽，會使種作，限制政府禁止，in真戇攏 m̄-bat 字，逐个番社有人開店賒物＄1.00記＄10.00，田園攏予漢人 kó͘͘–去，風俗真 bái，一个男子娶20、30擺ê某，一个女子嫁20、30擺ê翁，所以會生湠人口年年較少，真快離緣，in ê 名 saⁿ-tâng 真濟，名叫男人之名 Tú-tái、Tú-iâu、A-tńg、Ang-ngâi、A-báng、A-tok、Hám-nâi，女子之名是叫做 Í-pai、Au-lin、Pâi-si、A-ún、A-me，平埔人無字姓，到偕牧師去設教才教 in 著有字姓，m̄ 知幾歲，所以有ê姓偕、姓郭、姓陳、姓潘、姓林佮in ê傳道仝姓，政府賜 in 每年一名秀才，in 貧憚愛食酒，年年較貧，常常離緣所以人口ná 少，in 戇戇予漢人食去了家伙，逐社有一个頭人 teh 管，名土目是較強較有勢，gâu 講話，bat 理ê人做土目（thó͘-bo̍k）。
十三、教會ê頭年老失敗
偕叡理牧師伊是頭一个來傳福音，當伊辦教會來ê 事，獨裁主義攏是家己發裁代誌，對母會來ê祕密無發表，雖然有別个宣教師，亦無權利通佮伊辦理。做閒人，教會是伊ê氣力來建設，照理伊著食長歲壽，無只有58歲（按：實歲57歲）就死，閣是艱苦死，喉癌手術拖年外才死，真可憐。伊ê艱苦死，嚨喉手術一空予伊喘氣，袂講話，著寫字，倒tī眠床1年外才死。親像這號人來拄著悽慘死，伊是功勞者，應該得著年後享福才合理，m̄ 知上帝ê旨意 cháiⁿ 樣？按呢伊一生所受ê艱苦我想袂曉 teh。
十四、嚴清華牧師
伊是頭一个來就近偕牧師，後來做牧師。 （全文完）
上一篇：
