Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎堃哥Khun-ko
龍年龍年 真趣味，十二生相 攏看伊，
鼠牛虎兔 龍上媠，逐个生囝 當這年。
十二年才 拄著伊，閣再延遲 無了時，
奉勸少年 愛拚勢，骨力生囝 為家己。
龍兒龍兒 來出世，可愛古錐 笑瞇瞇，
伊是天賜 的孩兒，逐个袂使 欺負伊。
互相照顧 才合理，今年豐收 大歡喜，
期待興國 基萬年，爸母健康 食百二。
龍年龍年 真趣味，天地內底 揣無伊，
時常聽伊 的名字，講伊蓋𠢕 無tè比。
想欲佮你 來相見，予人知影 你上媠，
無聲無影 足神祕，攑頭向天 走揣你。
傳說講甲 真稀奇，講伊會曉 為正義，
無論妖魔 偌交纏，拄著龍出 走去覕。
囡仔聽甲 足歡喜，欲哭欲吼 欲揣伊，
害阮 著怎樣解說，這个 真正的名義。
Lêng-nî lêng-nî chin chhù-bī, cha̍p-jī seⁿ-siùⁿ lóng khòaⁿ i,
Chhú gû hó͘ thò͘ lêng siōng-súi, ta̍k ê seⁿ-kiáⁿ tng chit-nî.
Cha̍p-jī nî chiah tú tio̍h i, koh-chài iân-tî bô liáu-sî,
Hōng-khǹg siàu-liân ài piàⁿ-sì, kut-la̍t seⁿ-kiáⁿ ūi ka-kī.
Lêng-jî lêng-jî lâi chhut-sì, khó-ài kó͘-chui chhiò-bi-bi,
I sī thiⁿ-sù ê hâi-jî, ta̍k ê bē sái khi-hū i.
Hō͘-siōng chiàu-kò͘ chiah ha̍p-lí, kin-nî hong-siu tōa hoaⁿ-hí,
Kî-thāi heng kok ki bān-nî, pē-bó kiān-khong chia̍h pah-jī.
Lêng-nî lêng-nî chin chhù-bī, thiⁿ-tē lāi-té chhōe bô i,
Sî-siông thiaⁿ i ê miâ-jī, kóng i kài gâu bô tè pí.
Siūⁿ beh kap lí lâi saⁿ-kìⁿ, hō͘-lâng chai-iáⁿ lí siōng súi,
Bô-siaⁿ bô-iáⁿ chiok sîn-pì, gia̍h-thâu hiòng thiⁿ cháu chhōe lí.
Thoân-soat kóng kah chin hi-kî, kóng i ê hiáu ūi chèng-gī,
Bô-lūn iau-mô͘ gōa kau-tîⁿ, tú-tio̍h lêng-chhut cháu khì bih.
Gín-á thiaⁿ kah chiok hoaⁿ-hí, beh-khàu beh-háu beh chhōe i,
Hāi gún tio̍h chóaⁿ-iūⁿ kái-soeh, chit-ê chin-chiàⁿ ê miâ-gī.
