(請安裝Taigi Unicode字形，配合Firefox瀏覽器可閱讀)
李南衡
隔壁文益 kā in 阿爸講，「公司做到 chit 禮拜，我工課辭掉 ah。」文益講話 ê 口氣那像不止輕鬆。「啥？又 koh 辭頭路 ah？」福伯直直看 in 後生文益，頭搖搖咧才 koh 講：「Chhun 個外月 tio̍h 過年，等年終獎金領了才辭 mā 猶未慢，你何 mí 苦 kah 錢賭氣咧？」In 子應講：「我若會按呢想，tio̍h 是文益。」福伯吐一個大氣才 koh 講：「像你 chit 種性格有影無人有法你，一年換二四 ê 頭家猶無位 thang 食尾牙。阮早前少年 ê 時若親像你按呢，一定會 hō͘ 序大人罵講：『水底睏無一位燒（Chúi-té khùn bô cht ūi sio.）。』大部分 ê 序大人攏無可能容允得。」無疑誤佇邊仔 sîn 話鬚 ê 十歲阿孫仔正雄問講：「那會無愛浸溫泉，逐位 mā 會燒！」福伯聽一下煞起愛笑講：「溫泉 hiah 燒，恁阿叔仔 mā 睏 bē 久！」正雄順勢問講：「阿公，你 tang 時仔 beh chhōa 阮去洗溫泉？」
愛洗溫泉 ê 福伯 hō͘ 阿孫仔問一下，心肝煞起 ngiau 起來，問講：「台灣 ê 溫泉有足濟種，你愛洗叼一種？」正雄應講：「我真濟所在攏猶 -bat 去過，去叼位 mā 好。Tio̍h la̍h，mài 去關仔嶺洗 hit 號『lo̍k 糊仔糜』tio̍h 好。」福伯講：「你 chit-ê 囝仔 知寶！Hit 種鹹土糜溫泉 -nā 對咱皮膚 ê 健康有幫助，有一寡腳冷手冷 ê 人定定去浸，會有改善，身軀 khah 會燒 lō。佇花蓮縣瑞穗，溫泉 ùi 土底噴起來 ê，看 tio̍h la-sam la-sam ê 款，是因為內底有真懸 ê 鐵質，才會看 tio̍h 淺淺 ê 紅紅黃黃，那像鐵銑水咧，洗起來有另外一種感覺。」
正雄講：「我聽阮同學講，in 厝裡 ê 人 bat chhōa in 去陽明山洗溫泉，講鼻起來有小可臭臭。」福伯解說講：「He 是硫磺 ê 味。咱若 beh 去北投抑是陽明山洗溫泉，會使先去陽明山後山抑是新北投『地熱谷』看當 teh 出煙 ê 山谷。陽明山 kah 北投 ê 硫磺溫泉有白磺溫泉 kah 青磺溫泉，白磺溫泉牛奶色，對皮膚、美容、呼吸道有幫助。青磺溫泉小可青色，對慢性皮膚病、關節炎有改善 ê 功效。干單北投有鐵磺溫泉，溫度 khah 無 hiah 懸，mā khah 無臭味，小可薄茶色，對神經痛、皮膚病、風濕病有治療 ê 功效。熱天時，我才 chhōa 你來去宜蘭蘇澳冷泉公園浸冷泉，咱講『冷泉』其實是差不多二二度，但是因為熱天熱熱，你會感覺水特別冷。你一下落去水底有影會『ki』一聲。你若無注意偷飲一嘴，會驚一下，那像無摻糖 ê 汽水。無 m̄-tio̍h，冷泉水質 tio̍h kah 汽水 ê 原料仝款，日本時代有日本人來 hia 用冷泉水做“ramune”恁 chit-má 講作『彈珠汽水』。」
你若 kā 少年人講 chit 句台灣俗語話：「水底睏無一位燒。（Chúi-té khùn bô cht ūi sio.）」伊完全 m̄ 知 chit 句話啥意思，真有可能問講：「那會無愛浸溫泉 tio̍h 會燒？」
