(請安裝Taigi Unicode字形，配合Firefox瀏覽器可閱讀)
作者：mûi-á.
佇我少年 ê 時，有一位 ta-po͘ 聲樂家佇教會用華語唱這首歌，〈我不知明天將如何〉，歌詞真感動，旋律真好聽。我知影這首歌原本是英語，所以我也學唱英文版 ê 歌 I don’t know about tomorrow。英語歌詞佮華語 ê 內容意思仝款，攏是唱出對主 ê 倚靠。有主佇頭前導路，呣免驚，無論好天抑是烏暗天，有主同在的確穩當，因為主掌管明仔日，主牽我 ê 手一路陪我行。當我心情鬱卒，我會唱這首歌來安慰佮鼓勵家己。
佇2009年，我拿到這本新版 ê 《聖詩》，真好奇有啥物歌是佮舊 ê 無仝，結果我真意外發現這首歌佇裡面，而且是台語歌詞。我心中有講袂出 ê 歡喜。詳細讀伊 ê 台語歌詞，hō͘ 我足感動，因為用台語唱上有感情，一面唱一面感覺親像細漢 ê 時阿爸牽我 ê 手teh 行路。台語是我 ê 母語，用伊來唱歌上自然，上親切，上有法度表達內心情感。魚佇水中游，鳥佇空中飛，用母語來謳咾上帝就是咱 ê 天性。
我真佩服翻譯者 kā 歌詞翻譯做遮爾媠 ê 台語，充滿對主 ê 倚靠、信任佮向望。逐日佮主同腳步，永遠袂驚惶嘛呣免擔憂，因為咱深知主掌管明日。感謝教會音樂委員會 kā 這首歌編入《聖詩》，hō͘ 我學會曉用三種語言來唱這首歌來謳咾上帝。
