(請安裝Taigi Unicode字形，配合Firefox瀏覽器可閱讀)
作者：李南衡
福伯 koh teh 批評時事。伊 the̍h 報紙 hō͘ 我看，罵講：6月30暗，中國《港版國安法》生效，7月初一 tio̍h 開始掠人。我問講，《香港版國安法》是 in 香港人 ê 代誌，共咱台灣值（tī）大代？伊目睭直直看我，應講：值大代？關係足大咧！《港版國安法》第38條講，無香港特別行政區永久性居民身分 ê 人，意思是講：雖然 是香港人，但是佇香港特別行政區以外 ê 地區，做出《港版國安法》內底所提 tio̍h ê 對香港危害國安行為，mā 適用本法；第36條講，任何人佇香港特別行政區內實施本法規定 ê 犯罪，犯罪行為抑是結果只要有一項佇香港發生，包含佇香港註冊 ê 船隻抑是飛機頂頭，攏適用本法。意思是講，雖然咱台灣人佇台灣，準若支持台獨、參加台獨、抑是港獨活動，攏有牽涉 tio̍h 違反《港版國安法》。Tio̍h是講，無論你是不是香港人、mā 無論你是 是佇香港，只要 in 認為你犯 tio̍h 《港版國安法》，tio̍h 有可能 hō͘ in 認定是嫌疑犯，若有入境香港抑是中國 tio̍h 有可能 hō͘ in 掠去。Chit-ê《港版國安法》會使講是包山包海、管到全世界、管所有 ê 人。設使一個美國人佇美國國內喝支持台灣獨立，mā 已經犯 tio̍h《港版國安法》，無論伊是去香港抑是中國，抑是坐 tio̍h 香港註冊 ê 船隻抑是飛機，抑是過境香港，攏有可能 hō͘ in 掠去。
福伯 koh 講，7月初五，前總統馬英九佇中國國民黨革命實踐研究院民主實踐營講習班結業式講話，伊 -nā 無譴責中國政府半句，顚倒講咱台灣政府 《國安五法》、《反滲透法》，bē 輸《港版國安法》，攏是侵犯人權。福伯起歹罵講：馬英九 chit-ê 人「目睭金金，人傷重！」（Ba̍k-chiu kim-kim, lâng siong-tiōng！）我真久無聽 t chit 句話，緊講：「福伯，你 mā mài 罵 kah hiah 歹聽。」伊應講：「我是講實在話那有罵伊？你看伊目睭金金若像一个好好人，但是你聽伊講話，tio̍h 知影伊人已經病 kah 真傷重，直直 beh 無醫 ah！」
伊 koh 講，7月初九，咱陸委會副主委兼發言人邱垂正，佇例行記者會強調講，咱國 ê《國安五法》是透過民主立法 ê 程序，《港版國安法》完全閃過香港 ê 立法機構，無民意基礎，而且是人民會因為言論煞 hông 定罪 ê 法令，兩個完全無仝。咱台灣 ê《國安五法》kah《反滲透法》是透過民主立法程序，佇必要 ê 範圍內底強化民主防衛，是憲政體制 ê 正常運作，《反滲透法》針對法律原本 tio̍h 禁止 ê 不法行為，相關規範並無限制憲法保障人民言論 kah 表意自由。Chit 幾年真濟民主國家 mā 攏有採取法治作為，防範境外勢力不法滲透 kah 破壞。
福伯煞問我：「你講，馬英九前總統病了有傷重無？我敢有枉屈伊？」
