【少年新眼光台文】看見苦痛

(請安裝Taigi Unicode字形,配合Firefox瀏覽器可閱讀)


少年新眼光 2021年1月2日
Iok-pek-kì 約伯記 2:1-13

Hit時約伯三個朋友聽見伊 tú-tio̍h 一切 ê 苦難,ta̍k-ê tùi in ê 所在來;就是 Thê-bān 人 Í-lī-hoat,Su-a人 Pí-le̍k-ta̍t,Ná-má人 Só-hoat;in 相約相 kap 來悲傷,安慰伊。In 遠遠 kia̍h 目看,bōe 認得伊,就大聲啼哭;ta̍k 人拆裂外衫,ǹg 天掖土粉 tī 家己 ê 頭殼。In 就 kap 伊坐 tī 土腳七日七暝,無 kap 伊講一句,因為 in 看見伊 ê 痛苦真大。 Iok-pek-kì 2:11-13

看見苦痛

約伯對規欉好好ê 好額人變做家破人亡、身軀生毒瘡。當約伯 ê 朋友見著伊,一開始是bōe認得伊,後來就大聲啼哭,koh 陪伊七日七暝;無親像約伯ê 太太khau-sé (剾洗)約伯。朋友靜靜坐 tī 邊仔pôe,káⁿ-ná(敢若)是約伯較需要 ê。

人有財富、囝孫、宗教信仰、智慧,人也免不了面對苦難。怎樣去面對,是重要 ê課題。當身軀邊 ê人身苦病痛,咱有時不確定應該著講啥物,也驚講m̄-tio̍h話紲來傷害對方。佇這段經文中,約伯 ê朋友因為「看見伊 ê 痛苦真大」,就恬恬來陪伴伊,是真好 ê 例。

聖經人物不時幫贊咱思考現實問題。聖經學者 Walter Bruggemann 用創世記中 ê 人物來做例,「佇理性中間,必須 kap 悲哀 ê 氣力共存」(註)。信仰無欲 hō͘ 咱忽略苦痛,反轉,是欲 hō͘ 咱學習怎樣同理、怎樣疼人。主耶穌親身「看見苦痛」。這款信仰, hō͘ 咱有溫暖通陪伴其他 ê 人,更加體會主 ê 同在。

祈禱:主啊,祢看見我 ê 苦痛,祢是我上大 ê 倚靠,當我佇苦難、創傷 ê 中間,求祢陪伴我。奉主耶穌基督的名求,阿們。

我有話要說