淺談男女ê性體及神體

(請安裝Taigi Unicode字形,配合Firefox瀏覽器可閱讀)

作者:陳柏壽

一般來講,人類 ê 生存常常需要偶像。偶像就是人崇拜 ê 對象,是會當將家己全精神及生命奉獻 ê 對象。所以看著戀愛 ê 男女,因為愛情受阻擋,常常做伙去死 ê 情形。人一生互相倚靠 ê 老伴,忽然轉去他界 ê 時,伊自按呢失去伊心內 ê 偶像,生命開始衰微,漸漸進入死亡,因為久長生活 ê 夫妻,對方就是伊 ê 偶像。

你袂使(bōe-sái)踏入我 ê 偶像 ê 聖域,我心內 ê 偶像是我一切 ê 一切,是我生命 ê 紅線。男女關係 ê 性行為就是阮 ê 紅線,不准任何第三者入侵。人深信,我 ê 偶像會互我 ê 生命閣較完全,對方就是我活落去唯一 ê 意義及目的。

佇西雅圖,我一位真和諧古意 ê 台灣人朋友,無想到伊 ê 囝去刣死伊同性戀 ê 同伴,閣食伊 ê 肉,理由是因為「伊真疼伊!」無論同性戀或是異性戀,性有時會變做一項可怕 ê 代誌。人結婚了後,毋是(m̄ -sī)欲霸占對方 ê 肉體,是互相包容,互相體貼,不可強求對方。(哥林多前書7章4節)

男女性行為 ê 心理出發點,是欲占有對方。一切攏為著家己、滿足家己 ê 慾望,為著生存、傳種,這是一種人 ê 本能。這種動物本能,若是引發出來,會親像森林 ê 野火,一發不可收拾,to̍h 到家己及對方完全消滅為止。人類社會有色狼 ê 現象就是按呢,無法度控制家己。這種禁袂牢(kìm-bē-tiâu)ê 性心理,聖經講是一種「火燒山」(pyrousthai)ê 心理,有欲閣再有,一直燒互伊死為止,大家攏總死 ê 心理。這就是保羅佇哥林多前書7章9節所講,是一般人動物性 ê 一部分。

差不多所有人 ê 性衝動攏有火燒山現象,燒了以後,心內猶剩火尾,猶 teh to̍h,紅紅 ê 慾火,佇心內。當人看著性 ê 對象,就會擾動心內 ê 火燼,進行無適當 ê 衝動 ê 行為,因為人有雜交 ê 動物傾向。一切 ê 失敗攏是對淫亂開始。大衛王朝 ê 毀敗,也是對淫亂開始(撒母耳記下11~13章)。

多數 ê 人攏認為,性是一種心內滿足及完成 ê 過程。對人生較有經驗 ê 人會知,性袂當達到生命 ê 滿足:愈 chhōe 性愈空虛,愈袂滿足心靈 ê 需要。童話故事 ê 白雪公主自從破解魔咒,脫出後母 ê 控制,和王子做伙以後,in ê 一生「從此永遠過著幸福快樂的日子」嗎?若是回想咱家己 ê 過去,情況可能毋是按呢。

男女親密結連,尤其是肉體 ê 結連,無一定是人生幸福及圓滿 ê 條件。主耶穌絕對無愛將相愛 ê 男女分散拆開,主耶穌絕對袂認為肉體 ê 結合是一種罪。但是咱若將肉體 ê 結合變做一種偶像崇拜,我想絕對毋是耶穌福音 ê 原意。咱 tio̍h 將偶像及咱 ê 性體轉換,轉換做上帝 ê 形像,上帝 ê 神體,應該是較好。

偶像是不動 ê;上帝 ê 神體是振動 ê,親像日頭按呢,隨時互咱溫暖,是一個活動及變動 ê 主體。基督教是 teh 教導咱有一位時時包圍咱,引 chhōa 咱進前 ê 上帝。上帝無愛咱進入固定不變 ê,崇拜偶像 ê 世界。咱 ê 身軀代表上帝 ê 神體,是上帝 ê 殿。(哥林多前書3章16節)

保羅認為耶穌就是上帝 ê 神體,也是人類 ê 新亞當,耶穌是代表人類 ê 典型。所以親像耶穌保持單身,無結婚;保羅一生嘛保持單身,無結婚。In 二人也是代表一種人類生命 ê 典型。所以保羅認為有結婚或無結婚,攏是上帝 ê 恩賜。耶穌甚至認為 hiah-ê 做閹人、宦官,嘛是彼種人 ê 恩賜。各人有各人無仝款恩賜,有結婚、無結婚,攏袂當分好歹。(哥林多前書7章7節;馬太福音19章12節)

保羅認為結婚及單身,毋是好歹 ê 問題。問題是在佇人 ê 性行為,對社會影響 ê 好䆀(bái)。因為性行為毋是人生最高 ê 目標,人生最高 ê 目標在佇貢獻互伊 ê 社會,貢獻互伊 ê 大我。欲按怎維持、利用性 ê 衝動,來做利益別人及社會 ê 代誌,做利益大我 ê 行動,是人生最重要 ê 課題。

所以,所有性行為攏著受規範及控制。保羅認為,若是會當,無結婚或無翁某 ê 人,最好來學伊,做單身人;若是有火燒山 ê 性慾,控制袂牢 ê 時,才去結婚。(哥林多前書7章8~9節)保羅 ê 教導毋是叫人壓制性慾,是勸人著經由性 ê 衝動,來做利益眾人及社會 ê 動力。

保羅認為,若是會當保持單身當然真好;但是對結婚 ê 人來講,性嘛毋是結婚最後 ê 目的,所以咱 tio̍h 訓練家己,tio̍h 設出一段時間無做性行為,專務進入祈禱,來保持基督徒高超 ê 精神境界(哥林多前書7章5節)。祈禱是訓練咱付出及犧牲家己,毋是欲占有。祈禱會添補性 ê 空虛,祈禱會互咱看著人生真正 ê 目標及進路。

性是現代人 ê 聖域,但是主耶穌 ê 主張,是講性袂當滿足人生。因為主耶穌 ê 福音,超越人類性 ê 境界,超越男女偶像 ê 性 ê 世界。咱有一日轉去上帝 hia,佇上帝國人無娶亦無嫁,人人攏及天使一樣,一切攏平等。佇 hia 攏無死人,人人攏是活人,人人攏是上帝 ê 神體,已經無閣分男女、夫婦、單身、雙性、變性、種族、地位、半遂 ê、隱痀 ê、啞口 ê、睛瞑 ê ……人。大家佇上帝國攏是上帝 ê 子女,一切攏平等。佇 hia 咱欲用上帝賞賜咱 ê 神體,當頭對面朝見創造 ê 上帝。(馬太福音22章30節;路加福音20章34~38節)

我有話要說