(請安裝Taigi Unicode字形,配合Firefox瀏覽器來讀)
作者:蘇晏德
正月一年欲開始 Chiaⁿ–goe̍h chi̍t-nî beh khai-sí
新年恭喜喙甜甜 Sin-nî kiong-hí chhùi tiⁿ-tiⁿ
提著紅包足歡喜 The̍h tio̍h âng-pau chiok hoaⁿ-hí
祝福開春大趁錢 Chiok-hok khui-chhun tōa thàn-chîⁿ
二月百花滿樹叢 Jī–goe̍h pah-hoe móa chhiū-châng
斑芝開甲紅紅紅 Pan-chi khui kah âng-âng-âng
花蕊當開有夠芳 Hoe-lúi tng-khui ū-kàu phang
沿路散步人輕鬆 Iân-lō͘ sàn-pō͘ lâng khin-sang
三月信徒痟媽祖 Saⁿ–goe̍h sìn-tô͘ siáu Má-chó͘
千里法眼掠妖魔 Chhian-lí hoat-gán lia̍h iau-mô͘
順風大耳聽訴苦 Sūn-hong tōa-hīⁿ thiaⁿ sò͘-khó͘
祈求上帝落春雨 Kî-kiû Siōng-tè lo̍h chhun-hō͘
四月桃來李仔去 Sì–goe̍h thô lâi lí-á khì
桃仔李仔攏落蒂 Thô-á lí-á lóng lak-tì
西北雨來走袂離 Sai-pak-hō͘ lâi cháu-bē-lī
雞鴨趕緊走去覕 Ke-ah kóaⁿ-kín cháu-khì bih
五月縛粽扒龍船 Gō͘–goe̍h pa̍k-chàng pê-lêng-chûn
鑼鼓齊響有氣氛 Lô-kó͘ chê hiáng ū khì-hun
拚看啥人著冠軍 Piàⁿ khòaⁿ siáⁿ-lâng tio̍h koan-kun
祝咱風調閣雨順 Chiok lán hong tiâu koh ú sūn
六月日頭火燒埔 La̍k–goe̍h ji̍t-thâu hóe-sio-po͘
大地一片像火爐 Tōa-tē chi̍t-phiàn chhiūⁿ hóe-lô͘
曝甲身軀烏烏烏 Pha̍k kah sin-khu o͘-o͘-o
向望落雨淋焦塗 Ǹg-bāng lo̍h-hō͘ lâm ta-thô͘
七月中元慶普渡 Chhit–goe̍h tiong-goân khèng phó͘-tō͘
好兄弟仔真無辜 Hó-hiaⁿ-tī-á chin bô-ko͘
祭拜亡魂來孝孤 Chè-pài bông-hûn lâi hàu-ko͘
食飽請恁緊上路 Chia̍h-pá chhiáⁿ lín kín chiūⁿ-lō͘
八月中秋食月餅 Peh–goe̍h tiong-chhiu chia̍h goe̍h-piáⁿ
情人約會雙人影 Chêng-jîn iok-hōe siang-lâng iáⁿ
定情誓約關仔嶺 Tēng-chêng sè-iok Koan-á-niá
明年加添寶貝囝 Mê-nî ke-thiⁿ pó-pòe kiáⁿ
九月風吹滿天飛 Káu–goe̍h hong-chhoe móa-thinⁿ-poe
秋意涼風來相陪 Chhiu-ì liâng-hong lâi siong-pôe
風吹佮線訴情話 Hong-chhoe kah sòaⁿ sò͘ chêng-ōe
雙人感情閣加倍 Siang-lâng kám-chêng koh ka-pōe
十月日頭像發翅 Cha̍p–goe̍h ji̍t-thâu chhiūⁿ hoat-si̍t
趕緊出門去作穡 Kóaⁿ-kín chhut-mn̂g khì choh-sit
日頭真緊著消失 Ji̍t-thâu chin kín tio̍h siau-sit
動作若慢領袂直 Tōng-chok nā bān niá-bē-ti̍t
十一月份積年貨 Cha̍p-it goe̍h-hūn chek-nî-hòe
準備挲圓過冬節 Chún-pī so-îⁿ kòe tang-choeh
為著好好過年尾 Ūi-tio̍h hó-hó kòe nî-bóe
向望生活無欠缺 Ǹg-bāng seng-oa̍h bô khiàm-khoeh
十二月份等過年 Cha̍p-jī goe̍h-hūn tán kòe-nî
家家戶戶添喜氣 Ke-ke hō͘-hō͘ thiam hí-khì
等待二九的暗暝 Tán-thāi jī-káu ê àm-mî
準備圍爐來團圓 Chún-pī ûi-lô͘ lâi thoân-îⁿ