(請安裝Taigi Unicode字形，配合Firefox瀏覽器來讀)
作者：Pháiⁿ-gín-á Oan-lí-siā
自 hit 日了後，才知原來「癌」字是 án-ne 寫！
腰脊骨不時有針 leh ui leh chǹg
頭毛 1 支 1 支 kā 我講再會
2 港燒燙 ê 血 mā 不時 ùi 鼻空唱出哀怨 ê 戲曲……
Hit 暝，地牛無法度 koh 吞落粒積長久 ê 怨
Kap 海龍王聯手報復對世人 ê 不滿
人類目 chiu 金金看 chit 場 ka-tī 創作 ê 大戲 m̄ 知截止
政府官員 an-tah 民眾 ê 白賊話 iû-goân 掩 khàm 袂稠 in ê 無能
看現現 ê 歷史事件 hông 當作是科幻電影 ê 劇情無法度激起反思
Siáng 知落尾目 chiu 前 ê 景緻已經歸屬阿鼻地獄 ê 一州
運命變調演奏 ê 奇巧驚醒拄 teh 深眠 ê 人
枵飢 ê 海湧 1 chhùi 1 chhùi 將故鄉拆食落腹 kan-taⁿ chhun 烏白 ê 記持
記持伸長頷頸祈求赦免，頭 chhih-chhih 承認咱人無知 ê 罪過
日頭 ê 光失去了重量搖來搖去，時間也來堅凍徙袂轉去過去
月娘 ê 笑容換作聲聲哭啼 hoah 冤，天星 1 粒 koh 1 粒接 sòa 墜落
電影「世界尾日」leh 搬 ê 高潮 mā 無 hiah 真，hiah 明
隔日早，大大 ê 香菇雲衝 kàu 天頂向驕傲 ê 世人宣示無知 ê 後果──滅絕
Ùi 四方射出赤 iāⁿ ê 火光燒 thàng 皮膚
四界喊 hoah ê 鬼 á 聲有無仝款 ê 色水：大人、gín-á、查埔、查某……
故鄉 ê 面容浮現 1 條 koh 1 條 ê pit-sûn 流出思念 ê chhoah 流
偷偷 á 將遺言寄付 hō͘ nih 跤尾 ê 風
Ōm-sà-sà ê 樹林 khàm 1 嶺烏 sô-sô ê 眠積被
Tiām-tiām 安歇 m̄ 願 koh 再為時間喘 khùi
厚話無定性 ê 溪河 hiông-hiông 面 àu 面臭
講天頂 ê 火燒雲燒 kah 心狂火 to̍h
街 á 頂 ê 樓 á 厝連紲 poa̍h 倒代表抗議人 ê siáu 貪
密謀者派暗殺手將同情 kap 仁慈 thâi 死佇半路
Chit 場悲慘世界完全展現前衛藝術 ê 精神
半冬後，轉去 ê 路 jú 來 jú 遠看無尾
記持漸漸褪色 時間企圖沖散思念
Ta̍k-pái 起風落雨故鄉 ê 聲 tō 藏 tī 每 1 粒雨珠
用青狂 ê 速度走向熟似 koh 生份 ê 土地
巡邏發 hông ê 空 chhùi 當時才會結疕
愛 chhàng-chhiu ê 海湧暫時無聲無說
開始思考同情 chit 項 mi̍h 是 siáⁿ-mi̍h 元素製造–ê
看，袂赴離開 ê 親人影跡 koh leh 守護家園
聽，in ê 聲音埋 tī 塗–lih leh haiⁿ 哭
半暝三更時，蟲豸、鳥 á、貓 á kap 狗 á 相招做伙
Kā 掖落來 ê 月光咬碎好 thang 偷偷 á 講心事
討論 án-chóaⁿ 霸占 chit ê hông 放 sak ê 島嶼，無人知影
耳空邊，洗袂清 ê 惡夢不時 leh
窗外 koh 再看起物質 ê 享受 kap 環境 ê 剝削 khiú 大索 ê 戲齣
死神準備 1 條鐵鍊 á 笑笑聽候
我看 khóng ê 天，斑芝替我設計一軀血衫掩 khàm 空 chhùi
日頭斜光 mā 無閒鬥相工補 thīⁿ
人類 siáu-tham ê 烏空 soah 直直 leh 吸
將最後 ê 希望 kap 贖罪 ê 機會 phah-ka-làu
Tī 欲走進前，用最後 ê 喟力 me 1 me 種子 iā 向天頂
向望風送 1 程
降落我欲沉眠 ê 所在，結束惡夢
