(請安裝Taigi Unicode字形，配合Firefox瀏覽器來讀)
作者：李南衡
中美貿易談判談 beh 歸年，中國代表劉鶴 kā 談好 ê 案提轉去中國，中國國內那像無 beh 簽、想講上好是會 tang koh 談、談出一個 koh khah 有利 ê 條件。無疑誤美國 Trump 總統煞起生氣，5 月初 10 宣布 ùi hit 日開始，價值美金 2000 億 ê 中國產品 ê 進口稅 ùi 10% 調懸到 25%。Koh 放聲講，談好 ê 條件若無 beh 緊簽，另外美金 3000 億 ê 中國產品，進口稅 mā beh ùi 原本 ê 10% 調懸至 25%。
有人問伊中國講 beh 報復，調懸美國輸入中國 ê 美金 600 億產品，若 kā 美國農產品加稅，美國 beh 按怎應付？Trump 總統應講真簡單，5 月初 10 調懸進口稅至 25%，美國一年會tàng 增加美金一千億 ê 收入，我提其中 ê 美金 160 億來補貼美國農民，in tio̍h歡喜 kah beh 死 ah。有啥問題？隔壁阿水叔仔看電現新聞看 kah 笑 hai-hai，煞拍 pho̍k 仔喝講：「讚讚讚！美國 Trump 總統會曉『用伊 ê 土塗伊 ê 壁。（Iōng I ê thô͘ kô͘ I ê piah.）』，實在是好厲害！」
厝裡 ê 序細攏 mā 聽 kah 霧 sà-sà，問講是按怎美國提懸中國產品 ê 進口稅，會牽 kah 用啥物土糊啥物壁咧？聽序細按呢問，阿水叔仔誠歡喜，當然無講一下 bē 煞。伊講，早前台灣上方便上俗 ê tio̍h 是起土埆厝，用紅仁土烏土混合，kā 農家逐個攏有 ê 稻稿草切作一節一節，koh 摻粗糠 kah 水落去攪 hō͘ 齊（chiâu），人 ê 腳無夠力，有時會牽牛來踏。而後才挖落去一個四角柴框內底 ji̍h hō͘ cha̍t，才 kā hit-ê 柴框好勢抽起來，才 koh 造第二塊土埆。
做好 ê 土埆排歸排出在伊吹風曝日。等土埆乾了後 tio̍h 會 tàng 一塊一塊疊作一堵一堵 ê 壁起厝。一般攏是用大枝竹管曝乾了後作柱仔。因為土埆上驚雨水浸澹浸久，一般攏會砌石板抑是石頭作地基。因為土埆厚，所以土埆厝內熱天涼爽、寒天 bē 真冷；土埆無夠堅固，干單會 tàng 起一樓平屋。缺點 tio̍h 是驚地動 kah 風颱雨。早前台灣上普遍 ê 厝 tio̍h 是土埆厝。「用伊 ê 土糊伊 ê 壁」，tio̍h 是用伊 ê 土糊伊土埆厝 ê 壁。Chit 句俗語話有幾種意思。第一種是講 kā 伊 ê 資源用佇伊 ê 身上，咱並無損失；第二種 ê 意思是講用伊 ê 方法來治伊、siáng 驚 siáng？小可有報復 ê 意思。Chit 句俗語話 ê 意思，mā 會使講是兩個無相 phiⁿ ê 意思。
日本殖民統治台灣了後 ê 20 世紀初期，引進西方製作紅磚的技術，紅磚 ê 生產量大 koh 品質穩定，官廳 ê 新式建築開始大量用紅磚建築，民間 ê 紅磚大瓦厝 mā 才慢慢普遍，以後才進步到鐵筋混凝土 ê 的建築。現代式 ê 厝，厝外厝內 ê 壁攏抹 kah 誠 súi，你用伊 ê 土糊伊 ê 壁，beh hông 罵死講！Chit-má 連佇庄腳 mā 真罕得看 tio̍h 土埆厝 ah，你講「用伊 ê 土糊伊 ê 壁」，可能無人知影你 teh 講啥！
李南衡《那teh褪色的台灣俗語話》（1-2冊 )已經出版，歡迎來交關，做伙進步
