(請安裝Taigi Unicode字形，配合Firefox瀏覽器來讀)
作者：MnL Huī-bîng
佇菲律賓華人社會，主要使用 ê 語言是「咱人話」。In 將閩南語號作「咱人話」，意思就是咱人家己所講 ê 話。自西班牙猶袂統治菲律賓 ê 時，就已經有華人佇菲律賓做生理 ê 文獻紀錄矣，400 年來咱人話一直攏存在佇菲律賓這塊土地頂懸。1899 年菲律賓頭一間華人學校「中西學院」（Tiong-Se Academy）ê 英文名就是用咱人話來號名。甚至是 1926 年引進中華民國 ê 華語教育體制使用佇菲律賓 ê 華校內底，上課 ê 語言仝款攏是以咱人話為主。
毋過根據中正學院 ê 校長潘露莉博士講：「因為菲律賓華校當初時是效忠中華民國 ê，所以當時台灣所推捒 ê 國語運動也深深影響著菲律賓 ê 華校。」也就是講，佇菲律賓 ê 華校開始不准老師 kap 學生講咱人話，雖然無親像台灣彼當陣愛掛狗牌、罰錢這款汙辱人 ê 行為，毋過煞會予執行語言政策 ê 老師當逐家 ê 面來指責，一斷就是欲 30 年，害這馬 ê 少年父母真濟攏無法度講咱人話，閣較莫講學生囡仔矣。所以潘校長對這種 ê 轉變感覺非常無彩，一直希望會當予咱人話閣活轉去少年人 ê 喙裡。
所以，潘校長任內一直咧推行「三文四語」，英文、華文、菲律賓文；英語、華語、咱人話（閩南語）kap 菲律賓語。佇幼稚園時期，完全攏使用咱人話來 kap 學生講話，佇小學 ê 數學課內底有分咱人話上課 kap 英語上課，這兩款語言 ê 數學課攏是正式課程，占 ê 分數攏仝款。毋過到初中了後，就無咱人話 ê 課矣，無法度延續學生對咱人話 ê 認捌。校長認為，菲律賓華人社會目前亦是以咱人話為主，若是佇初中斷去矣，未來大學畢業了後，欲佇咱人社會食頭路，袂曉講咱人話是非常食虧 ê 事志，所以校長希望阮會當安排咱人話 ê 課程 kap 教材，予初中部 kap 高中部 ê 學生通利用逐禮拜三 ê 中文導師時間（50分鐘）來接觸。
初初開始，阮所安排 ê 課程是以較輕鬆 ê 角度來切入，而且是以「聽 kap 講」為主，因為大部分 ê 學生對咱人話 ê「聽力」較熟手，所以安排較濟影片、歌曲 kap 對話欲來引起學生 ê 興趣，閣來就是沓沓仔予學生開喙講咱人話。對學生來講，咱人話干焦是佇厝 kap 阿公阿媽講話 ê 語言，是一種「家庭語言」，毋過這馬煞是欲將咱人話包含佇學校 ê 課程，愛佇教室內底講咱人話。煞落來就是一寡仔較心適趣味 ê「緊喙唸」（繞口令），予學生感覺講咱人話 ê 過程是好耍閣有挑戰性 ê。
雖然因為增加咱人話 ê 課程，予阮 ê 工作量閣較重矣，毋過會當予咱人話正正當當囥佇課程內底，嘛會當予學校加一款語言，阮也替學校 kap 咱人話感覺真歡喜。
