刣狗mā chit身, 拜醮mā chit身!Thâi-káu mā chit-sin, pài-chiò mā chit-sin.

(請安裝Taigi Unicode字形,配合Firefox瀏覽器來讀)

作者:李南衡

有一位老紳士,逐禮拜來禮拜堂做禮拜一定穿 kah 真飄撇。有一遍我請教伊那會 chiah 呢注重穿插。伊應講:「無。我平常時 mā 是凊彩穿,無特別去注意。但是禮拜日來禮拜堂敬拜上帝,我一定穿 kah 足整齊足清氣。」伊搖頭講:「有人『刣狗 mā chit 身,拜醮 mā chit 身。(Thâi-káu mā chit-sin, pài-chiò mā chit-sin.)』有人講作『刣牛也 chit 身,拜佛也 chit 身。(Thâi-gû iā chit-sin, pài-pu̍t iā chit-sin.)』。」

我問講:「你講 chit 兩句台灣俗語話是啥物意思?拜醮是創啥物?」伊解說講,chit 兩句俗語話意思仝款,只不過表現 ê 方式無仝。攏是 teh 供體人無看場合穿適當的衫,真無體統。無管是刣狗抑是刣牛,衫褲難免會有一寡血跡,穿仝 hit 軀衫褲去拜醮抑是拜佛,攏真無適合,會使講是對 in-ê 神不敬。拜醮有人講「做醮」,拜醮上普遍 ê 理由是求平安,有 ê 是下願、有 ê 是謝願(還願),一個庄頭有可能三年、五年抑是七年拜一遍醮,拜醮 tio̍h 聘請師公(道士)來主持一寡儀式,往往是兩工以上 ê 隆重公共祭典。邀請外庄頭 ê 親成朋友來看戲、來鬥鬧熱、來食一頓 chheⁿ-chhau。Khah 特別 ê 是,主辦者(爐主)會要求歸庄頭 ê 人,tī 拜醮進前 ê 三工 tio̍h 食菜(食素食),按呢你 tio̍h 知影拜醮是偌呢慎重 ê 代誌,逐個當然攏 tio̍h 穿清氣整齊 ê 衫。

我笑講:「我看你來做禮拜所穿 ê 衫,攏會想講你是 beh 去參加啥物人 ê 結婚典禮。」伊笑笑仔應講:「無 oh!」才慢慢仔講:「因為做生理 ê 關係,我少年 ê 時定定去日本,加減有交一寡日本朋友。交際應酬有時 mā tio̍h 專工飛去日本,參加人 ê 婚禮抑是告別式,入鄉隨俗 tio̍h 探聽學會曉一寡上基本 ê 禮儀。聽講日本 ê 查埔青年學校畢業第一項代誌 tio̍h 是買兩軀烏西裝:一軀是參加婚禮 ê 燕尾服,穿白色 ê siá-chuh、結一條金色 ê ne-khú-tái,另外一軀是參加告別式 ê 普通鳥西裝,穿白色 ê siá-chuh、結一條烏色 ê ne-khú-tái。你佇式場內底,絕對 bē 看 tio̍h 烏式以外 ê 西裝。女性 mā 無人會穿五花十式 ê 衫。我等別注意,日本 ê 大細車頭 ê 賣店,一定有賣烏色 kah 金色 ê ne-khú-tái,hō͘ 人應急。佇台灣去參加告別式(咱教會講是追思禮拜),無管男性女性、啥物色 ê 衫都有人穿,實在真奇怪。去參加婚禮,無管男女老幼攏有人穿牛仔褲來食喜酒,實在真無體統!

你講我來禮拜堂攏穿 kah 真飄撇,其實我無一領名牌 ê 衫,我所穿 ê 攏是我買會起一般 ê 衫,不過我真注重清氣、整齊。禮拜日,我 ê 厝邊看 tio̍h 我 ê 穿插,攏會問講:Beh 去禮拜堂 ah?因為普通時我 khah 秤彩穿。咱 tio̍h 注意,千萬 m̄-thang hông 佇腳川後笑講:Hit-ê 人『刣狗 mā chit 身,拜醮 mā chit 身!』」

李南衡《那teh褪色的台灣俗語話》(1-2冊 )已經出版,歡迎來交關,做伙進步

我有話要說