◎許隼夫
接tio̍h恆輝兄ê電子批，知影伊ê老母曾先生嬤已經安息歸天，心裡感覺失落koh悲傷。18年前我去休士頓教會就任ê時，阮ê厝猶bē買好，恆輝兄kap雅詠姊夫婦慷慨提供in ê厝hō͘我住3個月。Tī hit段時間，曾先生嬤tú好來美國探望恆輝兄，伊比阮阿母khah大1歲，我kap伊做伙生活幾禮拜久，我就對心底深深敬佩這位長輩。
曾先生嬤m̄ 識字，但是伊ê普通常識kap品德並bē輸一般受教育koh識字ê人。伊生性獨立自主，刻苦耐勞栽培教導兒女，tī台灣ah是tī美國，個個學有所成，業有所立。孫兒女也攏非常敬愛伊。
伊信神敬天，因為tòa囝兒tau無方便燒香，伊每日早晚攏tī伊房間裡唸經跪拜，有時也去廟寺做志工，tàu幫忙洗菜煮飯等服務。逐擺曾先生嬤若來休士頓探訪恆輝兄kap雅詠姊，伊攏會kap in做伙來教會，無論禮拜ah是祈禱會伊攏參加，有時也會開聲祈禱。伊是一位力行ê宗教家，用生活kap行動來表達伊ê信心ê人。
曾先生嬤對草藥真內行，伊m̄ 是中醫師，但有bat真濟祕方。所以伊一生m̄ -bat看過西醫。有時遇tio̍h我感冒ah是因為講道過多喉嚨sau聲，伊攏會choaⁿ一鼎草藥仔來hō͘我，lim了就好起來。伊也常常tī離開以前留幾包草藥，吩咐我nā tú-tio̍h症狀ê時愛choaⁿ來lim。伊ê愛心kap關懷，無輸一般基督徒，hō͘我真感動。
伊一生食素，自己做素菜，伊親手做ê滷麵thi非常好食。每一擺伊來休士頓，我攏會去中國城買一kóa現成ê素菜料理包，親自動手做一頓素菜請伊，表示我對伊ê敬意。
伊愛旅行，除了kap兒女去旅行以外，也家己參加台灣ê旅遊團遊遍世界各國。伊雖然m̄ 識字，也bē曉講外語，總是伊隨和、健談、樂意助人ê個性，得著團員ê疼惜kap幫助。In講會當kap曾阿嬤做伙旅行，是另外一款ê學習。因為伊食素，有人問伊，旅行中食甚麼？伊講早頓旅社攏有生菜、麵包、橄欖油、水果、果醬。吃一kóa，帶一kóa，抑是買一kóa，中午暗頓攏解決了。Tú著食chho ê中西餐館，有燒飯抑是燒麵包，就放心享受。人人聽了攏真佩服伊。
舊年我轉去台灣宣教，有去台北主持更生團契監獄輔導志工ê訓練，順sòa去拜訪曾先生嬤，kap伊講天講地，伊非常歡喜。伊雖然行動較無方便，但是每日攏hō͘囝兒新婦sak輪椅去公園散步，享受日光，樹蔭，涼風。
曾先生嬤真正是一位又可愛又可敬ê長輩，人人攏因為伊得著福氣。我也希望每一位基督徒會當活出親像曾先生嬤仝款ê人生。願上帝恩待伊tī天頂永遠享受平安喜樂！
送別 曾先生嬤安息天家
遙遠送別先生嬤 美麗英魂歸天家
一生謙卑又誠懇 親人朋友皆敬尊
溫純仁慈得人和 厝邊頭尾攏謳咾
孫兒孫女疼兼惜 阿嬤手袖相爭tioh
典型台灣好婦德 恬恬行善神認識
天賜高齡長歲壽 囝孫有孝親情久
願神恩待賜安息 天頂永樂伊穩得
求神賜福伊囝孫 美德常存福有偆
